Hanpakus - Đoạn 3

1. Hanpaku kws ua xwbfwb cev lug tej lug thov kws lawv le lub suab nkauj Siki‑aunau.

2. Au Yawmsaub, kuv tau nov txug koj lub koob meej, au Yawmsaub, tej kws koj tau ua lawd kuv ntshai kawg. Ncua swjhawm nuav thov koj rov ua dua, peb tam nuav thov qha koj tej num rua peb paub. Thaus koj npau tawg thov koj ncu txug txujkev khuvleej.

3. Vaajtswv tuaj ntawm Themaa tuaj, tug kws Dawb Huv tuaj ntawm lub roob Palaa tuaj. Nwg tug fwjchim ci ntsaa ab laum nkaus sau ntuj, hab lub nplajteb kuj puv nkaus tej suab qhuas nwg.

4. Nwg ci laam quas lug yaam le duab tshaav ntuj, muaj duab ci nplaag ntawm nwg txhais teg kws nraim nwg tug fwjchim ca.

5. Muaj mob kis moog ua nwg ntej, muaj mob phem ti nkaus nwg qaab.

6. Nwg sawv ntsug cu lub nplajteb, nwg saib ntsoov hab ua rua ib tsoom tebchaws tshee quas nyo, mas tej roob kws nyob ib txwm lug kuj tawg rw quas sua hab tej pov roob kws nyob moog ib txhws kuj saus taag, yog tej roob kws thau u nwg txeev moog lug.

7. Kuv pum cov tuabneeg Khusaa tej tsev ntaub lwj sab ntsuav, hab pum cov Mintee daim ntaub xov tsev tshee nduas quas txag.

8. Au Yawmsaub, koj npau tawg rua tej dej lov? Koj npau tawg rua tej haav dej lov? Lossws koj chim rua havtxwv rua thaus koj caij neeg hab thaus koj caij koj lub tsheb ua rog kws kov yeej lov?

9. Koj rhu hlo raab neev nti, nruab nkaus xub rua txuj hlua lawm. Koj ua rua lub nplajteb tawg faib sua ua haav dej.

10. Tej roob pum dheev koj kuj ntswj tseeg quas nkawg, tej nthwv dej ceev kuj ntsawj hlo moog, nruab tiv txwv kuj tsaa suab nrov hab ndaas sab sab.

11. Lub nub hab lub hli nreg tuabywv ntawm lub chaw rua thaus koj raab xub ci tuaj moog hab thaus koj raab muv ci nplaag tuaj.

12. Koj hlaa lub nplajteb moog ua npau tawg quas vog, hab tsuj pis ntag ib tsoom tebchaws ua chim quas nyov.

13. Koj tawm moog cawm koj haiv tuabneeg kuas dim, yog cawm tug kws koj laub roj tsaa kuas dim. Koj tsoo cov tuabneeg limham tug thawj, kuas nyob lab qaab txwj ntawm taubhau ti nkaus kwtaw.

14. Koj xuas koj raab muv nkaug nwg cov tub rog tug thawj, rua thaus nwg tuaj ceev le khaub zeeg cua yuav ua rua kuv tawg rw quas sua, nwg zoo sab xyiv faab yaam le nwg yuav tau noj cov tuabneeg pluag kws tswv nraim lawm.

15. Koj caij koj tej neeg tsuj havtxwv, ua rua dej luj nphau pis nphwv.

16. Kuv tau nov, kuv ib ce tshee quas nyo, thaus nov lub suab kuv daim tawv ncauj kuj tshee nduas txag. Kuv tej pob txhaa po, kuv txhais ceg qaug pes tsug. Kuv yuav nyob tuabywv tog rawv nub txom nyem, kws yuav lug raug cov tuabneeg kws txeem tuaj ntaus peb.

17. Txawm yog tej txwv cua tsw tawg paaj, tej txwv maab tsw txw txwv, tej txwv aulib tu nrho lawm, tsw muaj qoob huv tej teb, tej yaaj tej tshws nqhaa nkuaj hab tej nkuaj nyug khoob ntshuv,

18. los kuv yuav xyiv faab rua huv Yawmsaub, kuv yuav zoo sab rua Vaajtswv kws cawm kuv dim.

19. Vaajtswv Yawmsaub yog kuv tug zug, nwg ua kuv txhais kwtaw zoo yaam le kwtaw maum muas lwj, nwg ua rua kuv moog tau sau tej chaw sab. Zaaj nkauj sau rua tug thawj coj hu nkauj, hab swv nkauj nog ncaas.