Phau Ntawv Nkauj - Đoạn 103

1. Kuv tug ntsuj plig 'e, ca le qhuas Yawmsaub, kuv lub sab lub ntsws, ca le qhuas nwg lub npe kws dawb huv.

2. Kuv tug ntsuj plig 'e, ca le qhuas Yawmsaub, hab tsw xob nov qaab nwg tej txaj ntswg huvsw.

3. Nwg yog tug kws zaam koj tej kev txhum huvsw, hab khu koj tej mob kuas zoo huvsw.

4. Nwg txhwv koj txujsa dim huv qhov tuag, hab muab txujkev hlub kws ruaj khov hab txujkev khuvleej rua koj ntoo.

5. Nwg pub tej yaam zoo txaus nkaus koj lub sab moog taag koj swm neej, koj txhad rov muaj lub neej hluas zoo le tug daav.

6. Yawmsaub tsaa txhua tug kws raug quab yuam txujcai, hab tu plaub ncaaj rua puab.

7. Nwg qha nwg tej kev rua Mauxe paub, hab qha nwg tej num rua cov Yixayee pum.

8. Yawmsaub muaj sab khuvleej hab muaj kev hlub, nwg tsw chim sai, nwg muaj txujkev hlub ruaj khov nplua mag,

9. Nwg yuav tsw tshev moog le, nwg yuav tsw chim moog ib txhws.

10. Nwg tsw ua rua peb lawv le peb lub txem, lossws pauj taub rua peb lawv le peb tej kev txhum.

11. Lub ntuj nyob sab sau lub nplajteb npaum le caag, nwg txujkev hlub ruaj khov muaj rua cov kws paub ntshai nwg sab npaum le ntawd.

12. Nub tuaj nyob deb nub poob npaum le caag, nwg daws peb tej kev faav xeeb pov tseg deb npaum le ntawd.

13. Leejtxwv khuvleej nwg tej mivnyuas le caag, Yawmsaub khuvleej cov kws fwm hab paub ntshai nwg ib yaam le ntawd.

14. Tsua qhov nwg paub tas peb raug tswm lug le caag, nwg ncu ntsoov tas peb yog moov aav xwb.

15. Tuabneeg lub noob nyoog zoo ib yaam le tej nroj tsuag, kws tuaj hlub mog nyoos zoo le tej paaj nroj huv teb.

16. Cua ntsawj dhau lawm tes txawm pluj taag, nwg lub chaw tub tsw paub nwg lawm.

17. Tassws Yawmsaub txujkev hlub ruaj khov muaj nyob ib txhws thau u lug tsw txawj kawg rua cov kws fwm hab paub ntshai nwg, hab nwg txujkev ncaaj nceeg muaj rua puab tej xeeb ntxwv moog le,

18. yog cov kws tuav rawv nwg tej lug cog tseg hab ncu ntsoov ua lawv le nwg tej lug nkaw.

19. Yawmsaub tsaa nwg lub zwm txwv nyob ruaj sau ntuj, nwg ua vaajntxwv kaav txhua yaam huvsw.

20. Mej cov kws yog nwg cov tubkhai ntuj 'e, mej cov kws sab luj sab tuab hab ua lawv le nwg tej lug, hab noog nwg lub suab kws nwg has, mej ca le qhuas Yawmsaub.

21. Nwg cov tuabneeg suavdawg 'e, mej cov kws ua koom rua nwg hab ua lawv le nwg lub sab, ca le qhuas Yawmsaub.

22. Txhua yaam kws nwg tswm lug lawd thoob txhua qhov kws nwg kaav, ca le qhuas Yawmsaub. Kuv tug ntsuj plig 'e, ca le qhuas Yawmsaub.