Yauj - Đoạn 16

1. Mas Yauj teb tas,

2. “Kuv tub txeev nov tej zaaj le nuav lug lawm ntau. Mej txhua tug yog cov kws nplig ua rua kuv ntxhuv sab xwb.

3. Tej lug fuab lug cua nuav yuav taag thaus twg? Muaj daabtsw tshaum kuas koj teb le nuav?

4. Yog mej raug le kuv mas kuv kuj has tau ib yaam le mej has hab. Kuv kuj txawj txuas lug has tawm tsaam mej hab cu taubhau thuaj mej hab.

5. Kuv lub qhov ncauj yuav has txhawb tau mej tug zug, hab kuv tug nplaig tej lug zoo yuav paab khu tau mej tej mob zoo mivntswv.

6. “Yog kuv has kuj paab tsw tau kuv tej mob zoo mivntswv le, hab yog kuv nyob tuabywv los yuav paab tau npaum twg?

7. Vaajtswv, qhov tseeb nwgnuav koj ua rua kuv txug sav heev, koj ua rua kuv cov tuabneeg raug kev lamswm.

8. Hab koj ua rua kuv sem zuj zug, yog ua timkhawv tas kuv txhum, hab qhov kws kuv ntxaug sawv tawm tsaam kuv, kuj yog ua timkhawv taab meeg rov tum kuv.

9. Nwg muab kuv dua ua npau tawg quas vog hab nwg ntxub kuv, nwg zawm nav quas zog rua kuv, kuv tug yeeb ncuab saib ua qhov muag qauj leg rua kuv.

10. Luas rua ncauj nyos kuv, puab ntaus kuv saab plhu saib tsw taug kuv, puab sau zog ua ke tuaj tawm tsaam kuv.

11. Vaajtswv muab kuv cob rua cov tuabneeg kws tsw fwm nwg, hab muab kuv laim rua huv cov tuabneeg limham txhais teg.

12. Kuv nyob zoo mas Vaajtswv muab kuv luv pis ntho, nwg ntsab nkaus kuv cej daab muab kuv ntsawm tawg ua tej dwb daim. Nwg muab kuv tsaa ua daim phaj rua nwg,

13. nwg cov kws txawj tua neev vej nkaus kuv. Nwg raab xub chob nkaus kuv lub raum tsw khuvleej le, nwg muab kuv tej kua tswb laub rua huv aav.

14. Nwg tuaj tua kuv ib zag taag ib zag thab, nwg dha tuaj ntaus kuv yaam le tub rog.

15. Kuv muab khaub seev tsaaj lug xaws rua kuv daim tawv nqaj, hab muab kuv tug zug txu rua huv aav.

16. Kuv quaj plhu lab taag, tsaus ntuj nti rua kuv lub qhov muag,

17. txawm yog kuv txhais teg tsw tau ua limham ndais ntuj rua leejtwg, hab kuv tej lug thov kuj dawb huv los xwj.

18. “Lub nplajteb 'e, tsw xob npug kuv tej ntshaav, hab tsw xob ca kuv lub suab quaj tau chaw su.

19. Saib maj, nwgnuav kuv tug timkhawv nyob sau ntuj, hab tug kws qhwv kuv nyob qhov chaw sab.

20. Kuv cov kwvluag thuaj kuv, kuv quaj kua muag lug taag rua Vaajtswv.

21. Thov tug timkhawv hov tuav kuv txujcai rua Vaajtswv, yaam le tej tuabneeg ua rua puab tug kwvluag,

22. tsua qhov tshuav tsw muaj tsawg xyoo kuv yuav tau taug txujkev kws kuv tsw rov lug lawm.