Phau Ntawv Nkauj - Đoạn 105

1. Ca le ua Yawmsaub tsaug, ca le thov hu nwg lub npe, ca le pav nwg teg num rua txhua haiv tuabneeg.

2. Ca le hu nkauj rua nwg, hu nkauj qhuas nwg, ca le pav txug txhua yaam num phemfwj kws nwg ua.

3. Ca le khaav txug nwg lub npe kws dawb huv, ca cov kws nrhav Yawmsaub zoo sab xyiv faab.

4. Ca le nrhav Yawmsaub hab nrhav nwg tug zug. Nrhav nwg lub xubndag tsw tu le.

5. Aplahaa kws yog Yawmsaub tug qhev tej caaj ceg 'e. hab Yakhauj cov tub ki kws Yawmsaub xaiv 'e, mej ca le ncu txug tej num phemfwj kws Yawmsaub tau ua, hab nwg tej txujci phemfwj hab tej lug kws nwg txav txem.

7. Nwg yog Yawmsaub, yog peb tug Vaajtswv. Nwg tej lug txav txem muaj nyob thoob plhawv huv nplajteb.

8. Nwg yeej ncu ntsoov nwg tej lug cog tseg moog ib txhws, yog tej lug kws nwg qha moog rua ib txheeb tam tuabneeg,

9. yog tej lug kws nwg cog tseg rua Aplahaa, hab yog tej kws nwg yeem lug cog twv rua Yiha,

10. yog tej kws Vaajtswv cog lug ruaj nreeg ca rua Yakhauj ua kaab ke, yog cog rua Yixayee ua lug cog tseg moog ib txhws, has tas,

11. “Kuv yuav pub lub tebchaws Khana‑aa rua koj, ua mej qub txeeg qub teg moog le.”

12. Thaus puab tseed tsw muaj tuabneeg coob, yeej yog tsawg tsawg le tag, puab tsuas yog lug ua qhua nyob xwb,

13. tswv moog tswv lug rua haiv tuabneeg nuav rua haiv tuabneeg u, rua lub tebchaws nuav rua lub tebchaws u.

14. Yawmsaub tsw kheev leejtwg quab yuam puab, vem saib rua puab nwg txhad txwv tej vaajntxwv has tas,

15. “Tsw xob kov tej kws kuv laub roj tsaa lawd hab tsw xob ua le caag rua kuv cov xwbfwb cev kuv lug.”

16. Thaus Vaajtswv ua kuas muaj kev tshaib nqhes lug rua lub tebchaws, hab ua puab tej mov noj tsw muaj taag,

17. nwg khaiv ib tug txwvneej ua puab ntej moog, yog Yauxej kws raug muab muag ua qhev.

18. Nwg txhais kwtaw raug saw hlau khi mob hloov ntshaav, nwg lub cej daab raug ib raab cuab hlau.

19. Yawmsaub tej lug tau swm nwg moog txug thaus tej kws nwg has txug tshwm tav taag.

20. Vaajntxwv Iyi khaiv tuabneeg moog tso nwg dim, tug kws kaav ib tsoom tuabneeg tso nwg dim nyob ywj pheej.

21. Vaajntxwv tsaa nwg ua tug num luj kws saib vaajntxwv lub tsev, hab ua tug kws kaav vaajntxwv txhua tsaav txhua yaam,

22. sub nwg txhad qha tau vaajntxwv cov thawj lawv le nwg lub sab nyam hab qha kev txawj ntse rua vaajntxwv cov kev txwj quas laug.

23. Mas Yixayee txhad tau lug rua huv Iyi tebchaws, Yakhauj txhad tau lug ua qhua nyob huv Haa lub tebchaws.

24. Yawmsaub ua rua nwg haiv tuabneeg fuam vaam coob, hab pub puab muaj zug heev dua puab tej tshawj chim.

25. Nwg ua rua cov Iyi lub sab tig rov ntxub Vaajtswv haiv tuabneeg, hab ua rua puab swv tswvyim phem rua Vaajtswv cov tub qhe.

26. Nwg khaiv Mauxe kws yog nwg tug qhev hab Aloo kws Vaajtswv xaiv ca.

27. Ob tug ua Vaajtswv tej txujci tseem ceeb tshwm rua huv puab, hab ua txujci phemfwj rua huv Haa lub tebchaws.

28. Nwg tso qhov tsaus ntuj lug ua rua lub tebchaws tsaus ntuj nti. Puab kwv tawv Vaajtswv tej lug.

29. Nwg txhad muab puab tej dej txa ua ntshaav, hab ua rua puab tej ntseg tuag taag.

30. Qaav nce tuaj coob coob puv nkaus lub tebchaws, muaj hlo rua huv vaajntxwv txhua chaav tsev.

31. Nwg has mas yoov ntsuab kuj yaa tsaus nti lug, hab muaj yoov qab thoob plhawv huv puab lub tebchaws.

32. Nwg tso lawg nyob naag chaw lug rua puab, hab ua tsag lig xub ci quas nplaag thoob plhawv huv puab lub tebchaws.

33. Nwg nplawm puab tej txwv maab txwv cua, hab nplawm puab tej ntoo huv lub tebchaws luv taag.

34. Nwg has xwb mas kooj ntaas yaa tuaj, kooj tshuab yaa tuaj coob suav tsw txheeb le,

35. tuaj noj tej zaub hab nroj tsuag huv lub tebchaws taag nrho, hab noj tej qoob loos huv tej teb.

36. Nwg muab puab tej tub hlub tua huvsw huv puab lub tebchaws, kws yog puab thawj tug zug.

37. Nwg coj cov Yixayee tawm moog, puab coj tau nyaj tau kub moog. Tsw muaj ib tug huv puab xeem dawm kev le.

38. Thaus puab ncaim moog lawm cov Iyi kuj zoo sab heev, vem yog puab ntshai quas rwg cov Yixayee.

39. Nwg muab tauv fuab lug roog puab hab nwg muab suavtawg ci rua puab pum kev mo ntuj.

40. Puab thov mas Vaajtswv coj noog ws lug hab pub mov sau ntuj nplua quas mag rua puab noj.

41. Nwg qheb qhov zeb mas dej txhawv ndwg lug, ndwg moog rua huv ntuj nraag teb do ib yaam nkaus le ib tug nam dej,

42. vem nwg ncu txug nwg tej lug cog tseg kws dawb huv hab nwg tug qhev Aplahaa.

43. Vaajtswv txhad le coj nwg haiv tuabneeg tawm moog ua xyiv faab hlo, coj cov kws nwg xaiv ca lawd moog hu nkauj quas qawg.

44. Nwg muab lwm haiv tuabneeg tej tebchaws pub rua puab, puab tau tej kws luas khwv tseg ua puab tug,

45. sub puab txhad le tuav rawv nwg tej kaab ke hab ua lawv le nwg txuj kevcai. Ca le qhuas Yawmsaub.