Phau Ntawv Nkauj - Đoạn 10

1. Au Yawmsaub, ua caag koj yuav nyob deb heev? Ua caag koj tswv nraim thaus peb raug kev ceblaaj?

2. Tug tuabneeg limham khaav quas ntxhas lawv caum cov pluag. Thov ca nwg rov maag tej tswvyim phem kws nwg npaaj rua luas.

3. Tug tuabneeg limham khaav txug tej kws nwg lub sab ntshaw, tug tuabneeg sab hlub tshev foom hab thuaj Yawmsaub.

4. Tug tuabneeg limham lub sab khaav theeb tsw nrhav Vaajtswv, nwg tsuas xaav has tas, “Tsw muaj Vaajtswv le.”

5. Nwg tej num vaam meej rua txhua lub swjhawm. Koj txujkev txav txem nyob sab dhau, nwg lub qhov muag tsw pum le, nwg tsuas yog thuaj luag nwg cov tshawj chim suavdawg.

6. Nwg xaav huv lub sab tas, “Yuav tsw muaj daabtsw ua rua kuv qaug quas zwg. Moog taag txhua tam kuv yuav tsw raug kev ceblaaj txom nyem le.”

7. Tej lug tsawm foom, tej lug daag ntxag hab tej lug quab yuam puv nkaus nwg lub qhov ncauj, tej kev limham hab tej kev txhum nyob ntawm nwg tug nplaig.

8. Nwg zuv kev tog huv tej zej zog, hab nraim cev tua tej tuabneeg tsw txhum. Nwg lub qhov muag nrhav quas nrhw cov kws tsw muaj chaw vaam khom.

9. Nwg tswv nraim tog ib yaam le tsuv ntxhuav nyob huv lub chaw nraim, nwg zuv tog txhad nteg tau cov tuabneeg pluag, nwg xuas lub vaag cuab tau cov tuabneeg txom nyem nqug moog.

10. Cov kws tsw muaj chaw vaam khom raug tsuj yuam hab qaug, puab qaug rua huv nwg tug zug.

11. Nwg xaav huv lub sab tas, “Vaajtswv nov qaab lawm, nwg fee plhu lawm hab yuav tsw pum hlo le.”

12. Au Yawmsaub, ca le sawv tseeg, au Vaajtswv, ca le tsaa koj txhais teg, thov tsw xob nov qaab tug kws raug kev txom nyem nyuaj sab.

13. Ua caag tug tuabneeg phem thuaj Vaajtswv, hab has huv lub sab tas, “Koj yuav tsw rob ntawm kuv”?

14. Koj kuj pum ntaag hab yeej saib ntsoov tej kev txom nyem hab tej kev kub ntxhuv, sub koj txhad tuav rawv tau rua huv koj txhais teg. Tug kws tsw muaj chaw vaam khom muab nwg tug kheej cob rua koj. Koj yog tug kws paab cov mivnyuas ntsuag tsw muaj txwv.

15. Thov koj luv tug tuabneeg limham hab tug kws ua phem txhais npaab, hab tshawb tej kev limham kws puab ua tawm lug kuas taag huvsw.

16. Yawmsaub yog vaajntxwv kws nyob moog ib txhws tsw kawg. Lwm haiv tuabneeg yuav puam tsuaj taag huv nwg lub tebchaws moog.

17. Au Yawmsaub, koj yuav mob sab rua cov tuabneeg kws tsw muab hlub txujkev ntshaw, koj yuav txhawb puab lub sab tug zug hab tig ntsej noog puab tej lug,

18. txhad tsaa tau cov mivnyuas kws tsw muaj txwv hab cov kws raug quab yuam txujcai, sub tej tuabneeg nplajteb txhad tsw ua rua puab ntshai dua le lawm.