Phau Ntawv Nkauj - Đoạn 119

1. Cov tuabneeg kws puab lub neej tsw muaj chaw thuaj kuj tau nyob kaaj sab lug, yog cov kws ua lub neej lawv le Yawmsaub txuj kevcai.

2. Cov kws tuav rawv Yawmsaub tej lug qha kuj tau nyob kaaj sab lug, yog cov kws nrhav Yawmsaub kawg sab kawg ntsws.

3. Puab tsw ua txhum, tassws puab taug nraim Yawmsaub txujkev.

4. Koj rhawv koj tej kev tswjfwm rua peb kuas peb coj nruj le ntawd.

5. Thov ca kuv lub neej kws ua lawv le koj tej kaab ke ruaj khov moog le,

6. kuv txhad le tsw raug txaaj muag vem yog kuv qhov muag saib ntsoov koj tej lug nkaw huvsw.

7. Thaus kws kuv kawm paub koj phua cai ncaaj nceeg lawm kuv ua lub sab dawb paug qhuas koj.

8. Kuv yuav coj lawv le koj tej kaab ke. Thov tsw xob muab kuv tso plhuav tseg.

9. Yuav ua le caag tug tub hluas txhad ua tau nwg lub neej dawb huv? Yog yuav tsum ceev faaj coj lawv le koj txuj lug.

10. Kuv nrhav koj kawg kuv lub sab, thov tsw xob ca kuv yuam kev ntawm koj tej lug nkaw.

11. Kuv khaws nkaus koj tej lug rua huv kuv lub sab, kuv txhad tsw ua txhum rua koj.

12. Au Yawmsaub, kuv qhuas koj, thov koj qha koj tej kaab ke rua kuv.

13. Kuv daim tawv ncauj yuav pav txug tej lug phua cai kws tawm huv koj lub qhov ncauj lug huvsw.

14. Kuv zoo sab rua koj tej lug qha npaum nkaus le zoo sab rua txhua yaam kev nplua nuj.

15. Kuv tshawb nrhav koj tej kev tswjfwm, hab kuv lub qhov muag saib ntsoov koj txujkev.

16. Kuv zoo sab rua koj tej kaab ke, kuv yuav tsw nov qaab koj txuj lug.

17. Thov koj ua zoo rua koj tug tub qhe, sub kuv txhad le muaj txujsa nyob hab coj lawv le koj tej lug.

18. Thov qheb kuv qhov muag sub kuv txhad le pum tej txujci phemfwj huv koj txuj kevcai.

19. Kuv ua neej nyob ib nyuas ntu huv nplajteb nuav, thov tsw xob muab koj tej lug nkaw zais tsw qha kuv.

20. Kuv lub sab nqhes koj tej lug phua cai qhuav sab qhawv txhua lub swjhawm.

21. Koj tshev cov kws khaav theeb, yog cov kws raug foom tsw zoo, yog cov kws yuam kev ntawm koj tej lug nkaw.

22. Thov koj rhu tej lug tshev hab tej lug saib tsw taug kuv moog, tsua qhov kuv yeej coj lawv nraim le koj tej lug qha.

23. Txawm yog cov thawj sablaaj tuav huv tawm tsaam kuv, los koj tug tub qhe tsuas muaj kws tshawb nrhav koj tej kaab ke.

24. Koj tej lug qha ua rua kuv zoo sab xyiv faab, hab tej lug ntawd yog kuv lub chaw sablaaj.

25. Kuv tug ntsuj plig nyob hlo rua huv moov aav, thov koj txuas kuv txujsa lawv le koj tej lug cog tseg.

26. Thaus kuv qha kuv lub neej rua koj mas koj kuj teb kuv. Thov koj qha koj tej kaab ke rua kuv.

27. Thov qha kuas kuv nkaag sab koj tej kev tswjfwm. Kuv yuav tshawb nrhav kawm koj tej num phemfwj.

28. Kuv muaj kev txhawj xeeb sab ntsws yaaj taag, thov txhawb kuv tug zug lawv le koj tej lug cog tseg.

29. Thov paab kuas kuv tsw xob ua tuabneeg cis daag, thov koj hlub kuv, qha koj txuj kevcai rua kuv.

30. Kuv tub xaiv qhov kws xwb rua koj, kuv muab koj tej lug phua cai txawb rua ntawm kuv xubndag.

31. Au Yawmsaub, kuv yeej tuav rawv koj tej lug qha, tsw xob ca kuv raug txaaj muag.

32. Kuv yuav maaj nroog ua lawv le koj tej lug nkaw, vem yog koj pub kuv nkaag sab ntau quas zug.

33. Au Yawmsaub, thov koj qha koj tej kaab ke rua kuv, kuv yuav coj lawv nraim le ntawd moog txug thaus kawg.

34. Thov qha kuas kuv nkaag sab, kuv txhad le coj lawv nraim le koj txuj kevcai, kuv yuav xyum ua lawv le ntawd kawg kuv lub sab.

