Yauj - Đoạn 32

1. Yog le ntawm peb tug yawm hov txhad tseg tsw teb Yauj lawm, tsua qhov Yauj pum tas nwg ncaaj nceeg.

2. Tes Elihu kws yog Npalakhee tug tub yog tuabneeg Npub hab yog Laa cum txawm chim. Nwg chim rua Yauj vem Yauj has tas Yauj ncaaj nceeg tsw yog Vaajtswv ncaaj.

3. Nwg kuj chim rua Yauj peb tug kwvluag tsua qhov txawm yog puab teb tsw tau Yauj los puab tseed has tas Yauj txhum.

4. Elihu tog nrhw yuav has rua Yauj tsua qhov puab peb leeg hov laug dua nwg.

5. Thaus Elihu pum tas puab lub ncauj tsw muaj lug teb lawm nwg txhad chim.

6. Mas Npalakhee tug tub Elihu kws yog tuabneeg Npub teb tas, “Kuv tseed yau hab mej noob nyoog nchaav lawm, vem le nuav kuv txhad ua sab yau hab ntshai has tej kws kuv xaam pum rua mej.

7. Kuv has tas, ‘Ca cov kws muaj noob nyoog has, hab ca cov kws nyob ntau xyoo qha tswvyim.’

8. Qhov tseeb yog tug ntsuj plig kws nyob huv tuabneeg, yog tug kws muaj fwjchim luj kawg nkaus tej paa, ua rua tuabneeg nkaag sab.

9. Tsw yog cov laug xwb txhad muaj tswvyim, lossws cov kws noob nyoog nchaav txhad nkaag sab qhov kws raug cai.

10. Vem le nuav kuv txhad has tas, ‘Thov noog kuv has, thov ca kuv has tej kws kuv xaam pum.’

11. “Kuv tog rawv noog mej tej lug hab noog mej tej lug txawj ntse, rua thaus mej nrhav saib yuav has daabtsw.

12. Kuv ua tuab zoo noog mej has, tsw muaj ib tug taav tau Yauj le, mej cov tsw muaj leejtwg teb tau Yauj tej lug.

13. Ceev faaj tsw xob has tas, ‘Peb tub ntswb tswvyim lawm, Vaajtswv yuav kov yeej Yauj, tsw yog tuabneeg.’

14. Yauj tsw tau has nwg tej lug rua kuv, mas kuv yuav tsw muab mej tej lug teb Yauj.

15. “Puab poob sab taag tsw teb dua le lawm, puab tsw muaj ib lu lug has le lawm.

16. Mas kuv yuav tog lov vem puab tsw has hab puab sawv hov ntawd tsw teb le?

17. Mas kuv yuav teb kuv tej lug, kuv yuav has tej kws kuv xaam pum,

18. tsua qhov kuv muaj lug puv nkaus qhov ncauj, tassws kuv lub sab tseed tswj kuv ca.

19. Kuv lub sab zoo le cawv txwv maab kws tsw muaj chaw tshwm chim, ib yaam le lub naab tawv cawv txwv maab tshab kws tub yuav tawg.

20. Kuv yuav tsum has, txhad le tshwm chim zoo mivntswv, kuv yuav tsum qheb kuv daim tawv ncauj teb.

21. Kuv yuav tsw has saib leejtwg ntsej muag le, lossws yuav tsw has lug mog lug muas qhuas leejtwg,

22. tsua qhov kuv tsw txawj has lug mog lug muas qhuas, yog ua le ntawd tug kws tswm kuv yuav rhuav tshem kuv.