Hauxeyas - Đoạn 13

1. Thaus Efa‑i has lug, luas tej tshee quas nyo, mas nwg tau koob meej luj rua huv cov Yixayee, tassws nwg teev daab Npa‑aa txhad muaj txem hab tuag.

2. Nwgnuav puab tseed ua txhum ntau quas zug tuaj, hab puab nchuav txoov daab rua puab pe, yog tej txoov daab nyaj kws puab swv puab tug tswvyim ua, txhua tug yog tej Kws nyaj le num. Puab has tas, “Ca le xyeem tsaj rua tej txoov daab nuav.” Tuabneeg nwj tej txoov daab thaav nyuj lawm lauj!

3. Vem le nuav puab yuav zoo yaam le tej fuab pw haav thaus taagkig, hab zoo le tej dej lwg kws pluj taag thaus sawv ntxuv, hab zoo le tej npluag qoob kws cua ntsawj yaa taag huv lub tshaav moog, hab zoo le tej paa nchu kws tawm huv lub qhov tsev.

4. “Kuv yog Yawmsaub, yog mej tug Vaajtswv txwj thaus nyob huv Iyi tebchaws lug. Mej tsw paub lwm tug timtswv tsuas yog paub kuv xwb, dhau kuv lawm tsw muaj dua ib tug cawmseej le.

5. Kuv yog tug kws saib mej huv tebchaws moj saab qhua, yog lub tebchaws kws tsw muaj dej haus.

6. Thaus kuv pub rua puab noj, puab tau noj tsau. Thaus puab noj tsau npo lawm, puab lub sab txawm khaav theeb hab nov qaab kuv lawm.

7. Yog le nuav kuv yuav ua le tug tsuv ntxhuav rua puab, kuv yuav zuv kev tog puab yaam le tug tsuv pom txwv.

8. Kuv yuav mos puab yaam le tug maum dais kws cov mivnyuas pluj lawm, kuv yuav dua puab lub hauv nrob, hab yuav muab puab noj rua hov ntawd ib yaam le tsuv ntxhuav hab yaam le tsaj qus dua puab.

9. “Cov Yixayee 'e, kuv yuav ua kuas mej puam tsuaj. Leejtwg yuav paab tau mej?

10. Nwgnuav mej tug vaajntxwv nyob hovtwg kws yuav lug cawm mej? Mej cov thawj huv mej txhua lub moos dua twg taag lawm? Puab yog cov kws mej has tas, ‘Thov tsaa ib tug vaajntxwv hab cov thawj lug kaav peb.’

11. Vem yog kuv chim kuv txhad pub mej muaj vaajntxwv. Vem yog kuv npau tawg kuv txhad muab tej vaajntxwv coj moog.

12. Efa‑i tej kev txhum tub muab qhwv ca lawm, nwg lub txem muab khaws ca lawm.

13. Tub ua mob teb txug caij yug nwg lawm tassws nwg yog mivnyuas tsw paub taab, tsua qhov nwg tsw kaam tawm huv plaab lug lawv le lub caij.

14. Kuv yuav txhwv puab dim huv tub tuag teb le fwjchim lov? Kuv yuav txhwv puab dim huv txujkev tuag lov? Txujkev tuag 'e, koj tej swv npug dua twg lawm? Tub tuag teb 'e, koj tej vej sub vej sw dua twg lawm? “Kuv lub qhov muag tsw taab ncuab lawm.

15. Txawm yog Efa‑i hlub zoo rua huv plawv nwg cov kwvtij, los tej cua saab nub tuaj yuav tuaj ntawm Yawmsaub tuaj, hab ntsawj huv tebchaws moj saab qhua tuaj. Efa‑i lub qhov dej txhawv yuav qhuav hab nwg lub hauv dej cag yuav qhuav qhawv. Tej cua hov yuav nplawm tej hov txhua chaw tswm txaj huvsw huv nwg tej txhaab yaa du quas lug moog.

16. Xamali yuav rws nwg lub txem vem yog nwg faav xeeb rua nwg tug Vaajtswv. Puab yuav raug nav ntaaj tuag taag. Puab tej mivnyuas mog yuav raug muab ntsawm nduag dha ua tej dwb daim. Puab tej quaspuj kws suab mivnyuas yuav raug muab phua plaab.”