Phau Ntawv Nkauj - Đoạn 147

1. Ca le qhuas Yawmsaub. Qhov kws hu nkauj qhuas peb tug Vaajtswv yog qhov kws zoo, qhov kws hu nkauj qhuas nwg yog yaam kws peb zoo sab ua hab tswm nyog peb ua.

2. Yawmsaub rov qaab rhawv lub nroog Yeluxalee, hab nwg qaws cov Yixayee kws tawg ua saab ua sua rov qaab lug.

3. Nwg khu cov tuabneeg lwj sab hab qhwv puab tej qhov txhaab.

4. Nwg kom tseg tas yuav tsum muaj pes tsawg lub nub qub hab tis npe rua txhua lub huvsw.

5. Peb tug Tswv luj kawg hab muaj fwjchim kawg nkaus, tsw muaj leejtwg yuav ntsuag tau nwg tug tswvyim.

6. Yawmsaub tsaa cov kws raug tsuj yuam sawv, nwg yuav qhau cov tuabneeg limham rua huv aav.

7. Ca le hu nkauj ua Yawmsaub tsaug, ca le ntaus nkauj nog ncaas qhuas peb tug Vaajtswv.

8. Nwg tso fuab laum nruab ntug, nwg npaaj naag ca rua lub nplajteb, nwg ua kuas tuaj nyom rua sau tej roob.

9. Nwg pub zaub rua tej tsaj txhu noj hab pub rua tej mivnyuas uab voj kws quaj tau noj.

10. Tsw yog nwg zoo sab rua tej neeg tug zug, hab tsw yog nwg zoo sab rua tuabneeg txhais ceg kws dha.

11. Tassws Yawmsaub zoo sab rua cov kws fwm hab paub ntshai nwg hab cov kws vaam khom rua nwg txujkev hlub kws ruaj khov.

12. Yeluxalee 'e, ca le qhuas Yawmsaub, Xi‑oo 'e, ca le qhuas koj tug Vaajtswv,

13. vem nwg tuav koj tej rooj loog ruaj khov kho, nwg foom koob moov rua tej tub ki kws nyob huv koj.

14. Nwg kuj pub kev thaaj yeeb rua huv koj lub tebchaws, nwg pub koj tau noj tej mog zoo zoo tsau npo.

15. Nwg xaa nwg tej lug tuaj rua lub nplajteb, nwg tej lug nthuav moog sai kawg.

16. Nwg tso daus xwb daus npu lug yaam le plaub yaaj, nwg tso te lug dawb vog le moov tshauv.

17. Nwg tso lawg lug yaam le qai zeb. Leejtwg yuav thev taug qhov kws nwg ua kuas no txag heev ntawd?

18. Nwg tso lug plhuav, ua rua tej ntawd yaaj taag, nwg tso nwg le cua ntsawj ua tej dej ndwg hlo moog.

19. Nwg qha nwg tej lug rua Yakhauj, hab qha nwg tej kaab ke hab kevcai rua Yixayee.

20. Nwg yeej tsw tau qha tej kevcai nuav rua lwm haiv tuabneeg, puab tsw paub nwg tej kevcai. Ca le qhuas Yawmsaub.