35. Thov koj coj kuv moog lawv le koj tej lug nkaw, tsua qhov kuv zoo sab xyiv faab rua txujkev ntawd.

36. Thov tswj kuv lub sab rua koj tej lug qha, tsw xob ca qaug rua kev nplua nuj.

37. Thov koj tig kuv qhov muag kuas tsw xob saib rua tej yaam kws tsw tseem ceeb, hab thov koj tuav kuv txujsa rua huv koj txujkev.

38. Thov koj tuav nreeg koj tej lug cog tseg rua koj tug tub qhe, yog tej lug kws koj cog rua cov kws fwm hab paub ntshai koj.

39. Thov koj muab tej lug thuaj luag kws kuv ntshai rhuav tshem moog, tsua qhov koj tej lug phua cai zoo kawg nkaus.

40. Kuv ncu ncu koj tej kev tswjfwm. Vem koj yog tug ncaaj nceeg mas thov tuav kuv txujsa.

41. Au Yawmsaub, thov koj ua koj txujkev hlub kws ruaj khov tshwm tuaj rua kuv, yog qhov kws koj cawm dim lawv le koj cog lug tseg.

42. Mas kuv txhad le muaj lug teb rua cov kws thuaj luag kuv, vem kuv tso sab rua koj tej lug.

43. Thov koj tsw xob muab koj tej lug tseeb rhu hlo ntawm kuv lub qhov ncauj moog, tsua qhov kuv yeej vaam tej lug kws koj phua cai.

