Nahus - Đoạn 3

1. Lub nroog kws lu ntshaav raug txom nyem lauj! Yog lub nroog muaj kev daag hab muaj tej hov txhua chaw kws txeeb tau puv nkaus huv, tsuas yog moog lws luas tsw tseg tsw tu le xwb.

2. Noog saib, suab paas nplawm neeg nrov quas nplab, suab tsheb neeg nrov dig quas dawg, neeg dha noj tuam pwm, tsheb neeg dha yaa quas ntxag.

3. Cov tub rog caij neeg dha npoj quas log ceev kawg le, nav ntaaj ci quas nplaag, hauv muv ci quas npuaj. Tuabneeg raug tua coob kawg, cev tuag tej nam pawg, cev tuag suav tsw txheeb, puab dawm tej cev tuag.

4. Qhov nuav yog vem Ninave ua nam puj muag cev tsw txawj pov khawv le, nwg zoo nkauj ntxwm sab txawj haub txawj ntxag txawj ua khawv koob rua luas qaug sab tuag rua nwg teg. Nwg muab nwg lub cev muag ntxag tau ib tsoom tebchaws hab ua khawv koob ntxag tau ib tsoom tuabneeg ua qhev.

5. Yawmsaub kws muaj fwjchim luj kawg nkaus has tas, “Saib maj, kuv tawm tsaam koj. Kuv yuav yaws koj daim tab moog npug nkaus koj lub ntsej muag, kuv yuav ca ib tsoom tuabneeg saib koj lab qaab, kuv yuav ca ib tsoom tebchaws saib koj chaw txaaj muag.

6. Kuv yuav muab tej nam kua lwj qas quas ntsuav laim rua koj. Kuv yuav saib tsw taug koj hab ua rua suavdawg thuaj koj.

7. Txhua tug kws pum koj yuav ca le nkaum zog tswv rov qaab. Puab yuav has tas, ‘Lub nroog Ninave puam tsuaj taag do quas cuas le lawm. Leejtwg yuav quaj ntsuag nwg? Yuav nrhav leejtwg hovtwg tuaj nplig tau nwg?’ ”

8. Koj tseed zoo dua lub moos Thenpe kws nyob ntawm tug nam dej Nai lov? Muaj dej vej lub moos hov, hab muaj dej havtxwv thaiv quas saab nrau, hab muaj dej thaiv ua ntsaa loog.

9. Khuj tebchaws hab Iyi tebchaws yog nwg le zug luj kawg tsw txawj taag. Phuj tebchaws hab Linpia tebchaws kuj paab nwg hab.

10. Txawm yog le hov los nwg tseed raug muab kuav hlo moog poob tebchaws lawm. Nwg tej mivnyuas kuj raug muab ntsawm ntsoog taag rua txhua txuj ncauj kev. Puab muab cov kws muaj meej huv lub moos hov rhu ntawv saib leejtwg tau tug twg, cov kws ua hlub puavleej raug muab saw hlau khi.

11. Ninave, koj yuav qaug cawv ua tug nam vwm loj vwm leg feeb tsw meej hlo le. Koj yuav moog nrhav chaw cawm sav kuas dim koj cov yeeb ncuab.

12. Koj tej chaw ruaj khov txhua lub zoo le tsob txwv cua kws txwv sav thawj phaum, yog daj mas cov txwv yuav zeeg rua huv tug kws noj lub qhov ncauj.

13. Saib maj, koj cov tub rog huv plawv mej tsuas zoo le tej nam quaspuj xwb. Koj tej rooj loog tub qheb quas lug rua koj cov yeeb ncuab. Suavtawg tub kub koj tej laag rooj taag lawm.

14. Ca le nqaa dej lug ca, vem yeeb ncuab yuav tuaj vej. Khu koj tej chaw zuv khuav kuas ruaj khov. Ca le nqeg plhawv rua huv nam qhov aav nplaum tuav kag aav nplaum, coj lub daab thwv cib tuaj.

15. Tassws suavtawg yuav kub koj hov ntawd hab nav ntaaj nav rag yuav txav koj yuav noj koj yaam nkaus le mivnyuas kooj ntaas noj. Ca le fuam vaam coob le kooj txwg, ca le fuam vaam coob le kooj ntaas.

16. Koj cov tub laag tub luam fuam vaam coob yaam nkaus le tej nub qub sau nruab ntug. Puab zoo yaam le tej kooj ntaas kws noj nroj tsuag taag es nthuav tis hlo yaa pluj plag lawm.

17. Koj cov thawj zoo nkaus le cov kooj ntaas, koj cov num tswv zoo nkaus le ib npoj kooj ntaas kws thaus tseed no tes dai ntawm tej ntsaa laj kaab, thaus nub tuaj lawd tes yaa taag nrho lawm tsw muaj leejtwg paub tas dua hovtwg lawm.

18. Cov Axilia tug vaajntxwv 'e, koj cov tuabneeg yug yaaj tub tsaug zug lawm, koj cov thawj tub moog ncaws daab ndub lawm. Koj cov pejxeem tawg ua saab ua sua rua peg tej roob, tsw muaj leejtwg qaws tau puab lug.

19. Koj qhov mob tsw ntaug hlo le, koj qhov kav txhaab mas saab kawg le khu tsw tau. Txhua tug kws tau nov koj lub moo mas yuav npuaj teg luag koj. Muaj leejtwg txeev dim tau ntawm koj txujkev tswm txom kws tsw txawj taag le?