Yauj - Đoạn 23

1. Mas Yauj teb tas,

2. “Nub nua kuv ywg tej lug ab lug daw, txawm yog kuv ntsaaj le hov los Vaajtswv txhais teg tseed nyaav rua sau kuv.

3. Kuv xaav paub tas kuv yuav ntswb nwg hovtwg, sub kuv txhad lug txug ntawm nwg lub zwm txwv.

4. Kuv yuav cev kuv tshaaj plaub rua ntawm nwg xubndag, hab ntim lug puv ncauj nrug nwg sws caav.

5. Kuv xaav paub tas nwg yuav teb kuv le caag, hab to taub tej kws nwg has rua kuv.

6. Nwg yuav swv nwg tug fwjchim luj caav kuv lov? Tsw yog, nwg yuav noog kuv has.

7. Qhov chaw ntawd, tug tuabneeg ncaaj nceeg yuav nrug nwg sws caav tau, mas tug kws tu plaub rua kuv yuav tso kuv dim moog ib txhws.

8. “Saib maj, kuv moog rua tom hauv ntej los nwg tsw nyob hov ntawd, hab moog rua tom qub qaab kuj saib tsw pum nwg.

9. Thaus nwg ua num rua saab txhum phem kuv kuj tsw pum nwg, thaus nwg tig rua saab xws los kuv nrhav tsw pum nwg.

10. Nwg paub txujkev kws kuv moog. Thaus nwg muab kuv swm lawd kuv yuav tawm lug zoo le cov tseem kub.

11. Kuv txhais kwtaw tsuj lawv nraim nwg tug neev taw, kuv taug nraim nwg txujkev hab tsw tig zos moog rua saab twg le.

12. Kuv tsw ncaim ntawm tej kevcai kws nwg daim tawv ncauj has tseg, kuv khaws tej lug kws tawm ntawm nwg lub qhov ncauj lug ca rua huv kuv lub sab.

13. Nwg yeej tsw txawv txaav hab leejtwg yuav ua rua nwg ntxeev sab tau? Nwg xaav ua yaam twg nwg kuj ua yaam ntawd.

14. Nwg yuav ua tej kws nwg tu tseg rua kuv lawd kuas tav, hab nwg tub npaaj ntau yaam le ntawd rua huv lub sab lawm.

15. Vem le nuav kuv txhad ntshai heev rua ntawm nwg lub xubndag. haus kuv tshuaj saib lawm ntshai nwg ua sab puag quas tsug.

16. Vaajtswv ua rua kuv lub sab tsw muaj zug, tug kws muaj fwjchim luj kawg nkaus tau ua rua kuv ntshai.

17. Tassws qhov tsaus ntuj tsw tau muab kuv txav tu, hab qhov tsaus ntuj nti tseed laum nkaus kuv lub ntsej muag ca.