44. Kuv yuav tuav rawv koj txuj kevcai moog ib txhws tsw kawg.

45. Kuv yuav ua neej nyob ywj pheej vem yog kuv tshawb nrhav koj tej kev tswjfwm.

46. Kuv yuav pav koj tej lug qha rua tej vaajntxwv noog, kuv yuav tsw raug txaaj muag le.

47. Tsua qhov kuv yeej zoo sab heev rua koj tej lug nkaw kws kuv nyam.

48. Kuv fwm koj tej lug nkaw kws kuv nyam, hab kuv yuav tshawb nrhav koj tej kaab ke.

49. Thov ncu ntsoov tej lug kws koj cog tseg rua koj tug tub qhe, tej lug ntawd yeej ua rua kuv muaj sab vaam.

50. Thaus kuv raug kev txom nyem, yaam kws nplig kuv lub sab yog koj tej lug cog tseg kws pub txujsa rua kuv.

51. Cov tuabneeg kws tsw fwm Vaajtswv thuaj luag kuv heev, los kuv tsw tig ntawm koj txuj kevcai.

52. Au Yawmsaub, thaus kuv xaav txug tej lug kws koj phua cai thau u, mas tej lug ntawd nplig tau kuv lub sab.

53. Kuv chim sab heev kawg le vem tej tuabneeg limham muab koj txuj kevcai tso tseg.

54. Koj tej kaab ke yog tej nkauj kws kuv hu rua thaus kuv ua qhua nyob huv nplajteb.

55. Au Yawmsaub, thaus tsaus ntuj nti los kuv ncu txug koj lub npe, hab tuav rawv koj txuj kevcai.

56. Kuv tau nyob kaaj sab lug vem yog kuv coj lawv le koj tej kev tswjfwm.

57. Yawmsaub yog kuv tug, kuv cog lug tseg has tas kuv yuav ua lawv le koj tej lug.

58. Kuv thov kawg sab kawg ntsws kuas koj hlub kuv, thov koj khuvleej kuv lawv le tej lug kws koj cog tseg.

59. Thaus kuv xaav txug tej kws kuv ua, kuv txhad le tig hlo ua lawv le koj tej lug qha.

60. Kuv maaj nroog ua lawv le koj tej lug nkaw, kuv tsw tog le lawm.

61. Txawm yog kuv maag cov tuabneeg limham txuj hlua cuab, los kuv yuav tsw nov qaab koj txuj kevcai.

62. Thaus ib taag mo los kuv sawv lug qhuas koj, vem yog tej lug kws koj phua cai ncaaj nceeg.

63. Kuv nrug txhua tug kws fwm hab paub ntshai koj ua phoojywg, yog cov kws coj lawv le koj tej kev tswjfwm.

64. Au Yawmsaub, koj txujkev hlub kws ruaj khov puv nkaus lub nplajteb, thov qha koj tej kaab ke rua kuv.

65. Au Yawmsaub, koj tau ua zoo rua koj tug tub qhe, lawv le koj tej lug cog tseg.

66. Thov qha tswvyim hab kev txawj ntse rua kuv, vem yog kuv tso sab rua koj tej lug nkaw.

67. Ua ntej kws kuv tsw tau raug kev txom nyem kuv yuam kev ua txhum, tassws nwgnuav kuv ua lawv le koj tej lug.

68. Koj yog tug zoo kawg hab ua zoo, thov qha koj tej kaab ke rua kuv.

69. Cov tuabneeg kws tsw fwm koj laam ab ham kuv, tassws kuv coj lawv le koj tej kev tswjfwm kawg kuv lub sab.

70. Puab lub sab ruag qhwv, tassws kuv zoo sab xyiv faab rua koj txuj kevcai.

71. Qhov kws kuv raug txom nyem kuj zoo lawm, kuv txhad kawm paub koj tej kaab ke.

72. Txuj kevcai kws tawm huv koj lub qhov ncauj lug mas zoo rua kuv ntau dua nyaj hab kub quas txheeb daim.

73. Koj txhais teg tau tswm hab puab kuv. Thov pub kuv nkaag sab kuv txhad kawm paub koj tej lug nkaw.

74. Cov kws fwm hab paub ntshai koj yuav pum kuv hab zoo sab, vem yog kuv muaj sab vaam koj tej lug.

75. Au Yawmsaub, kuv paub tas qhov kws koj phua cai yeej raug lawm, hab paub tas thaus koj ca kuv raug kev txom nyem koj yeej ua ncaaj nceeg.

76. Thov ca koj txujkev hlub kws ruaj khov nplig kuv lub sab, lawv le koj cog tseg rua koj tug tub qhe.

77. Thov khuvleej kuv sub kuv txhad le caj sa nyob. Koj txuj kevcai ua rua kuv zoo sab xyiv faab.

78. Thov ua kuas cov tuabneeg kws tsw fwm koj raug txaaj muag, vem yog puab laam ab ham kom kuv, tassws kuv le mas kuv yuav tshawb nrhav koj tej kev tswjfwm.

79. Thov pub cov kws fwm hab paub ntshai koj tig lug rua ntawm kuv, sub puab txhad le paub koj tej lug qha.

80. Thov ca kuv lub sab dawb huv coj lawv le koj tej kaab ke, kuv txhad tsw raug txaaj muag.

81. Kuv nyob qhuav sab qhawv tog koj txujkev cawm dim, kuv vaam ntsoov koj tej lug.

82. Kuv lub qhov muag plooj nplaag vem yog tog koj tej lug cog tseg, kuv nug has tas, “Thaus twg koj le nplig kuv lub sab?”

83. Vem kuv zoo nkaus le lub naab tawv ntim cawv txwv maab kws raug paa suavtawg txhawb lawm, los kuv tsw nov qaab koj tej kaab ke.

84. Koj tug tub qhe yuav tsum ua sab ntev tog ntev le caag? Thaus twg koj le txav txem rua cov tuabneeg kws tswm txom kuv?

85. Cov tuabneeg kws tsw fwm koj khawb qhov taub cuab kuv, yeej yog cov kws tsw coj lawv le koj txuj kevcai.

86. Koj tej lug nkaw mas tso sab tau txhua lu huvsw. Puab laam ab ham tswm txom kuv. Thov koj paab kuv lauj!

87. Puab tub txuv yuav tau kuv txujsa huv nplajteb, tassws kuv tsw tso koj tej kev tswjfwm tseg.

88. Thov tuav kuv txujsa ca vem koj txujkev hlub kws ruaj khov, sub kuv txhad tuav rawv tej lug qha kws koj lub qhov ncauj has.

