Phau Ntawv Nkauj - Đoạn 116

1. Kuv lub sab npuab Yawmsaub vem nwg nov kuv lub suab hab kuv tej lug thov.

2. Vem nwg tig ntsej noog kuv, kuv txhad yuav thov nwg taag kuv swm neej.

3. Txujkev tuag rooj hlua cuab vej puag ncig kuv, tub tuag teb txujkev mob nteg kuv ca, kuv raug kev txom nyem nyuaj sab hab kev lwj sab.

4. Kuv txhad thov hu Yawmsaub lub npe tas, “Au Yawmsaub, thov koj cawm kuv txujsa dim.”

5. Yawmsaub muaj sab hlub hab ncaaj nceeg, peb tug Vaajtswv muaj sab khuvleej.

6. Yawmsaub tuav tug kws tsw paub qaabhau ca, thaus kuv poob thaab, nwg cawm kuv dim.

7. Kuv tug ntsuj plig 'e, ca le rov qaab moog rua ntawm koj lub chaw su, tsua qhov Yawmsaub ua zoo kawg rua koj.

8. Vaajtswv, koj tso kuv tug ntsuj plig dim txujkev tuag, hab tso kuv lub qhov muag dim tej kua muag, hab paab kuv txhais kwtaw dim qhov kws dawm.

9. Kuv ua kuv lub neej taab meeg Yawmsaub rua huv cov tuabneeg caj lub tebchaws.

10. Txawm yog kuv has tas, “Kuv raug kev txom nyem luj heev,” los kuv tseed ntseeg.

11. Thaus kuv poob sab kuv has tas, “Tuabneeg suavdawg daag ntxag xwb.”

12. Kuv yuav muab daabtsw rua Yawmsaub pauj qhov kws nwg ua zoo ntau kawg rua kuv?

13. Kuv yuav nqaa lub taig xyeem ua tsaug rua txujkev dim, hab tuav Yawmsaub lub npe thov.

14. Kuv yuav pauj tej kws kuv yeem lug tseg rua Yawmsaub, taab meeg nwg haiv tuabneeg suavdawg.

15. Yawmsaub cov tuabneeg kws dawb huv ib tug tuag, yog ib qho luj rua ntawm Yawmsaub lub qhov muag.

16. Au Yawmsaub, kuv yog koj tug tub qhe, kuv yog koj tug tub qhe, yog koj tug nkauj qhev tug tub. Koj tub daws txuj saw hlau khi kuv lawm.

17. Kuv yuav ua kevcai xyeem ua tsaug koj, hab tuav Yawmsaub lub npe thov.

18. Kuv yuav pauj tej kws kuv yeem lug tseg rua Yawmsaub, taab meeg nwg haiv tuabneeg suavdawg,

19. rua huv Yawmsaub tej tshaav puam tuam tsev, huv plawv koj, Yeluxalee. Ca le qhuas Yawmsaub.