Yau-Ees - Đoạn 2

1. Ca le tshuab raaj kub yaaj rua huv Xi‑oo, ca le tshuab raaj ceeb toom sau kuv lub roob dawb huv. Ca cov tuabneeg suavdawg huv lub tebchaws nuav tshee quas nyo, tsua qhov nub kws Yawmsaub teem ca saamswm lug, saamswm lug ze lawm,

2. yog nub kws tsaus ntuj hab tsaus dub ncab, yog nub kws muaj fuab hab tsaus quas ncab. Muaj ib paab kooj coob coob kws muaj zug heev tuaj laum nkaus sau tej roob nyob tsaus nti yaam le duab ntxoo. Ib txwm thau u lug tsw tau txeev muaj le nuav hab txwj nuav moog yuav tsw muaj dua ib txhab ib txhws moog rua txhua tam tuabneeg.

3. Suavtawg kub ua puab ntej, nplaim tawg cig lawv puab qaab. Tom puab hauv ntej lub tebchaws zoo yaam nkaus le lub vaaj Etee, tom puab qub qaab zoo yaam nkaus le tebchaws moj saab qhua kws nyob do cuas, tsw tshuav ib yaam daabtsw dim le.

4. Puab lub cev zoo yaam le neeg, puab dha le tej neeg ua rog dha.

5. Puab dha caws qa sau tej ncov roob nrov quas voog yaam le tsheb neeg ua rog, hab nrov plij plej yaam le nplaim tawg hlawv quav nyaab, hab yaam le paab tub rog kws muaj zug npaaj txhwj ua rog.

6. Tej tuabneeg pum puab, mas poob sab nthaav, txhua tug ntsej muag thum xem taag.

7. Puab dha yaam le cov kws txawj ua rog, puab nce sau ntsaa loog yaam le tub rog. Puab moog tau ua ib sob, tsw tig rua saab twg hlo le.

8. Puab tsw sws txeeb kev moog, nyag moog ncaaj nyag xubndag. Puab txeem plawg tej cuab yeej kws thaiv kev, tsw muaj daabtsw taav tau puab le.

9. Puab caws qa rua huv lub nroog, puab dha sau tej ntsaa loog, puab nce moog rua huv tej tsev, puab nkaag tej qhov rais ib yaam le tub saab.

10. Lub nplajteb ua zug quas kais rua ntawm puab xubndag, hab lub ntuj tseeg quas nkawg. Lub nub lub hli tsaus ndais, tej nub qub tsw ci lawm.

11. Yawmsaub nthe nqho rua ntawm nwg cov tub rog xubndag. Nwg paab tub rog coob heev, cov kws ua lawv le nwg has kuj muaj zug heev. Nub kws Yawmsaub teem ca yog nub kws luj heev hab txaus ntshai. Leejtwg yuav thev taug?

12. Yawmsaub has tas, “Txawm le ntawd kuj xwj, mej ca le rov lug cuag kuv kawg sab kawg ntsws nwgnuav, hab yoo mov, quaj hab quaj ntsuag.”

13. Ca le dua mej lub sab tsw yog dua mej lub tsho. Ca le tig rov lug cuag Yawmsaub kws yog mej tug Vaajtswv, nwg yog tug kws hlub hab khuvleej, nwg tsw chim sai, nwg txujkev hlub kws ruaj khov muaj nplua quas mag, nwg hloov dua sab tsw tso xwm txheej phem lug.

14. Leejtwg yuav paub tas tej zag nwg yuav tig hlo hloov dua sab, hab tseg tej koob moov rua mej, yog tseg qoob loos kws mej yuav xyeem hab tej cawv txwv maab kws yuav laub xyeem rua Yawmsaub kws yog mej tug Vaajtswv.

15. Ca le tshuab raaj kub yaaj rua huv Xi‑oo, tshaaj tawm kuas ua kevcai yoo mov, hu kuas suavdawg tuaj txoos ua ke caiv su tag tag le.

16. Ca le sau zog cov pejxeem tuaj, ca le tu ib tsoom pejxeem kuas dawb huv. Ca le hu cov laug tuaj, hab sau zog cov mivnyuas yau, hab cov mivnyuas noj mig. Ca tug nraug vauv tawm huv nwg lub chaw tuaj, hab ca tug nkauj nyaab tawm huv nwg lub txaaj tuaj.

