Yauj - Đoạn 13

1. Saib maj, kuv lub qhov muag tub pum tej nuav huvsw lawm, kuv lub qhov ntsej tau nov hab nkaag sab tej nuav lawm.

2. Tej yaam kws mej paub kuv kuj paub hab, kuv tsw qeg dua mej.

3. Tassws kuv xaav has rua tug kws muaj fwjchim luj kawg nkaus, hab kuv xaav nrug Vaajtswv has plaub.

4. Mej mas tsuas yog muab tej lug daag lug npog mej xwb, mej suavdawg yog cov Kws tshuaj kws tsw txawj khu.

5. Au, xaav kuas mej nyob tuabywv, mas qhov kws nyob tuabywv hov yuav yog mej tug tswvyim.

6. “Nwgnuav mej ca le noog kuv tej lug has plaub, hab noog tej lug kws kuv lub qhov ncauj taij thov.

7. Mej has lug daag paab Vaajtswv hab has lug ntxag paab nwg lov?

8. Mej yuav tuaj nwg tog, hab mej yuav paab Vaajtswv has lov?

9. Thaus nwg xawb tau mej, mej yuav tau zoo lov? Lossws mej yuav daag tau nwg yaam le daag tuabneeg lov?

10. Yog mej tuaj nwg tog tuabywv, nwg yuav tshev mej tag tag le.

11. Nwg tug fwjchim meej mom yuav tsw ua rua mej ntshai kawg lov, hab qhov kws ntshai quas rwg nwg yuav tsw poob rua sau mej lov?

12. Mej tej paaj lug yog tshauv xwb, hab mej tej cuab yeej tiv thaiv yog muab aav nplaum ua xwb.

13. “Ca le nyob tuabywv, kuv yuav has, hab yuav muaj daabtsw tshwm lug raug kuv kuj xwj.

14. Ua caag kuv yuav tsum sev nyog kuv cev nqaj, hab pheej moo ua kuv lub neej?

15. Saib maj, nwg yuav muab kuv tua, kuv tsw muaj vaam le lawm, tassws kuv tseed yuav has daws kuv zaaj ntawm nwg xubndag.

16. Qhov nuav yuav ua txujkev dim rua kuv, tug kws tsw fwm Vaajtswv mas yuav tsw tau lug rua ntawm nwg xubndag.

17. Ca le ua tuab zoo noog kuv tej lug hab ca kuv tej lug nyob huv mej lub qhov ntsej.

18. Kuv tub npaaj has kuv tshaaj plaub lawm, kuv paub tas kuv yuav muaj cai.

19. Leejtwg yuav nrug kuv kom tsaam? Yog muaj mas kuv yuav nyob tuabywv hab tuag.

20. Thov pub ob yaam rua kuv, mas kuv yuav tsw tswv nraim ntawm koj lub xubndag.

21. Thov koj nkaum teg deb ntawm kuv, hab xob ca qhov kws ntshai quas rwg koj ua rua kuv ntshai.

22. Ca koj hu mas kuv yuav teb lossws ca kuv has mas koj teb rua kuv.

23. Kuv tej kev txhum hab kuv lub txem muaj npaum twg? Thov qha rua kuv paub kuv tej kev faav xeeb hab kuv lub txem.

24. Ua caag koj fee plhu lawm hab suav tas kuv yog koj le yeeb ncuab?

25. Koj yuav ua rua daim nplooj ntoo kws raug cua ntsawj ntshai hab yuav lawv tej quav nyaab qhuav lov?

26. Koj muab tej kws ab sab sau ca tawm tsaam kuv, hab ua rua kuv tau lub txem kws thaus tseed hluas kuv ua.

27. Koj muab kuv txhais kwtaw tso rua huv raab cuab, hab saib ntsoov kuv txhua txuj hauv kev, hab koj tu nrwm rua kuv xwb taw tsuj.

28. Tuabneeg sem zuj quas zug le tej yaam kws lwj, hab yaam le tej tsoog tsho kws kaab ntsaum noj.