89. Au Yawmsaub, koj txujlug yeej nyob ruaj nreeg sau ntuj moog ib txhws.

90. Koj txujkev ncaaj kws tso sab tau yeej muaj nyob moog rua txhua tam tuabneeg. Koj txawb lub nplajteb nuav ca mas txhad nyob ruaj khov.

91. Tej hov nyob ruaj khov txug naj nub nua vem koj has kuas muaj le ntawd, tsua qhov txhua yaam puav leej yog koj le tub qhe.

92. Yog koj txuj kevcai tsw ua rua kuv zoo sab xyiv faab, tes kuv tej kev txom nyem tub ua rua kuv puam tsuaj lawm.

93. Kuv yuav tsw nov qaab koj tej kev tswjfwm le, vem koj tej kev tswjfwm tuav tau kuv txujsa.

94. Kuv yog koj le, thov cawm kuas kuv dim, vem kuv nrhav koj tej kev tswjfwm.

95. Cov tuabneeg phem zuv kev txuv kuv, tassws kuv ua tuab zoo saib koj tej lug qha.

96. Kuv txeev pum tas ib puas tsaav yaam muaj lub chaw kawg, tassws koj tej lug nkaw daav tsw muaj chaw kawg.

97. Kuv nyam koj txuj kevcai kawg nkaus, yog tej lug kws kuv tshawb nrhav taag naj taag nub.

98. Koj tej lug nkaw ua rua kuv txawj ntse dua kuv tej yeeb ncuab, vem koj tej lug nrug nraim kuv txhua lub swjhawm.

99. Kuv muaj kev nkaag sab ntau dua cov kws qha kuv suavdawg, tsua qhov koj tej lug qha yog tej kws kuv tshawb nrhav.

100. Kuv nkaag sab ntau dua cov laug vem yog kuv tuav rawv koj tej kev tswjfwm.

101. Kuv tswj kuv txhais kwtaw tsw kaam moog ua txhua yaam kev phem, sub kuv txhad tuav rawv koj tej lug.

102. Kuv tsw tau tig ntawm koj tej lug phua cai tsua qhov koj tub qha kuv lawm.

103. Koj tej lug kuv swm noj lawm qaab zwb heev, qaab zwb dhau zwb ntaab huv kuv qhov ncauj.

104. Koj tej kev tswjfwm ua rua kuv txawj nkaag sab, vem le hov kuv txhad ntxub txhua yaam kev phem kev daag.

105. Koj tej lug yog lub teeb rua kuv txhais kwtaw hab yog qhov kaaj rua kuv txujkev.

106. Kuv yuav tuav rawv tej lug kws kuv cog tseg ruaj ca rua koj has tas, kuv yuav ua lawv le koj tej lug phua cai kws ncaaj nceeg.

107. Au Yawmsaub, kuv txom nyem nyuaj sab heev kawg, thov koj tuav kuv txujsa lawv le koj tej lug cog tseg.

108. Au Yawmsaub, thov koj leeg yuav kuv tej lug qhuas kws kuv xyeem rua koj, hab thov qha koj tej lug phua cai rua kuv.

109. Kuv naj nub tso nyog kuv txujsa tseg, los kuv tsw nov qaab koj txuj kevcai.

110. Cov tuabneeg limham cuab hlua rua kuv tassws kuv tsw yuam kev ntawm koj tej kev tswjfwm.

111. Koj tej lug qha mas kuv txais yuav ua qub txeeg qub teg moog ib txhws, tej lug ntawd ua rua kuv sab xyiv faab.

112. Kuv tswj kuv lub sab kuas ua lawv le koj tej kaab ke moog ib txhws txug taag swm neej.

113. Kuv ntxub cov kws muaj ob lub sab, tassws kuv nyam koj txuj kevcai.

114. Koj yog kuv lub chaw nraim cev hab yog kuv daim hlau tiv thaiv kuv, kuv vaam ntsoov koj tej lug cog tseg.

115. Cov nam tuabneeg ua phem, mej ca le tswv moog, sub kuv txhad tuav rawv tau kuv tug Vaajtswv tej lug nkaw.

116. Thov koj tsom kwm kuv lawv le koj tej lug cog tseg kuv txhad le caj sa, hab tsw xob ca kuv poob ntsej muag rua tej kws kuv vaam.

117. Thov koj fwj kuv ca, sub kuv txhad nyob tso sab plhuav, hab yuav fwm koj tej kaab ke moog ib txhws.

118. Koj yuav tsw quav ntsej cov kws yuam kev ntawm koj tej kaab ke, puab tej kev ntxeev ntxag yuav tsw muaj qaabhau hlo le.

