Phau Ntawv Nkauj - Đoạn 148

1. Ca le qhuas Yawmsaub. Ca le qhuas Yawmsaub sau ntuj. Ca le qhuas nwg sau tej chaw sab.

2. Nwg cov tubkhai ntuj suavdawg, ca le qhuas nwg, nwg cov tub rog suavdawg, ca le qhuas nwg lauj!

3. Lub nub lub hli, ca le qhuas nwg, tej nub qub kws ci, mej txhua lub ca le qhuas nwg.

4. Lub ntuj kws sab kawg nkaus, hab cov dej kws nyob sau ntuj, mej ca le qhuas nwg.

5. Ca tej hov qhuas Yawmsaub lub npe, vem yog nwg has xwb, tej hov ca le muaj tshwm lug.

6. Nwg muab puab txawb ca moog ib txhws tsw kawg, nwg rhawv kevcai rua puab tsw kheev puab hlaa dhau.

7. Ca le qhuas Yawmsaub huv lub nplajteb, tsw has tej tsaj kws luj kawg huv havtxwv hab tej dej nruab tiv txwv,

8. tsag lig xub hab lawg, daus xwb daus npu hab fuab, hab cua daaj cua dub kws ua lawv le nwg has,

9. tej roob hab tej pov roob huvsw, tej txwv ntoo hab tej ntoo cab huvsw,

10. tej tsaj qus hab tej tsaj nyeg huvsw, tej tsaj kws nkaag huv aav hab tej naag noog kws yaa sau nruab ntug,

11. tej vaajntxwv huv lub nplajteb hab ib tsoom tuabneeg suavdawg, cov kws ua thawj hab cov kws kaav huv lub nplajteb suavdawg,

12. cov tub hluas ntxhais hluas, cov laug hab cov mivnyuas yau.

13. Ca puab suavdawg qhuas Yawmsaub lub npe, tsua qhov nwg tuab leeg lub npe nyob sab dua luas tej, nwg tug fwjchim ci ntsaa ab nyob sab dua lub nplajteb hab lub ntuj.

14. Nwg tsaa kuas muaj ib tug kub rua nwg haiv tuabneeg, yog tug kws nwg cov tuabneeg dawb huv suavdawg qhuas, yog tug kws cov Yixayee kws nyob ze nwg qhuas. Ca le qhuas Yawmsaub.