Phau Ntawv Nkauj - Đoạn 140

1. Au Yawmsaub, thov cawm kuv dim ntawm cov tuabneeg ua phem, thov tiv thaiv kuv ntawm cov tuabneeg ua nruj ua tswv,

2. yog cov kws xaav tswvyim huv lub sab ua phem, hab pheej tshaum kuas muaj kev ua rog.

3. Puab ua puab tug nplaig ntse ib yaam le nplaig naab, hab puab daim tawv ncauj muaj taug ib yaam le taug naab raaj kub sai.

4. Au Yawmsaub, thov tsom kwm kuv kuas dim ntawm cov tuabneeg limham txhais teg, thov tiv thaiv kuv ntawm cov tuabneeg ua nruj ua tswv kws tuav huv chua kuv kwtaw.

5. Cov tuabneeg khaav theeb caws yej caws ntxab tog kuv, hab cuab tswg cuab hlua rua kuv. Kuv txujkev mas puab cuab maab cuab hlua tog.

6. Kuv has rua Yawmsaub tas, “Koj yog kuv tug Vaajtswv.” Au Yawmsaub, thov koj tig ntsej noog kuv lub suab taij thov koj.

7. Au Yawmsaub kws yog kuv tug tswv, yog tug kws muaj zug cawm kuv dim, koj roog kuv lub taubhau thaus kws ntaus rog.

8. Au Yawmsaub, thov tsw xob kheev cov tuabneeg limham ua tau lawv le puab lub sab xaav, tsw xob kheev puab tej tswvyim phem tav.

9. Cov kws nyob vej ib ncig kuv tsaa puab lub taubhau sab. Thov ca puab raug tej lug phem kws puab daim tawv ncauj has.

10. Thov kuas cov ncaig tawg kws kub heev poob raug puab, thov ca puab raug pov rua huv suavtawg hab poob rua huv qhov ntuj tsw xob kheev puab tawm lug le.

11. Thov tsw xob ca cov kws ab ham luas nyob ruaj huv lub tebchaws, thov ca txujkev phem lawv caum tau tej tuabneeg ua nruj ua tswv.

12. Kuv paub tas Yawmsaub tuav cov tuabneeg txom nyem nyuaj sab txujcai, hab tu plaub ncaaj paab cov pluag.

13. Yeej muaj tseeb, cov tuabneeg ncaaj nceeg yuav ua tsaug koj lub npe, cov tuabneeg sab ncaaj yuav tau nyob ntawm koj xubndag.