119. Koj saib cov tuabneeg limham huvsw huv nplajteb zoo le tej quav tooj quav hlau, vem le nuav kuv txhad le nyam koj tej lug qha.

120. Kuv ib ce tshee quas nyo vem yog kuv ntshai koj, hab ntshai koj tej lug txav txem.

121. Kuv tub ua ncaaj hab ua raug cai lawm, thov tsw xob tso kuv tseg rua cov kws quab yuam kuv.

122. Thov koj leeg has tas koj yuav paab koj tug tub qhe kuas tau zoo, thov tsw xob ca cov kws tsw fwm koj quab yuam kuv.

123. Kuv lub qhov muag plooj nplaag vem yog tog koj txujkev cawm dim, hab tog koj ua koj tej lug cog tseg ncaaj nceeg kuas tav.

124. Thov koj pub rua koj tug tub qhe lawv le koj txujkev hlub kws ruaj khov, hab thov qha koj tej kaab ke rua kuv.

125. Kuv yog koj tug tub qhe. Thov koj pub kuas kuv nkaag sab, sub kuv txhad le paub koj tej lug qha.

126. Tub txug lub swjhawm kws Yawmsaub txav txem lawm, vem puab tub muab koj txuj kevcai rhuav lawm.

127. Vem le hov kuv nyam koj tej lug nkaw heev dua kub heev dua tej tseem kub.

128. Vem le ntawd kuv txhad swv koj tej kev tswjfwm huvsw coj kuv txuj hauv kev, kuv ntxub txhua yaam kev daag ntxag.

129. Koj tej lug qha tseem ceeb kawg le, kuv lub sab txhad tuav rawv tej lug ntawd.

130. Qhov kws nthuav koj tej lug ua rua pum kev kaaj quas lug, hab pub kev nkaag sab rua cov kws tsw thoob tswb.

131. Kuv txug sav rua ncauj tsuag vem nqhes koj tej lug nkaw heev.

132. Thov koj tig lug rua kuv hab hlub kuv ib yaam le koj txeev ua rua cov kws nyam koj lub npe.

133. Thov koj pub kuas kuv kwtaw nyob ruaj nreeg lawv le koj tej lug cog tseg, thov tsw xob kheev ib yaam kev txhum twg kov yeej kuv.

134. Thov txhwv kuv dim tej kws tuabneeg quab yuam kuv, sub kuv txhad tuav rawv koj tej kev tswjfwm.

135. Thov koj lub ntsej muag ci ntsaa ab rua koj tug tub qhe, hab thov qha koj tej kaab ke rua kuv.

136. Kuv kua muag ndwg quas lawg le dej ndwg vem yog tuabneeg tsw tuav rawv koj txuj kevcai.

137. Au Yawmsaub, koj yog tug ncaaj nceeg, koj yeej txav txem raug kev raug cai.

138. Koj yeej tu koj tej lug qha ncaaj nceeg hab tso sab tau huvsw.

139. Kuv lub sab kub quas lug cuag suavtawg hlawv vem kuv cov tshawj chim nov qaab koj tej lug lawm.

140. Koj tej lug cog tseg tub muab swm zoo zoo le lawm, koj tug tub qhe nyam tej lug hov.

141. Kuv yog ib tug tsw tseem ceeb hab luas saib tsw taug, tassws kuv tsw nov qaab koj tej kev tswjfwm.

142. Koj txujkev ncaaj nceeg yeej yuav ncaaj nceeg moog ib txhws, hab koj txuj kevcai yog txuj tseeb.

143. Kev txom nyem hab kev lwj sab lug raug kuv, tassws koj tej lug nkaw ua rua kuv zoo sab xyiv faab.

144. Koj tej lug qha ncaaj nceeg moog ib txhws, thov pub kuv nkaag sab kuv txhad le caj sa nyob.

145. Kuv taij thov koj kawg kuv lub sab. Au Yawmsaub, thov koj teb kuv, kuv yuav ua lawv le koj tej kaab ke.

146. Kuv quaj thov koj, thov cawm kuas kuv dim, sub kuv txhad ua tau lawv le koj tej lug qha.

147. Kuv sawv thaus tsw tau kaaj ntug thov koj paab kuv, kuv vaam ntsoov koj tej lug.

148. Kuv yeej pw tsw tsaug zug ib mos kaaj ntug le, sub kuv txhad tshawb nrhav tau koj tej lug cog tseg.

149. Thov koj noog kuv lub suab lawv le koj txujkev hlub kws ruaj khov. Au Yawmsaub, thov koj tuav kuv txujsa lawv le koj txujkev ua ncaaj ua nceeg.

