Yauj - Đoạn 9

1. Yauj teb tas,

2. “Qhov tseeb kuv paub tas yog le hov, tassws tuabneeg yuav ua ncaaj rua ntawm Vaajtswv xubndag tau le caag?

3. Yog leejtwg xaav nrug Vaajtswv sws caam, mas ib txheeb zag los nwg tub teb tsw tau Vaajtswv ib zag.

4. Vaajtswv lub sab ntse, hab nwg muaj zug heev, leejtwg txeev tawm tsaam nwg hab kov yeej?

5. Nwg yog tug kws muab tej roob txaav los tej roob kuj tsw paub, rua thaus nwg muab tej roob ntxeev ua chim quas nyov.

6. Nwg cu lub nplajteb txaav ntawm lub qub chaw, hab tej ncej kws txawb lub nplajteb kuj ua zug quas kais.

7. Nwg nkaw lug rua lub nub mas lub nub tsw tawm tuaj, nwg thaiv tej nub qub tsw pub ci tuaj.

8. Nwg tuab leeg nthuav lub ntuj, hab tsuj tej nthwv dej huv havtxwv.

9. Nwg tswm nub qub Khais hab nub qub Puj Sua Kwv Ntaas hab nub qub Txhaj Txwv Mim hab tej nub qub saab nraag.

10. Nwg ua tej num luj kws tsw txawj nkaag sab tau, hab tej txujci phemfwj suav tsw txheeb.

11. Ua cav, nwg hlaa kuv moog lawm, kuv tub tsw pum nwg, nwg moog dhau lawm, kuv tub xaam tsw pum nwg.

12. Saib maj, nwg txeeb hlo moog lawm, leejtwg yuav txwv tau? Leejtwg yuav has rua nwg tas, ‘Koj ua daabtsw le kod?’

13. “Vaajtswv yuav tsw thim nwg txujkev chim. Tug zaaj laug Lahaj cov qhev khwb nkaus huv nwg xwb taw.

14. Mas kuv yuav teb tau Vaajtswv le caag, yuav xaiv lu lug twg lug caam nwg?

15. Txawm yog kuv tsw txhum, kuv kuj teb tsw tau nwg, kuv yuav thov tug yeej kom khuvleej kuv xwb.

16. Yog kuv hu nwg tuaj hab nwg teb kuv, los kuv tsw ntseeg tas nwg yuav noog kuv lug,

17. tsua qhov nwg swv cua daaj cua dub zuaj kuv, txawm yog tsw tim le caag los nwg ua rua kuv mob nyaav quas zug tuaj.

18. Nwg tsw pub kuv ua tau paa le, tsuas yog tsaav kev ab sab puv nkaus rua kuv xwb.

19. Yog muaj kev sws ntsuag zug, kuj saib Vaajtswv maj. Yog ua plaub ntug leejtwg yuav teem tau nwg tuaj?

20. Txawm yog kuv tsw txhum, los kuv lub qhov ncauj yuav has kuv qhov txhum, Txawm yog kuv zoo kawg, nwg yuav tshuaj tau tas kuv tsw ncaaj.

21. Kuv zoo tsw muaj chaw thuaj le, kuv tsw mob sab kuv tug kheej, kuv ntxub kuv txujsa.

22. Suavdawg zoo ib yaam nkaus, vem le hov kuv txhad has tas, ‘Nwg ua rua cov tuabneeg zoo hab cov tuabneeg limham puam tsuaj huvsw.’

23. Thaus tej vej sub vej sw coj kev tuag lug taamswm, nwg kuj thuaj luag cov kws tsw txhum tej kev txom nyem.

24. Lub nplajteb muab cob rua huv cov tuabneeg limham txhais teg. Nwg npug cov kws tu plaub huv lub nplajteb lub qhov muag. Tsw yog nwg es yog leejtwg?

25. “Kuv le noob nyoog moog sai dhau cov kws txawj dha, moog dhau plawg lawm tsw pum ib qhov zoo hlo le.

26. Noob nyoog dhau plhawv yaam le lub nkoj kws xuas pawj a ua, yaam nkaus le tug daav yaa kws ntsaub ntsuav lug rua tug qauv.

27. Yog kuv has tas, ‘Kuv yuav nov qaab kuv txujkev quaj txom nyem, hab kuv yuav tso kuv lub ntsej muag mluag mlob tseg hab xyiv faab,’

28. kuv kuj ntshai kuv tej kev txom nyem huvsw, tsua qhov kuv paub tas koj yuav tsw suav has tas kuv tsw txhum.

29. Kuv yeej yuav raug rau txem, mas kuv yuav swv zug do do ua daabtsw?

30. Yog kuv muab daus xwb daus npu lug ntxuav kuv, hab muab kua tshuaj lug ntxuav kuv txhais teg,

31. los koj tseed yuav muab kuv raus rua huv lub qhov dej qas, hab kuv tej rwg tsho yuav ntxub kuv.

32. Vaajtswv tsw yog tuabneeg zoo le kuv kws kuv yuav teb nwg, hab tuaj nrug nwg ua plaub.

33. Tsw muaj ib tug kws nyob nruab nraab ib ob tog, ua tug kws cheem tau ib ob leeg.

34. Thov nwg tshem nwg tug nplawm ntawm kuv moog, hab thov qhov kws ntshai quas rwg nwg tsw xob ua rua kuv ntshai.

35. Mas kuv yuav has hab txhad tsw ntshai nwg, tsua qhov nwgnuav kuv lub sab ua tsw tau le ntawd.