Phau Ntawv Nkauj - Đoạn 104

1. Kuv tug ntsuj plig 'e, ca le qhuas Yawmsaub. Au kuv tug Vaajtswv Yawmsaub, koj luj kawg nkaus. Koj muab koob meej hab fwjchim meej mom lug naav.

2. Koj muab qhov kaaj lug npua ib yaam le naav tsho, koj nthuav lub ntuj ib yaam le nthuav lub tsev ntaub.

3. Koj khaum laag ua koj lub chaw nyob rua txheej sau cov dej naag, koj muab fuab ua tsheb rua koj caij, koj caij tej cua le kauj tis.

4. Koj khaiv tej cua ua koj le tub xaa xuv, koj swv tej nplaim tawg ci laim lag ua koj cov qhev.

5. Koj txawb lub nplajteb rua sau tej taw tag, txhad tsw ua zug ib txhws le.

6. Koj muab dej tub tub lug laum nkaus nwg yaam le naav tsoog, tej dej nyob sau tej roob.

7. Thaus koj nthe nqho, dej ca le ndwg ceev, thaus nov koj lub suab xub nthe, dej ca le tswv.

8. Tej dej ndwg sau tej roob nqeg lug rua tej haav, moog rua lub chaw kws koj tu ca rua dej teev.

9. Koj tu nrwm tsw kheev dej hlaa dhau, sub txhad tsw nyaab sau lub nplajteb dua le lawm.

10. Koj ua hauv dej txhawv ndwg rua huv tej haav, tej dej txhad ndwg lawv tej kwj haa,

11. pub rua tej tsaj qus huvsw huv haav zoov tau haus, tej neeg luav qus kuj tau haus daws nqhes.

12. Ntawm tej ntug dej tej noog sau nruab ntug tau ua zeg nyob, hab quaj zum zawg sau tej ceg ntoo.

13. Koj nyob sau koj tej chaw sab ywg dej rua sau tej roob, lub nplajteb txhad tsau npo tej num kws koj ua.

14. Koj ua rua nroj tsuag tuaj rua tej tsaj txhu tau noj, hab ua tej zaub tuaj rua tuabneeg tu sub puab txhad ua tau zaub noj tuaj huv lub nplajteb,

15. hab ua tau cawv txwv maab kws ua rua tuabneeg zoo sab, hab ua tau roj aulib kws ua rua puab ntsej muag ci, hab ua tej ncuav kws txhawb tuabneeg lub sab muaj zug.

16. Yawmsaub tej ntoo tau dej tsau npo, yog cov ntoo cab huv Lenpanoo kws nwg cog ca.

17. Tej noog ua zeg rua sau tej ntoo hov, tej us dej ua chaw nyob rua sau tej ntoo thuv.

18. Tej roob sab yog sai le chaw nyob, tej roob tsua yog tej ntxwm tsua le chaw nkaum.

19. Koj tswm lub hli lug suav caij suav nyoog. Lub nub kuj paub lub swjhawm kws yuav poob qho.

20. Koj ua rua muaj qhov tsaus hab yog mo ntuj, mas tej tsaj qus huvsw huv haav zoov nkaag tawm tuaj.

21. Tej thaav tsuv ntxhuav nyooj lawg nrhav nqaj tum, hab nrhav noj ntawm Vaajtswv.

22. Thaus nub tawm puab kuj moog lawm, moog pw rua huv puab tej chaw nkaum.

23. Tuabneeg kuj tawm moog ua daag num, moog ua num khwv txug tsaus ntuj.

24. Au Yawmsaub, tej kws koj ua lug lawd ntau kawg nkaus le. Koj muaj tswvyim tswm tej hov huvsw. Lub nplajteb puv nkaus tej kws koj tswm.

25. Tim u muaj havtxwv luj hab daav, muaj tsaj nruab deg yaa laim quas txag suav tsw txheeb nyob huv, muaj tej tsaj luj tsaj miv huvsw.

26. Tej nkoj txwg moog lug sau nplaim dej, hab muaj nam tsaj Levi‑athaa kws koj tswm ca kuas ua sw hov ntawd.

27. Tej tsaj hov huvsw tsaa muag saib koj, vaam koj pub puab tau noj lawv swjhawm.

28. Thaus koj pub lawd puab kuj khaws ca, thaus koj cev teg, puab kuj tau noj tej kws zoo tsau npo.

29. Thaus koj fee plhu lawd, puab kuj poob sab nthaav, thaus koj muab puab tej paa rhu lawm, puab kuj tuag hab rov moog ua moov aav.

30. Thaus koj tso koj tug ntsuj plig moog, puab kuj raug muab tswm, hab koj tswm txhua yaam sau lub nplajteb dua tshab.

31. Thov Yawmsaub tug fwjchim ci ntsaa ab nyob moog ib txhws, thov Yawmsaub zoo sab xyiv faab rua tej kws nwg tswm lug.

32. Thaus nwg tsaa muag saib lub nplajteb, lub nplajteb kuj tseeg quas nkawg, nwg kov tej roob, tej roob kuj nchu paa tuaj.

33. Kuv muaj txujsa nyob ntev le caag, kuv yuav hu nkauj rua Yawmsaub moog le, kuv yuav hu nkauj qhuas kuv tug Vaajtswv rua thaus kuv tseed caj sa nyob.

34. Thov ca tej kws kuv xaav nuav hum nwg lub sab, tsua qhov kuv xyiv faab rua huv Yawmsaub.

35. Thov ca cov tuabneeg muaj txem raug muab ntxuav tseg huv lub nplajteb, thov ca tej tuabneeg limham pluj taag moog. Kuv tug ntsuj plig 'e, ca le qhuas Yawmsaub, ca le qhuas Yawmsaub lauj!