Xefaniyas - Đoạn 3

1. Lub nroog Yeluxalee kws faav xeeb rua Yawmsaub ua phem ua qas quab yuam nwg cov tuabneeg yuav raug txom nyem lauj!

2. Nwg tsw noog leejtwg has, tsw yuav leejtwg nplawm hab qhuab qha. Nwg tsw tso sab rua Yawmsaub hab nwg tsw txaav lug ze nwg tug Vaajtswv.

3. Cov num tswv huv lub nroog nuav yog cov tsuv ntxhuav kws nyooj quas lawg. Cov kws tu plaub kuj yog cov maa kws nrhav noj mo ntuj tsw kaam tseg ib qho nqaj ca txug kaaj ntug.

4. Nwg cov xwbfwb cev Yawmsaub lug yog tuabneeg loj leeb tuabneeg faav xeeb. Cov pov thawj kuj muab tej kws dawb huv rua Yawmsaub ua qas tsw huv, hab puab txhob txwm tsw ua lawv le Yawmsaub kevcai.

5. Yawmsaub kws nyob huv lub nroog nuav mas ncaaj nceeg, nwg tsw ua ib qho txhum le. Txhua taagkig Yawmsaub txav cai ncaaj, nwg ua le ntawd rua txhua nub kaaj tsw tu le, tassws tej tuabneeg kws ua tsw ncaaj tsw paub txaaj muag le.

6. “Kuv tub muab tej tebchaws rhuav tshem taag, ua rua puab tej chaw zuv khuav sau tej ntsaa loog pob taag lawm. Kuv ua kuas tej kev huv lub nroog hov pob taag nyob do cuas tsw muaj tuabneeg taug, hab kuv tub ua rua puab tej moos nyob do cuas tsw muaj tuabneeg, tsw muaj ib tug nyob huv puab lawm.

7. Kuv has tas ‘Lub nroog hov yeej yuav ntshai hab fwm kuv xwb, hab yuav noog kuv tej lug qhuab ntuag. Nwg yuav tsw muab kuv tej lug qhuab lug qha pov tseg.’ Tassws puab yimfuab swv zug ua txhua yaam kuas phem kuas qas.”

8. Yawmsaub has tas, “Vem le nuav mej ca le nyob tog kuv, tog nub kws kuv sawv tseeg ua timkhawv. Kuv tub npaaj sab ca lawm tas kuv yuav sau zog ib tsoom tuabneeg hab txhua lub tebchaws tuaj ua ke, kuv yuav nchuav kuv txujkev chim kws npau tawg ceev kawg lug rua sau puab suavdawg. Qhov kws kuv khib xeeb hab npau tawg yuav hlawv ib puas tsaav yaam huv qaab ntuj nuav huvsw pov tseg.

9. “Thaus hov kuv yuav muab ib tsoom tuabneeg tug nplaig hloov kuas puab tau tug nplaig dawb nplaig huv, sub suavdawg txhad le txawj hu thov Yawmsaub lub npe hab txawj ua ib lub sab ua koom rua nwg.

10. Kuv cov tuabneeg kws thov kuv, cov kws raug muab lawv tswv ua saab ua sua lawm, puab yuav coj hov txhua chaw hlaa nam dej huv Khuj tebchaws tuaj xyeem rua kuv.

11. Nub ntawd mej yuav tsw raug txaaj muag tsua qhov kws mej ua phem faav xeeb rua kuv, vem lub swjhawm hov kuv yuav muab cov kws khaav theeb tuam mom rhu tawm huv mej moog, mas mej yuav tsw tshoob hawb rua sau kuv lub roob dawb huv dua le lawm.

12. Kuv yuav tseg cov kws tsw muab hlub, cov kws txu lub sab rua huv plawv mej. Puab yuav nrhav chaw nraim cev rua huv Yawmsaub lub npe.

13. Cov tuabneeg kws tshuav nyob huv cov Yixayee mas puab yuav tsw ua txhum hab tsw has tej lug pem txwv, yuav nrhav tsw tau ib tug nplaig daag huv puab tej qhov ncauj hlo le. Puab yuav noj yuav haus pw tso sab quas lug, tsw muaj leejtwg yuav ua rua puab ntshai.”

14. Xi‑oo tug ntxhais 'e, ca le hu nkauj. Cov Yixayee 'e, ca le qw nrov. Yeluxalee tug ntxhais 'e, ca le zoo sab xyiv faab quas hlo.

15. Yawmsaub tub tseg tsw rau txem rua mej lawm. Nwg tub ntab mej cov yeeb ncuab tawm tswv taag lawm. Yawmsaub kws yog cov Yixayee tug vaajntxwv nyob huv plawv mej mas mej yuav tsw ntshai tej xwm txheej phem dua le lawm.

16. Nub hov luas yuav has rua Yeluxalee tas, “Xi‑oo 'e, koj tsw xob ntshai, koj tsw xob ca koj txhais teg tsaug leeg le.

17. Yawmsaub kws yog mej tug Vaajtswv tub nyob huv plawv mej, nwg yog tug kws txawj ntaus rog paab tau mej kov yeej. Nwg yuav zoo sab kawg le rua mej hab nwg yuav muab mej tswm dua tshab vem yog nwg hlub mej kawg le. Nwg yuav hu nkauj zoo sab xyiv faab kawg le rua mej,

18. yaam nkaus le thaus mej ua kevcai noj haus.” “Kuv yuav tshem tej vej sub vej sw ntawm mej moog sub mej txhad tsw raug luas thuaj luag.

19. Txug thaus hov kuv yuav rau txem rua txhua tug kws quab yuam mej. Kuv yuav cawm cov kws ceg tawv, hab kuv yuav qaws cov tuabneeg kws tawg tswv ua saab ua sua lawd rov lug hab kuv yuav muab puab tej kev poob ntsej muag ntxeev ua kuas luas qhuas hab tau koob meej nrov nchaa thoob nplajteb.

20. Thaus ntawd kuv yuav qaws mej suavdawg lug ua ke coj mej lug nyob rua huv mej qub vaag qub tse. Kuv yuav ua kuas mej rov tau koob meej hab ib tsoom tuabneeg huv qaab ntuj yuav qhuas mej, yog thaus kws kuv pub mej rov vaam meej le qub. Mej qhov muag yeej yuav pum ntaag.” Yawmsaub has le nuav ntaag.