Yauj - Đoạn 17

1. Kuv tug ntsuj plig pluj taag, kuv lub caij lub nyoog kuj kawg kuv lub qhov ntxaa tub txhwj lawm.

2. Tseeb tag cov tuabneeg thuaj luag nyob puag ncig kuv, hab kuv lub qhov muag saib ntsoov qhov kws puab thuaj kuv.

3. “Vaajtswv, thov koj them cov nqe ua pov thawj qhwv kuv rua koj. Muaj dua ib tug twg kws yuav ua pov thawj qhwv kuv tau?

4. Vem koj kaw puab lub sab ua rua puab tsw nkaag sab, yog le nuav koj txhad tsw ca puab kov yeej.

5. Tug kws kom nwg cov phoojywg, sub txhad tau nqe zug, nwg tej mivnyuas lub qhov muag yuav tsw pum kev.

6. “Vaajtswv muab kuv tag luas ncauj luas lu, hab luas ntu qub ncaug rua kuv lub plhu.

7. Qhov kws kuv lwj sab ua rua kuv tsaus muag ndais, hab kuv lub cev huvsw zoo le tug duab xwb.

8. Tug tuabneeg ncaaj nceeg poob sab nthaav txug zaaj nuav, hab tug kws tsw txhum sawv twv cov kws tsw fwm Vaajtswv.

9. Tug ncaaj nceeg tseed tuav rawv nwg txujkev, hab tug kws txhais teg huv muaj zug zuj zug tuaj.

10. Tassws mej mas txhua tug ca le rov tuaj dua ib zag, mas kuv yuav tsw pum mej cov ib tug twg muaj tswvyim le.

11. Kuv lub caij lub nyoog kuj dua lawm, kuv tej num kws kuv npaaj ca kuj raug muab rhuav taag, yog tej kws kuv lub sab ntshaw.

12. Puab muab mo ntuj ua nruab nub, txawm yog nyob qhov tsaus los puab has tas, ‘Qhov kaaj nyob ze lawm.’

13. Yog kuv tog nrhw tub tuag teb ua kuv lub tsev, yog kuv nthuav kuv lub chaw pw moog rua huv qhov tsaus ntuj,

14. hab yog kuv has rua lub qhov tuag tas, ‘Koj yog kuv txwv,’ hab has rua cov kaas tas, ‘Yog kuv nam hab kuv le muam,’

15. tes kuv txujkev vaam nyob rua hovtwg lawm? Leejtwg yuav pum kuv qhov chaw vaam?

16. Txujkev vaam hov yuav nqeg moog rua lub qhov rooj huv tub tuag teb hab lov? Kuv txujkev vaam hab kuv yuav moog ua ke rua huv moov aav lov?”