Yauj - Đoạn 4

1. Mas Elifa kws yog tuabneeg Themaa teb tas,

2. “Yog leejtwg muaj sab tuab has rua koj, koj yuav tu sab tsw tu? Txawm le ntawd los leejtwg yuav tswj tau tsw has?

3. Saib maj, koj tub qhuab qha tuabneeg coob kawg le lawm, hab koj tub txhawb tug kws txhais teg tsaug leeg muaj zug tuaj.

4. Koj tej lug fwj tau tug kws saamswm dawm qaug, hab koj ua rua lub hauv caug kws tsaug leeg nyob ruaj.

5. Tassws nwgnuav lug txug koj lawm hab koj kuj poob sab, kev txom nyem lug raug koj, koj kuj nyuaj sab kawg.

6. Qhov kws koj fwm hab paub ntshai Vaajtswv yog koj kev tso sab los tsw yog? Hab qhov kws koj xyum zoo kawg nkaus yog koj kev vaam los tsw yog?

7. “Swm xaav saib, tug kws tsw txhum txeev puam tsuaj lov? Lossws tug kws ncaaj nceeg raug muab txav pov tseg lov?

8. Lawv le kuv pum, cov kws laij txujkev ua txhum hab tseb txujkev ceblaaj kuj tau sau le ntawd.

9. Vaajtswv tej paa ua rua puab puam tsuaj, hab nwg txujkev chim tshuab ua kuas puab tu noob nrho.

10. Tug tsuv ntxhuav lub suab nyooj hab lub suab nyaum kuj pluj lawm, hab tug thaav tsuv ntxhuav kaug nav kuj luv taag lawm.

11. Tug tsuv ntxhuav kws muaj zug puam tsuaj vem tum tsw tau nqaj noj, hab tug maum tsuv ntxhuav tej mivnyuas tswv ua saab ua sua.

12. “Muaj ib lu lug has tuabywv tuaj txug kuv, kuv lub qhov ntsej tau nov lub suab sws ntxhw lu lug ntawd.

13. Tej npau suav kws kuv pum mo ntuj rua thaus tuabneeg tsaug zug ceev,

14. mas txujkev ntshai hab txujkev tshee lug raug kuv, ua rua kuv tej pob txhaa tshee ndua quas txag.

15. Muaj ib nthwv cua tuaj quas ntxog rua kuv lub plhu, ua rua kuv tej plaub ib ce xub taag.

16. Nthwv cua hov tug lawm, tassws kuv xaam tsw pum sov zoo le caag. Muaj ib yaam nyob ntawm kuv qhov muag. Txhua yaam nyob ntsag tu kuv le maav nov ib lub suab has tas,

17. ‘Tuabneeg kws txawj tuag ua tau ncaaj nceeg rua ntawm Vaajtswv lub xubndag lov? Tuabneeg yuav dawb huv tau rua ntawm tug kws tswm nwg lub xubndag lov?

18. Txawm yog nwg cov tub qhe los nwg tub tsw tso sab rua, nwg cov tubkhai ntuj los nwg tseed suav tas puab muaj kev txhum.

19. Cov kws lub cev yog aav nwg yimfuab suav tas txhum heev dua, yog cov kws tag taw rua huv tej moov aav, yog cov kws raug zuaj yaam le tug kaab npauj.

20. Thaus nub tawm moog txug nub poob xwb puab puam tsuaj taag, puab pluj moog ib txhws tsw muaj leejtwg quav ntsej.

21. Yog txuj hlua nqug tsev ntaub raug muab rhu lawm, puab yuav tsw tuag lov? Yeej yog puab tsw muaj tswvyim.’