17. Ca cov pov thawj kws ua koom rua Yawmsaub quaj rua ntawm lub qaab khaav tuam tsev hab lub thaaj kem nruab nraab, hab has tas, “Au Yawmsaub, thov khuvleej koj haiv tuabneeg, thov tsw xob ca koj qub txeeg qub teg raug ib tsoom tebchaws thuaj luag hab tag luas ncauj luas lu. Ua caag ib tsoom tuabneeg yuav has tas, ‘Puab tug Vaajtswv dua twg lawm?’ ”

18. Yawmsaub txawm khib xeeb nwg lub tebchaws hab khuvleej nwg haiv tuabneeg.

19. Yawmsaub txhad teb nwg haiv tuabneeg tas, “Saib maj, kuv saamswm pub qoob loos hab cawv txwv maab hab roj rua mej, mej txhad muaj txaus nkaus. Kuv yuav tsw ua rua mej raug ib tsoom tebhcaws thuaj luag dua le lawm.

20. Kuv yuav rhu cov kooj kws tuaj saab peg tuaj coj moog kuas deb mej, kuv yuav muab puab lawv tswv moog rua huv lub tebchaws kws qhuav nkig nkuav hab tsw muaj daabtsw. Paab kws ua ntej yuav moog rua huv lub havtxwv kws nyob saab nub tuaj, paab kws ua qaab yuav moog rua huv lub havtxwv kws nyob saab nub poob. Yuav nov puab tej ntxhab tsw lwj tuaj, vem Vaajtswv ua num luj heev.”

21. Lub tebchaws 'e, tsw xob ntshai, ca le zoo sab hab xyiv faab, tsua qhov Yawmsaub tau ua tej num luj kawg lawm.

22. Tej tsaj qus 'e, tsw xob ntshai, vem tej tshaav zaub huv tebchaws moj saab qhua ntsuab tsaus nti, tej txwv ntoo kuj txw txwv, tej txwv cua hab tej txwv maab txw txwv ncw ncw.

23. Xi‑oo cov tub 'e, ca le zoo sab nawj, ca le xyiv faab rua huv Yawmsaub kws yog mej tug Vaajtswv. Nwg muab cov naag hauv xyoo cawm mej, nwg tso naag ntau kawg lug rua mej, muaj naag hauv xyoo hab naag qaab xyoo ib yaam le yaav thau u.

24. Yuav muaj qoob puv nkaus tej tshaav ntaus qoob, yuav muaj cawv txwv maab hab roj puv tej rhawv phwj yog.

25. “Kuv yuav pub kuas lub naj lub xyoos rov zoo le qub rua mej, yuav pauj cov quas xyoos kws kooj ntaas kooj txwg kooj tshuab kooj miv muab noj taag lawd, yog kuv paab tub rog coob coob kws kuv tso lug rua huv mej.

26. Mej yuav tau noj nplua quas mag hab tsau npo, mas mej yuav qhuas mej tug Vaajtswv Yawmsaub lub npe kws tau ua tej txujci phemfwj paab mej. Kuv haiv tuabneeg yuav tsw raug txaaj muag dua le lawm.

27. Mej yuav paub tas kuv nyob huv plawv cov Yixayee, hab paub tas kuv yog Yawmsaub, yog mej tug Vaajtswv, tsw muaj dua lwm tug le. Kuv haiv tuabneeg yuav tsw raug txaaj muag dua le lawm.”

28. “Yaav tom qaab kuv yuav laub kuv tug Ntsuj Plig rua sau ib tsoom tuabneeg suavdawg. Mej tej tub tej ntxhais yuav cev kuv le lug, mej cov laug yuav ua npau suav, mej cov hluas yuav ua yug quas toog pum.

29. Lub swjhawm ntawd txawm yog kuv cov tub qhe nkauj qhev los kuv yuav laub kuv tug Ntsuj Plig rua sau puab.

30. Kuv yuav ua tej txujci phemfwj tshwm sau nruab ntug hab huv lub nplajteb yuav muaj ntshaav hab suavtawg hab paa nchu.

31. Lub nub yuav ntxeev ua tsaus ntuj, lub hli yuav ua ntshaav, ua ntej nub kws luj txaus ntshai kws Yawmsaub teem ca lug txug.

32. Thaus hov txhua tug kws thov hu Yawmsaub lub npe yuav dim. Yuav muaj tuabneeg dim huv Xi‑oo hab huv Yeluxalee lawv le Yawmsaub has ca lawd, hab cov kws dim hov yog yuav muaj cov kws Yawmsaub hu.”