Yauj - Đoạn 18

1. Npinta kws yog tuabneeg Su‑a teb tas,

2. “Mej yuav nrhav tej lug has ntev le caag? Ca le tshuaj saib es peb yuav has.

3. Ua le caag mej yuav suav tas peb yog tsaj txhu? Ua le caag mej saib peb yog tuabneeg ruag?

4. Koj muab koj tug kheej dua ua chim quas nyov, mas lub nplajteb yuav raug muab tso tseg vem yog saib rua koj lov, hab tej txhwb zeb yuav raug muab txaav dua rua ib qho lov?

5. “Tug tuabneeg limham lub teeb yuav raug muab tua, hab nwg cov nplaim tawg yuav fus tsw ci lawm.

6. Qhov kaaj huv nwg tsev ntaub yuav tsaus moog, hab lub teeb kws nyob sau nwg yuav tuag.

7. Nwg txhais kauj ruam kws muaj zug yuav tuab lu zuj zug, hab nwg tej tswvyim yuav muab nwg laim qaug taag.

8. Nwg txhais kwtaw coj nwg moog maag rooj hlua, hab nwg poob rua huv lub qhov taub.

9. Rooj ntxab yuav tais nwg kwtaw, lub vuj hlua yuav soo nwg ca.

10. Rooj hlua taw yuav cuab nwg rua huv aav, hab yuav cuab hlua kais rua huv nwg txujkev.

11. Tej kws txaus ntshai nyob puag ncig ua rua nwg ntshai heev. hab lawv ti nkaus nwg lauj taw.

12. Nwg qaug zug vem yog tshaib plaab, hab vej sub vej sw tog rawv nwg dawm.

13. Kaab mob noj nwg daim tawv nqaj, hab kev tuag noj quas zog nwg teg nwg taw.

14. Nwg raug rhu tawm huv lub tsev ntaub kws nwg tso sab, raug coj moog rua tug vaajntxwv kws txaus ntshai heev.

15. Tej kws yog nwg le tsw nyob huv nwg lub tsev ntaub lawm, muaj suavtawg lawj faaj nyob puv nkaus huv nwg lub chaw nyob.

16. Nwg tej caag qhuav rua huv lawm hab nwg tej ceg sau kuj tuag tshaav.

17. Ncu tsw txug nwg huv lub nplajteb lawm hab tsw ncu nwg lub npe huv tej kev lawm.

18. Nwg raug muab thawb huv qhov kaaj moog rua huv qhov tsaus ntuj, hab raug muab lawv tawm huv lub nplajteb.

19. Nwg tsw muaj tub tsw muaj ki rua huv nwg haiv tuabneeg, hab tsw muaj ib tug kws dim sav huv tej chaw kws nwg nyob.

20. Cov kws nyob saab nub poob kuj poob sab nthaav rua nub kws nwg tuag, hab cov kws nyob saab nub tuaj kuj ntshai heev.

21. Cov kws tsw fwm Vaajtswv tej chaw nyob zoo le nuav ntaag, tug kws tsw paub Vaajtswv mas nwg lub neej yuav zoo le nuav.”