Tshwmsim - Đoạn 18

1. Dhau ntawd kuv pum dua ib tug tubkhai ntuj nqeg sau ntuj lug, nwg muaj fwjchim luj heev. Nwg tug fwjchim ci ntsaa ab ua rua lub nplajteb kaaj quas lug.

2. Nwg qw nrov nrov has tas, “Lub tuam nroog Npanpiloo pob taag, pob taag lawm lauj, ua lub chaw rua daab nyob hab ua chaw rua txhua tug plig qas vuab tsuab nkaum, hab ua chaw rua txhua yaam noog qas kws ntxwm ntxub nyob.

3. Vem ib tsoom tebchaws tau haus tej cawv txwv maab kws yog nwg txujkev ntshaw ua nkauj ua nraug, hab tej vaajntxwv huv nplajteb tau nrug nwg sws deev, hab tej tub laag tub luam huv nplajteb kuj nplua nuj tuaj ntawm qhov kws nwg swv phum laam qos ntsuav.”

4. Hab kuv nov dua ib lub suab nrov sau ntuj tuaj has tas, “Kuv haiv tuabneeg, ca le tawm huv lub nroog hov lug, sub mej txhad tsw nrug nwg muaj txem hab tsw nrug nwg raug sub tawg sub ntshaa,

5. vem nwg lub txem muab tib ua ib pawg sab moog nto ntuj lawm hab Vaajtswv cim ntsoov lub nroog hov tej kev txhum.

6. Ca le ua rua lub nroog hov ib yaam le nwg tau ua rua lwm tug. Ca le ua pauj tej kws nwg tau ua lawd ob npaug. Huv lub khob kws nwg tov rua luas haus ca le tov ob npaug rua nwg.

7. Nwg qhuas nwg tug kheej hab swv phum laam qos ntsuav npaum le caag, ca le muab kev tswm txom hab kev quaj ntsuag rua nwg npaum le ntawd. Nwg xaav huv lub sab tas, ‘Kuv nyob tsawg ua puj vaaj, kuv tsw yog puj ntsuag, kuv yuav tsw ntswb kev quaj ntsuag le.’

8. Vem le nuav tej sub tawg sub ntshaa yuav ua tuab nub lug raug nwg, yog kev mob kis, kev quaj ntsuag hab kev tshaib nqhes hab yuav raug suavtawg hlawv, tsua qhov tug Tswv Vaajtswv kws txav txem rua nwg, luj kawg nkaus.

9. “Thaus tej vaajntxwv huv nplajteb kws nrug lub nroog hov sws deev hab nrug nwg swv phum laam qos ntsuav, pum tej paa nchu kws kub hov puab yuav quaj hab quaj ntsuag.

10. Puab yuav sawv deb deb vem ntshai qhov kws nwg raug tswm txom hab has tas, “ ‘Txom nyem lauj! Txom nyem lauj! Lub nroog kws luj kawg, lub nroog Npanpiloo kws muaj zug heev. Ib tsoo tee xwb koj raug txav txem lawm.’

11. “Cov tub luam huv nplajteb kuj quaj hab quaj ntsuag nwg vem tsw muaj leejtwg yuav puab tej hov txhua chaw dua le lawm,

12. yog tej nyaj tej kub tej qai zeb hlaws hab tej qai qwj muaj nqes, ntaub maag zoo zoo, ntaub yimlaaj ntaub tshwb kaab ntaub lab, txhua yaam ntoo tsw qaab, txhua yaam kws xuas kaug ntxhw, xuas ntoo muaj nqes, xuas tooj lab, hlau hab pob zeb mog ua,

13. moov ntoo tuv, tej txum lom, moov tshuaj tsw qaab, roj tsw qaab, roj ntoos tsw qaab, cawv txwv maab, roj txwv aulib, moov mog zoo zoo hab tej mog, nyuj hab yaaj, neeg hab tsheb neeg, hab muag tuabneeg ua qhev.

14. “Puab yuav has tas, ‘Tej kws koj lub sab ntshaw tub pluj taag ntawm koj lawm, hab txhua yaam nqaj qhauv zoo hab tej kws zoo nkauj ci quas nplaag tub pluj ntawm koj lawm, nrhav tsw tau dua le lawm.’

15. Cov tub laag luam kws muag tej nuav nplua nuj vem lub nroog nuav, yuav sawv deb deb vem ntshai qhov kws nwg raug tswm txom hab puab yuav quaj hab quaj ntsuag has tas.

16. “ ‘Txom nyem lauj! Txom nyem lauj! Lub nroog luj kawg kws naav ntaub maag zoo zoo, naav ntaub yimlaaj hab ntaub lab, hab coj nyaj coj kub coj tej qai zeb hlaws hab tej qai qwj muaj nqes,

17. tuab tsoo tee xwb tej cuab txhaj cuab taam nuav huvsw raug puam tsuaj taag.’ “Cov tsaav nkoj hab cov kws caij nkoj hab cov tub zug huv nkoj hab txhua tug kws nrhav noj huv havtxwv txhua tug sawv deb deb,

18. hab thaus puab pum tej paa nchu kws kub lub nroog hov puab quaj has tas, ‘Lub nroog twg zoo thooj le lub nroog luj nuav?’

19. hab puab tsuab moov aav w rua sau puab taubhau hab quaj hab quaj ntsuag qw has tas, “ ‘Txom nyem lauj! Txom nyem lauj! Lub tuam nroog luj kawg kws txhua tug muaj nkoj txwg dha huv havtxwv, txeev muaj txag ntawm lub nroog tej kev nplua nuj, tuab tsoo tee xwb nwg raug kev puam tsuaj taag huvsw.

20. Lub ntuj 'e hab cov xuv dawb hab cov tubkhai hab cov xwbfwb cev Vaajtswv lug 'e, ca le xyiv faab nyos lub nroog hov, vem Vaajtswv txav txem rua nwg pauj mej lawm.’ ”

21. Tes muaj ib tug tubkhai ntuj kws muaj fwjchim luj txawm nqaa ib txhwb zeb zoo le txhwb txwv zeb nrum rua huv havtxwv hab has tas, “Lub tuam nroog Npanpiloo yuav raug swv zug muab nrum ib yaam le nuav ntaag hab yuav tsw rov pum dua le lawm,

22. hab yuav tsw nov lub suab ntaus nkauj nog ncaas suab hu nkauj suab tshuab raaj tshuab xyu rua huv koj dua le lawm, hab yuav tsw pum cov nam Kws txawj ua txhua yaam num huv koj dua le lawm, hab yuav tsw nov lub suab zum zeb huv koj dua le lawm.

23. Yuav tsw muaj tug duab teeb ci huv koj dua le lawm, hab yuav tsw nov lub suab nraug vauv nkauj nyaab dua le lawm. Koj cov tub luam puavleej yog tuabneeg luj huv lub nplajteb hab ib tsoom tebchaws raug koj tej khawv koob daag ntxag.

24. Hab luas pum cov xwbfwb cev Vaajtswv lug hab cov xuv dawb hab txhua tug kws raug tua huv lub nplajteb tej ntshaav nyob huv koj.”