Yauj - Đoạn 14

1. Tuabneeg kws yug ntawm quaspuj lug mas txujsa tsw ntev, hab tsuas yog muaj kev ceblaaj txom nyem xwb.

2. Nwg tawm lug yaam le lub paaj ntoo hab tuag tshaav lawm, nwg pluj plag yaam le tug duab ntxoo hab tsw nyob moog le.

3. Vaajtswv, koj yuav tsaa muag saib cov tuabneeg zoo le hov hab coj nwg lug rua koj txav txem lov?

4. Leejtwg yuav coj yaam kws huv tawm ntawm qhov tsw huv tau? Tsw muaj leejtwg hlo le.

5. Nwg lub noob nyoog raug muab teem ca lawm, hab nwg le txhua lub hli nyob ntawm koj, hab koj tu nrwm rua nwg tsw kheev nwg hlaa dhau moog.

6. Thov koj fee plhu ntawm nwg moog hab muab nwg tso tseg, sub nwg txhad zoo sab rua nwg swm neej yaam le tug tub zug.

7. “Tsua qhov tug ntoo los tseed muaj vaam, yog raug muab ntuv lawm tseed hlaav ntsuag tuaj, hab tej ntsuag mog yuav muaj tsw tu ncua.

8. Txawm yog tej caag laug rua huv aav, hab lub hauv paug tuag rua huv aav lawm,

9. los thaus nov paa dej paa naag yuav tawg cos, hab hlaav ntsuag tuaj yaam le tsob ntoo mog.

10. Tassws tuabneeg tuag hab qaug lawm, tuabneeg tu sav lawm nwg nyob hovtwg?

11. Dej qhuav huv lub paag le caag, hab tej nam dej nqeg zuj zug qhuav taag le caag,

12. ib yaam le ntawd, tuabneeg pw mas yuav tsw sawv lug le, moog txug thaus lub ntuj tsw muaj lawm, nwg kuj tsw tswm lug, tsaa tsw tau nwg sawv le.

13. Au kuv xaav kuas koj muab kuv zais rua huv tub tuag teb, xaav kuas koj muab kuv npug ca moog txug thaus koj tsw npau tawg lawm, hab xaav kuas koj teem lub swjhawm rua kuv hab ncu txug kuv.

14. Yog tuabneeg tuag lawm nwg yuav rov muaj txujsa lov? Txhua nub kws kuv khwv le nuav kuv yuav tog nrhw moog txug thaus koj tso kuv dim.

15. Koj yuav hu hab kuv yuav teb koj, koj yuav xaav tau tug kws koj txhais teg tswm.

16. Thaus hov koj yuav suav kuv txhua kauj ruam, tassws koj yuav tsw saib ntsoov kuv qhov txhum.

17. Kuv tej kev faav xeeb yuav raug muab kaw ca rua huv lub naab, hab koj yuav muab kuv tej kev txhum txem npug ca.

18. “Tej roob nphau pob taag, tej txhwb zeb raug muab txaav moog rua lwm qhov,

19. dej ndwg tej pob zeb yaig quas zug, dej ntsawj kuav tej moov aav moog, mas koj rhuav tshem tuabneeg txujkev vaam ib yaam le ntawd.

20. Koj kov yeej nwg moog le nwg txhad dua taag lawm, koj hloov nwg lub ntsej muag hab xaa nwg moog.

21. Nwg tej tub tau koob meej los nwg tsw paub, puab poob qeg los nwg tsw pum.

22. Nwg tsuas yog nov nwg lub cev mob, hab nwg quaj ntsuag rua nwg tug kheej.”