Phau Ntawv Nkauj - Đoạn 22

1. Au kuv tug Vaajtswv, kuv tug Vaajtswv 'e, ua caag koj tso kuv tseg lawm? Ua caag koj nyob deb tsw paab kuv, tsw noog tej lug kws kuv quaj ntsaaj quas lawg?

2. Au kuv tug Vaajtswv, nruab nub kuv quaj thov koj, koj kuj tsw teb, mo ntuj kuv thov los tsw tau lub sab tug le.

3. Txawm le caag los koj yog tug dawb huv, koj ua vaajntxwv nyob sau cov Yixayee lu lug qhuas.

4. Peb tej laug tso sab rua koj, puab tso sab mas koj tso puab dim.

5. Puab quaj thov koj, puab txhad tau txais kev cawm dim, puab tso sab rua koj, puab txhad tsw nplaam tej kws puab vaam.

6. Kuv yog ib tug kaas xwb, tsw yog tuabneeg, tej tuabneeg ntxub kuv, ib tsoom pejxeem kuj saib tsw taug kuv.

7. Txhua tug kws pum kuv thuaj luag kuv, zwg ncauj cu hau quas nyo rua kuv has tas,

8. “Nwg muab nwg tug kheej cob rua Yawmsaub, ca Yawmsaub paab nwg dim los maj. Ca Yawmsaub cawm nwg tsua qhov Yawmsaub txaus sab rua nwg.”

9. Txawm le ntawd, los koj yog tug kws coj kuv tawm huv nam lub plaab lug, hab pub kuv nyob tso sab plhuav rua huv nam lub xubndag.

10. Txwj thaus yug lug kuv yeej vaam koj, koj yog kuv tug Vaajtswv txwj thaus kuv nyob huv nruab thab.

11. Thov koj tsw xob nyob deb ntawm kuv, vem yog kev ceblaaj nyob ze kuv hab tsw muaj leejtwg paab hlo le.

12. Muaj txwv nyuj coob vej kuv, yog cov txwv nyuj muaj zug huv Npasaa nyob puag ncig kuv.

13. Puab rua ncauj luj rua kuv yaam nkaus le tsuv ntxhuav tum dua nyooj quas lawg.

14. Kuv raug muab nchuav yaam le dej, kuv tej pob txhaa huvsw kuj pluam taag. Kuv lub sab zoo le cab ntaab yaaj taag rua huv kuv hauv sab.

15. Kuv tug zug sem taag qhuav yaam le tej txhais laujkaub aav. Kuv tug nplaig lu rua ntawm txhaa puab tsaig lawm. Koj muab kuv tso rua huv tej moov aav kws yog txujkev tuag.

16. Yeej muaj dev vej quas vog kuv, ib paab tuabneeg phem nyob vej kuv, puab nkaug kuv xwb teg hab kuv xwb taw.

17. Kuv suav tau kuv tej pob txhaa huvsw. Puab saib ntsa ntsoov hab nyos luag kuv.

18. Puab muab kuv tej rwg tsho faib, kuv lub tsho puab muab ua ntawv rhu.

19. Au Yawmsaub, thov koj tsw xob nyob deb, au koj kws paab kuv, thov maaj nroog tuaj paab kuv lauj!

20. Thov cawm kuv tug ntsuj plig dim nav ntaaj, hab cawm kuv txujsa dim ntawm tej dev tug zug.

21. Thov cawm kuv dim huv tsuv ntxhuav lub qhov ncauj, hab cawm kuv dim ntawm cov txwv nyuj qus tej kub.

22. Kuv yuav has txug koj lub npe rua kuv cov kwvtij paub. Kuv yuav qhuas koj rua thaus ib tsoom tuabneeg tuaj txoos ua ke.

23. Mej cov kws paub ntshai Yawmsaub, ca le qhuas nwg. Yakhauj caaj ceg suavdawg, mej ca le ua rua nwg tau koob meej. Yixayee caaj ceg suavdawg, mej ca le fwm nwg.

24. Tsua qhov nwg tsw tau saib tsw taug hab ntxub cov kws txom nyem tej kev nyuaj sab. Nwg tsw fee plhu ntawm puab hab thaus puab quaj thov nwg, nwg kuj nov.

25. Kuv tej lug qhuas koj rua thaus cov tuabneeg coob coob tuaj txoos ua ke kuj yog koj pub. Kuv yuav pauj tej kws yeem lug lawd taab meeg cov kws paub ntshai koj.

26. Cov tuabneeg raug txom nyem nyuaj sab yuav tau noj tsau npo. Cov kws nrhav Yawmsaub yuav tau qhuas nwg. Thov ca mej kaaj sab quas lug moog ib txhws.

27. Thoob plawg huv lub nplajteb yuav ncu ntsoov hab tig lug rua ntawm Yawmsaub, hab txhua haiv tuabneeg huv ib tsoom tebchaws yuav pe hawm rua ntawm nwg lub xubndag.

28. Tsua qhov Yawmsaub muaj fwjchim tswjfwm, hab nwg kaav ib tsoom tebchaws.

29. Cov tuabneeg khaav theeb huv lub nplajteb suavdawg yuav pe nwg. Cov kws moog rua huv qhov tuag suavdawg yuav pe hawm nwg, puab yog cov kws tuav tsw tau txujsa nyob lawm.

30. Cov tuabneeg kws yuav tshwm lug yaav tom qaab yuav ua koom rua nwg. Tej tuabneeg yuav has txug tug Tswv rua tam tuabneeg tom qaab noog,

31. hab tshaaj tawm nwg txujkev cawm dim rua cov tuabneeg kws tsw tau yug lug paub tas nwg ua nwg tej num hov lawm.