Xalumoos Tej Nkauj - Đoạn 3

1. Thaus tsaus ntuj kws kuv pw sau txaaj, kuv nrhav tug kws kuv lub sab nyam, kuv nrhav nwg tassws nrhav tsw tau.

2. Kuv yuav sawv tseeg moog thoob plawg huv lub nroog, moog huv tej kev hab huv tej tshaav puam, kuv yuav nrhav tug kws kuv lub sab nyam. Kuv nrhav nwg tassws nrhav tsw tau.

3. Cov kws faaj xwm ntswb kuv rua thaus puab saamswm taug kev huv lub nroog. Kuv nug puab tas, “Mej pum tug kws kuv lub sab nyam los tsw pum?”

4. Thaus kuv hlaa dhau puab mivntswv lawm, kuv ntswb nwg, yog tug kws kuv lub sab nyam. Kuv ntsab nkaus nwg tsw kaam tso nwg moog le, moog txug thaus kuv coj nwg lug rua huv kuv nam lub tsev, hab nkaag rua huv tug kws xeeb kuv lub txaaj.

5. Yeluxalee tej ntxhais 'e, thov mej twv rua tej kauv seb hab tej xyuas muas lwj has tas mej yuav tsw tshaum tsw tsaa kuas ib txujkev sws hlub tswm raag moog txug thaus txaus sab tsaiv.

6. Leejtwg tawm huv tebchaws moj saab qhua tuaj zoo yaam le ib twv paa nchu kws muaj roj tsw qaab hab roj ntoos tsw qaab tsw quas lawg tuaj, yog txhua yaam moov tsw qaab kws tub laag tub luam xaa tuaj?

7. Saib maj, yog Xalaumoo lub zwm txwv. Muaj rau caum leej tub rog kws sab tuab vej quas vog, yog Yixayee cov tub rog kws sab luj sab tuab.

8. Puab coj ntaaj hab puab txawj ntaus rog, puab txhua tug rws ntaaj ntawm duav faaj seeb xwm txheej thaus tsaus ntuj.

9. Vaajntxwv Xalaumoo muab tej ntoo peg Lenpanoo ua lub zwm txwv.

10. Nwg muab nyaj ua ncej zwm txwv, hab muab kub ua daim txag pheeb hab muab ntaub yimlaaj pua daim txag rooj nyob. Lub zwm txwv saab huv yog Yeluxalee tej ntxhais muab tawv tsaj ua.

11. Xi‑oo tej ntxhais 'e, ca le tawm moog saib vaajntxwv Xalaumoo, nwg ntoo lub mom kub kws nwg nam muab looj rua nwg taubhau rua nub kws nwg ua tshoob, yog nub kws nwg zoo sab xyiv faab kawg.