150. Cov tuabneeg kws ntaus tswvyim phem xaav tswm txom kuv, puab tub tuaj ze lawm, puab yeej nyob deb ntawm koj txuj kevcai.

151. Au Yawmsaub, koj nyob ze kuv, hab koj tej lug nkaw puavleej muaj tseeb.

152. Kuv tub kawm paub ntawm koj tej lug qha ntev lug lawm tas koj tswm koj tej lug qha kuas nyob moog ib txhws.

153. Thov tsaa muag saib kuv tej kev txom nyem, hab tso kuv dim, vem kuv yeej tsw nov qaab koj txuj kevcai.

154. Thov paab has kuv tshaaj plaub hab txhwv kuv dim, thov tuav kuv txujsa lawv le koj tej lug cog tseg.

155. Cov tuabneeg limham yeej tsw dim vem yog puab tsw nrhav koj tej kaab ke.

156. Au Yawmsaub, koj txujkev khuvleej luj kawg nkaus, thov tuav kuv txujsa lawv le koj txav txem ncaaj nceeg.

157. Cov kws tswm txom kuv hab tawm tsaam kuv muaj coob kawg le, los kuv tsw zos koj tej lug qha le.

158. Kuv tsaa muag saib cov tuabneeg faav xeeb mas kuv ntxub kawg le, tsua qhov puab tsw tuav rawv koj tej lug nkaw.

159. Thov koj tshuaj saib kuv nyam koj tej kev tswjfwm npaum le caag, thov koj tuav kuv txujsa lawv le koj txujkev hlub kws ruaj khov.

160. Lub ntsab luj huv koj tej lug yog kev tseeb, hab koj tej lug phua cai ncaaj nceeg txhua lu yuav nyob moog ib txhws le.

161. Kuv tsw tau ua txhum los cov thawj ca le tswm txom kuv, tassws kuv lub sab tseed fwm hab ntshai koj tej lug.

162. Kuv zoo sab xyiv faab rua koj tej lug yaam nkaus le tug kws tau tej txhaab nyaj.

163. Kuv ntxub hab dhuav tej lug daag, tassws kuv nyam koj txuj kevcai.

164. Kuv qhuas koj ib nub xyaa zag vem koj tej lug phua cai ncaaj nceeg.

165. Cov kws nyam koj txuj kevcai tau zoo nyob kaaj sab lug, tsw muaj ib yaam daabtsw dawm teg dawm taw.

166. Au Yawmsaub, kuv vaam ntsoov koj txujkev cawm dim, hab kuv ua lawv le koj tej lug nkaw.

167. Kuv lub sab tuav rawv koj tej lug qha, kuv nyam koj tej lug ntawd heev kawg le.

168. Kuv tuav rawv koj tej kev tswjfwm hab koj tej lug qha tsua qhov kuv txhua txujkev nyob ntawm koj lub xubndag.

169. Au Yawmsaub, thov ca kuv lub suab thov nce tuaj txug koj xubndag, thov pub kuv nkaag sab lawv le koj tej lug cog tseg.

170. Thov kuv tej lug taij nce tuaj txug koj xubndag, thov cawm kuv lawv le koj tej lug cog tseg.

171. Kuv daim tawv ncauj yuav qhuas koj tsw tu, vem koj tub qha koj tej kaab ke rua kuv.

172. Kuv tug nplaig yuav hu nkauj txug koj tej lug, vem koj tej lug nkaw puavleej ncaaj nceeg.

173. Thov koj txhais teg npaaj rawv kws yuav paab kuv, vem kuv tub xaiv coj lawv le koj tej kev tswjfwm.

174. Au Yawmsaub, kuv ntshaw koj txujkev cawm dim, hab zoo sab xyiv faab rua koj txuj kevcai.

175. Thov pub kuv muaj txujsa nyob sub kuv txhad qhuas tau koj, hab ca koj tej lug phua cai paab kuv.

176. Kuv yuam kev ib yaam le tug yaaj kws pluj lawm, thov tuaj nrhav koj tug tub qhe, tsua qhov kuv tsw nov qaab koj tej lug nkaw.