Yauj - Đoạn 31

1. Kuv tub cog lug rua kuv lub qhov muag lawm, mas kuv yuav saib ntsoov tej hluas nkauj dawb huv tau le caag?

2. Daabtsw yog kuv le feem ntawm Vaajtswv kws nyob sau ntuj, daabtsw yog kuv le qub txeeg qub teg ntawm tug kws muaj fwjchim luj kawg nkaus kws nyob sau lub chaw sab?

3. Vej sub vej sw yuav tsw poob rua sau cov tuabneeg tsw ncaaj nceeg lov, hab kev puam tsuaj yuav tsw poob rua sau cov kws ua txhum lov?

4. Vaajtswv tsw pum txujkev kws kuv moog hab tsw suav kuv txhua kauj ruam lov?

5. “Yog kuv taug txujkev cuav, hab kuv txhais kwtaw maaj nroog moog daag,

6. kuj thov ca muab kuv kiv rua sau raab teev kws hum txaj, hab thov Vaajtswv paub kuv lub sab dawb paug.

7. Yog kuv txhais kwtaw tig tawm huv txujkev lawm, hab kuv lub sab moog lawv le kuv qhov muag pum, hab yog muaj ib qhov kws tsw huv lu kuv txhais teg,

8. kuj thov ca kuv tseb es lwm tug tau noj, hab ca tej kws kuv cog raug muab dob hlo caag pov tseg.

9. “Yog kuv lub sab raug ntxag moog deev tej quaspuj, hab kuv tau zuv tog ntawm kuv kwvtij zej zog lub qhov rooj,

10. kuj ca kuv tug quaspuj zum moov rua lwm tug, hab ca lwm tug pw tsuam nwg.

11. Tej nuav kuj yog kev txhum kws phem kawg, hab yog kev txhum kws cov tu plaub yuav tsum txav txem rua,

12. qhov ntawd yog suavtawg yuav kub moog txug ncua lub chaw puam tsuaj, hab yuav kub hlo kuv tej caag tej txwv huvsw.

13. “Yog kuv tsw quav ntsej kuv tej tub qhe nkauj qhev tej lug rua thaus puab muaj xaiv muaj lug tuaj has rua kuv,

14. mas thaus Vaajtswv sawv tseeg kuv yuav ua tau le caag? Thaus nwg nug zaaj ntawd, kuv yuav teb nwg le caag?

15. Tug kws tswm kuv rua huv lub plaab tsw tau tswm puab hab lov? Tsw yog tuab tug tswm peb rua huv plaab mivnyuas lov?

16. “Yog kuv tau taav yaam twg kws tej tuabneeg pluag xaav yuav, lossws ua rua cov puj ntsuag lub qhov muag saib do xwb,

17. lossws kuv tuab leeg noj kuv tej mov, es tug mivnyuas kws tsw muaj txwv tsw tau noj,

18. (txwj thaus kuv yau lug kuv yug nwg ib yaam nkaus le kuv yog nwg txwv, hab kuv yeej taw qha cov puj ntsuag txwj thaus kuv yug huv nam plaab lug)

19. hab yog kuv pum ib tug twg puam tsuaj vem tsw muaj rwg tsho, lossws pum ib yawm twg pluag tsw muaj rwg tsho naav,

20. yog nwg lub sab tsw tau foom moov zoo rua kuv, hab nwg tsw tau naav kuv tej tsoog plaub yaaj suv,

21. yog kuv tsaa teg kov tej mivnyuas kws tsw muaj txwv, vem yog kuv paub tas cov kws nyob ntawm rooj loog yuav tuaj kuv tog,

22. tes thov ca kuv daim txhaa duav pu pluam ntawm kuv xub pwg, hab kuv txhais npaab pluam ntawm lub cos qej txhaa.

23. Kuv ntshai tej xwm txheej phem ntawm Vaajtswv, hab vem nwg tug fwjchim meej mom kuv ua tsw tau tej ntawd hlo le.

24. “Yog kuv muab tej kub ua yaam kws kuv tso sab, lossws hu tej tseem kub tas yog kuv lub chaw vaam khom,

25. yog kuv zoo sab vem kuv tej nyaj txag ntau kawg, lossws vem kuv txhais teg muab tau ntau kawg lug,

26. yog kuv saib rua lub nub kws ci tuaj, hab saib lub hli kws moog kev zoo nkauj kawg,

27. es kuv lub sab raug ntxag tuabywv moog pe, hab kuv lub qhov ncauj nwj kuv txhais teg pe,

28. tej nuav yog kev txhum kws cov tu plaub yuav tsum txav txem, tsua qhov yog kuv faav xeeb rua Vaajtswv kws nyob sau ntuj.

29. “Yog kuv zoo sab rua thaus tug kws ntxub kuv raug puam tsuaj, lossws xyiv faab rua thaus nwg raug xwm txheej phem,

30. (kuv tsw tau ca kuv lub qhov ncauj ua txhum, es tsawm foom nwg txujsa,)

31. hab yog cov tuabneeg huv kuv lub tsev ntaub tsw tau has tas, ‘Leejtwg tsw tau noj nwg le nqaj tsau?’

32. tsua qhov tej qhua tsw tau pw nrau tej ntug kev, kuv qheb qhov rooj lug rua cov tuabneeg dua kev,

33. hab yog kuv muab kuv tej kev faav xeeb npog ib yaam le lwm tug, lossws muab kuv lub txem zais rua huv lub xubndag,

34. vem yog kuv pheej ntshai ib tsoom tuabneeg heev, hab ntshai kuv cov tuabneeg saib tsw taug kuv, kuv txhad nyob tuabywv tsw tawm dhau kuv lub qhov rooj moog,

35. mas kuv xaav kuas muaj ib tug noog kuv has. Nuav yog kuv txhais teg sau. Thov kuas tug kws muaj fwjchim luj kawg nkaus teb kuv. Kuv xaav tau tej lug kom kuv huv daim ntawv kws tug yeej kom sau.

36. Kuv yuav muab kwv hlo sau xub pwg moog, kuv yuav muab khi ca yaam le lub mom kub.

37. Kuv yuav qha kuv txhua kauj ruam rua nwg, kuv yuav moog cuag nwg yaam le ib tug thawj moog.

38. “Yog kuv daim teb quaj kom kuv, hab cov nav khais kws laij teb hov ib txhwj quaj,

39. yog kuv noj tej qoob hov tsw them nqe le, hab ua rua tej qub tswv teb hov tuag,

40. kuj thov ca xuav paug tuaj nyob tej mog chaw, hab nroj pas daab tuaj nyob qeb chaw.” Yauj le lug taag le nuav.