Mikhas - Đoạn 5

1. Cov tub rog huv lub nroog 'e, ca le npaaj mej cov tub rog. Yeeb ncuab tub tuaj vej peb lawm, puab xuas paas ntoo ntaus cov Yixayee tug thawj saab plhu.

2. “Au Npelehee Efatha 'e, koj yog ib tug miv miv huv Yuta tej cum, yuav muaj ib tug tshwm huv koj lug rua kuv, yog tug kws yuav ua tug thawj kaav cov Yixayee. Nwg lub hauv paug yeej muaj thaus chiv keeb thau u lug.”

3. Vem le nuav Yawmsaub yuav muab puab tso tseg moog txug lub swjhawm kws tug quaspuj ua mob teb yug mivnyuas lawm, mas nwg cov kwvtij kws tseed tshuav nyob yuav rov lug rua huv cov Yixayee.

4. Tug hov yuav sawv ruaj khov hab muaj Yawmsaub tug zug hab muaj nwg tug Vaajtswv Yawmsaub lub koob meej kws ci ntsaa ab yug nwg paab yaaj. Puab yuav nyob tso sab plhuav tsua qhov tug hov yuav ua luj moog thoob qaab ntuj kawg,

5. hab nwg yuav ua puab lub chaw nyob kaaj sab lug. Thaus cov Axilia tuaj txeem rua huv peb lub tebchaws hab tsuj peb tej chaw ruaj khov, peb yuav tsaa xyaa tug yug yaaj hab tsaa yim tug thawj tawm tsaam puab.

6. Puab yuav xuas ntaaj kaav Axilia tebchaws, hab rhu ntaaj kaav Nilauj tebchaws. Thaus cov Axilia tuaj txeem rua huv peb lub tebchaws hab tsuj huv peb nrwm teb, tug hov yuav tso peb dim.

7. Yakhauj caaj ceg kws tseed tshuav nyob yuav nyob rua huv plawv ntau haiv tuabneeg zoo yaam le dej lwg ntawm Yawmsaub hab zoo le pluav naag kws lug rua sau tej nroj tsuag hab tsw nyob ntawm tuabneeg lossws tog tuabneeg tej tub.

8. Yakhauj caaj ceg kws tseed tshuav yuav nyob huv plawv ib tsoom tebchaws hab huv plawv ntau haiv tuabneeg yaam le tug tsuv ntxhuav nyob huv plawv tej tsaj qus huv haav zoov, lossws yaam le tug thaav tsuv ntxhuav kws nyob huv plawv tej yaaj, thaus nwg hlaa moog nwg tsuj pis ntag hab muab dua tseg, tsw muaj leejtwg cawm tau.

9. Mej txhais teg yuav raug muab tsaa rua sau mej cov tshawj chim, hab mej cov yeeb ncuab huvsw yuav raug muab txav tu nrho.

10. Yawmsaub has tas, “Nub ntawd kuv yuav muab mej tej neeg ua kuas pluj taag huv plawv mej moog, hab muab mej tej tsheb neeg ua rog ua puam tsuaj taag.

11. Kuv yuav muab tej moos huv mej lub tebchaws rhuav tshem taag, hab rhuav mej tej chaw ruaj khov pob taag huvsw.

12. Kuv yuav muab qhov kws ua khawv koob rhuav tshem taag ntawm mej txhais teg, mej yuav tsw muaj txwv neeb txwv yaig dua le lawm.

13. Kuv yuav rhuav mej tej txoov daab hab mej tej ncej teev daab kuas pluj ntawm mej moog, hab mej yuav tsw tau pe tej kws mej txhais teg ua dua le lawm.

14. Kuv yuav rhu hlo mej tej ncej daab Asela huv plawv mej pov tseg, hab ua rua mej tej moos puam tsuaj.

15. Kuv yuav chim hab pauj taub npau tawg quas vog rua tej tebchaws kws tsw noog lug.”