Yauj - Đoạn 26

1. Mas Yauj teb tas,

2. “Koj nyim paab tau tug kws tsw muaj zug los caag! Koj nyim paab tau tug kws txhais npaab tsw muaj zug los caag!

3. Koj nyim txawj qha tug kws tsw muaj tswvyim hab txawj ua ncauj ua lu has kev txawj ntse los caag!

4. Leejtwg paab koj has tej lug nuav, hab leejtwg tug ntsuj plig tawm huv koj lug?

5. “Cov kws nyob huv tub tuag teb tseeg quas nkawg, tej dej huv tiv txwv hab cov kws nyob huv kuj ntshai.

6. Tub tuag teb qheb quas lug rua ntawm Vaajtswv lub qhov muag, hab lub chaw puam tsuaj tsw muaj daabtsw npug.

7. Nwg nthuav lub ntuj saab peg rua sau kws nyob do cuas, hab muab lub nplajteb dai rua lub chaw kws nyob khoob ntshuv.

8. Nwg muab dej qhwv ca huv nwg cov fuab kws tsaus nti, mas cov fuab hov yeej tsw tawg le.

9. Nwg roog nwg lub zwm txwv, hab nthuav nwg cov fuab lug thaiv ca.

10. Nwg sau lub npoo nplajteb rua sau nplaim dej, yog tug nrwm kws quas qhov kaaj hab qhov tsaus.

11. Tej ncej txheem lub ntuj kuj ua zug quas kais, hab poob sab rua thaus nwg tshev.

12. Nwg swv nwg tug fwjchim tswj havtxwv nyob tug yeeg, nwg swv tug tswvyim ntaus tug zaaj Lahaj.

13. Nwg tshuab paa ua rua lub ntuj kaaj quas lug, nwg txhais teg nkaug tug zaaj kws txawj txawj tswv.

14. Tej nuav tsuas yog nwg tej num saab nrau phij saam xwb, peb nov txug nwg yog lub suab sws ntxhw miv miv xwb. Leejtwg yuav nkaag sab nwg tug fwjchim kws nrov tej nam teg?”