Phau Ntawv Nkauj - Đoạn 111

1. Ca le qhuas Yawmsaub. Kuv yuav ua Yawmsaub tsaug kawg kuv lub sab rua huv ib tsoom tuabneeg ncaaj nceeg kws tuaj txoos ua ke.

2. Tej num kws Yawmsaub ua mas luj kawg le, txhua tug kws txaus sab rua tej num hov yuav kawm hab xaav txug.

3. Yawmsaub tej num mas muaj koob meej hab fwjchim meej mom, hab nwg txujkev ncaaj nceeg nyob ruaj khov moog ib txhws.

4. Nwg ua kuas ncu ntsoov nwg tej num phemfwj, Yawmsaub muaj lub sab hlub sab khuvleej.

5. Nwg pub zaub mov rua cov kws fwm hab paub ntshai nwg, nwg pheej ncu ntsoov nwg tej lug cog tseg.

6. Nwg tub ua nwg tug fwjchim tshwm huv nwg teg num rua nwg cov tuabneeg pum, yog qhov kws nwg muab lwm haiv tuabneeg le tebchaws lug ua puab tug.

7. Yawmsaub teg num mas ncaaj nceeg hab muaj tseeb, txhua yaam kws nwg qha peb ua mas tso sab tau.

8. Tej lug qha hov nyob ruaj khov moog ib txhws tsw kawg. Tej lug hov mas nwg qha tseeb hab qha ncaaj.

9. Nwg txhwv nwg haiv tuabneeg dim, nwg has kuas tej lug kws nwg cog tseg nyob ruaj khov moog ib txhws. Nwg lub npe mas dawb huv hab txaus ntshai kawg.

10. Qhov kws fwm hab paub ntshai Yawmsaub mas yog lub hauv paug tswvyim. Cov kws xyum lawv nraim le ntawd yuav nkaag sab zoo. Nwg yuav tau lu lug qhuas ib txhws tsw kawg.