Mikhas - Đoạn 4

1. Yaav tom hauv ntej yuav muaj le nuav, lub roob kws muaj Yawmsaub lub tuam tsev yuav raug muab tsaa ua lub roob kws sab dhau tej, hab yuav raug txhawb nqaa sab dua tej pov roob, mas ib tsoom tuabneeg yuav ndwg quas lawg rua hov ntawd.

2. Ntau haiv tuabneeg yuav tuaj has tas, “Ca le lug, ca peb nce moog rua sau Yawmsaub lub roob, moog rua huv Yakhauj tug Vaajtswv lub tuam tsev, mas nwg yuav qha nwg txujkev rua peb, sub peb txhad taug tau nwg txujkev.” Tsua qhov txuj kevcai yuav tawm huv Xi‑oo lug hab Yawmsaub txujlug yuav tawm huv Yeluxalee lug.

3. Nwg yuav phua cai rua ntau haiv tuabneeg, hab nwg yuav tu plaub rua tej tebchaws muaj zug kws nyob deb, Puab yuav muab puab tej ntaaj rag ntaus ua khais laij teb, hab muab puab tej muv ntaus ua lag. Ib lub tebchaws yuav tsw rhu ntaaj ua tsuv ua rog rua ib lub tebchaws, puab yuav tsw kawm txujci ua tsuv ua rog dua le lawm.

4. Nyag yuav nyob tsawg huv qaab nyag tsob txwv maab hab huv qaab nyag tsob txwv cua, hab tsw muaj leejtwg yuav ua rua puab ntshai, vem Yawmsaub kws muaj fwjchim luj kawg nkaus lub qhov ncauj has ca le nuav lawm.

5. Ib tsoom tuabneeg suavdawg nyag tuav nyag tug timtswv lub npe ua neej, tassws peb yuav tuav Yawmsaub kws yog peb tug Vaajtswv lub npe ua neej moog ib txhws tsw kawg.

6. Yawmsaub has tas, “Nub ntawd kuv yuav sau zog cov tuabneeg ceg tawv, hab qaws cov kws raug muab ntab tawm moog hab cov kws kuv ua rua raug kev txom nyem nyuaj sab rov lug ua ke.

7. Cov kws ceg tawv kuv yuav xaiv tseg ca nyob, cov kws raug muab tso tseg lawd kuv yuav muab ua lub tebchaws kws muaj zug. Hab Yawmsaub yuav kaav puab rua sau lub roob Xi‑oo, txwj nwgnuav moog ib txhab ib txhws.

8. Lub chaw tsom faaj kws zuv paab yaaj 'e, lub pov roob Xi‑oo tug ntxhais 'e, koj yuav rov tau fwjchim kaav tebchaws le qub, yog lub tebchaws kws Yeluxalee tug ntxhais txeev kaav.”

9. Nwgnuav ua caag koj yuav quaj nrov heev? Tsw muaj vaajntxwv nyob huv koj lov? Tug kws ua koj lub chaw sablaaj puam tsuaj lawm lov, es koj mob heev yaam le tug quaspuj ua mob teb lov?

10. Xi‑oo tug ntxhais 'e, ca le ntswj ib ce ntsaaj quas lawg, ib yaam le tug quaspuj ua mob teb yuav yug mivnyuas, tsua qhov nwgnuav koj yuav tsum tawm huv lub nroog moog nyob tom teb. Koj yuav tau moog rua Npanpiloo hab yuav tau kev cawm dim hov ntawd. Yawmsaub yuav txhwv koj dim huv koj cov yeeb ncuab txhais teg.

11. Nwgnuav muaj ntau lub tebchaws sau zog tawm tsaam koj, has tas, “Ca ua puag tsuas nwg, ca peb lub qhov muag moog saib Xi‑oo.”

12. Tassws puab tsw paub txug tej kws Yawmsaub xaav tseg lawd, puab tsw nkaag sab tej kws nwg npaaj ca. Tub yog nwg sau zog puab lug ua ke ib yaam le sau tej teg qoob lug rua ntawm lub tshaav ntaus.

13. Xi‑oo tug ntxhais 'e, ca le sawv tseeg ntaus tej qoob hov, tsua qhov kuv yuav pub koj muaj txwm kub hlau hab muaj rau taw tooj lab, mas koj yuav ntaus ntau haiv tuabneeg tawg ua tej dwb daim, hab koj yuav muab tej kws puab txeeb tau lug cais hlo pub rua Yawmsaub, yog muab puab tej nyaj txag pub rua tug Tswv kws kaav taag nrho lub qaab ntuj.