Exekees - Đoạn 28

1. Yawmsaub has lug tuaj rua kuv tas,

2. “Tuabneeg tug tub, ca le has rua tug thawj huv lub nroog Thailab tas, ‘Vaajtswv Yawmsaub has le nuav tas, “ ‘Koj lub sab khaav theeb hab koj has tas, “Kuv yog ib tug vaajtswv, kuv nyob sau tej vaajtswv lub zwm txwv huv plawv havtxwv.” Tassws koj tsuas yog tuabneeg xwb, tsw yog vaajtswv, txawm yog koj xaam pum tas koj ntse le ib tug vaajtswv.

3. Koj ntse dua Taniyee tag, tsw muaj ib yaam daabtsw kws koj tsw paub.

4. Koj swv koj tug tswvyim hab koj kev txawj ntse nrhav tau nyaj txag rua koj, hab sau tej nyaj tej kub lug rua huv koj tej txhaab.

5. Koj swv koj tug tswvyim luj kawg kws txawj ua laag ua luam koj txhad tsaav tau koj tej nyaj txag tau ntau zuj zug rua koj, hab koj lub sab txhad khaav theeb rua koj tej nyaj txag.

6. Vem le nuav Vaajtswv Yawmsaub has le nuav tas, Vem koj xaam pum tas koj ntse ib yaam le ib tug vaajtswv,

7. vem le nuav kuv yuav coj lwm haiv tuabneeg tuaj tawm tsaam koj, yog haiv tuabneeg kws ua nruj ua tswv heev dua ib tsoom tebchaws huvsw. Puab yuav rhu ntaaj tawm tsaam tej kev zoo nkauj kws koj tug tswvyim ua hab ua puag tsuas koj lub koob meej.

8. Puab yuav thawb koj moog rua huv tub tuag teb, koj yuav tuag rua huv havtxwv ib yaam le raug tua.

9. Koj tseed yuav has tas, “Kuv yog ib tug vaajtswv,” taab meeg cov kws tua koj lov? Koj tsuas yog tuabneeg xwb, kws nyob huv cov kws ntaus koj txhais teg, koj tsw yog ib tug vaajtswv.

10. Koj yuav tuag yaam nkaus le cov kws tsw ua kevcai txav tuag rua huv lwm haiv tuabneeg txhais teg vem kuv tub has ca lawm. Vaajtswv Yawmsaub has le nuav ntaag.’ ”

11. Yawmsaub has dua lug tuaj rua kuv tas,

12. “Tuabneeg tug tub, ca le tsaa suab hu zaaj nkauj ntsuag rua Thailab tug vaajntxwv, hab has rua nwg tas, ‘Vaajtswv Yawmsaub has le nuav tas, “ ‘Koj txeev ua lub nplhaib nas hom thawj kws zoo tshaaj plawg, koj muaj tswvyim kawg, hab zoo nkauj kawg nkaus.

13. Koj txeev nyob huv Etee, kws yog Vaajtswv lub vaaj. Txhua yaam qai zeb hlaws muaj nqes muab lu rua koj lub tsho, yog qai zeb lab pis tseb, qai zeb daaj pis lig, hab qai zeb daaj tshab tshab, qai zeb ntsuab laam lug, qai zeb ntsuab pis xab, hab qai zeb av txho ci laam lug, qai zeb phaithu yimlaaj, qai zeb ntsuab quas lab, hab qai zeb ntsuab txho. Tej hlaws qai zeb nuav muab ntsa rua huv lub taig kub hab tej kws txaij nraug zeeg yog kub. Tej nuav tub npaaj ca rua koj rua nub kws tswm koj.

14. Thaus kuv tswm koj kuv muab ib tug tubkhai Khelunpee tsom kwm koj, koj txeev nyob sau Vaajtswv lub roob kws dawb huv, koj tsuj pis ntag tej laag zeb kws ci laam quas lug le nplaim tawg.

15. Koj lub neej tsw muaj chaw thuaj le txwj nub kws tswm koj, lug txug thaus pum kev txhum txem tshwm huv koj.

16. Qhov kws koj ua laag ua luam ntau nplua mag ntawd koj kuj ua nruj ua tswv hab koj ua txhum muaj txem, kuv txhad muab koj laim ntawm Vaajtswv lub roob moog vem koj qas vuab tsuab, hab tug tubkhai Khelunpee kws tsom kwm koj ntab koj tawm huv tej laag zeb kws ci laam quas lug le nplaim tawg moog.

17. Koj lub sab khaav theeb vem yog qhov kws koj zoo nkauj, qhov kws koj muaj koob meej ua rua koj tug tswvyim ruag quas zug. Kuv muab koj laim rua huv peg teb lawm, kuv muab koj nthuav rua tej vaajntxwv saib, sub puab lub qhov muag txhad ntsa quas ntsoov koj.

18. Vem koj ua phem ntau kawg rua kev ua laag ua luam tsw ncaaj, koj txhad ua qas puag tsuas koj lub chaw pe hawm. Vem le nuav kuv txhad coj suavtawg huv plawv koj lug. Suavtawg kub koj taag, kuv ua rua koj caj plauv tshauv taag rua huv aav taab meeg txhua tug kws saib ntsoov.

19. Ib tsoom tuabneeg tej kws paub koj kuj poob sab nthaav txug koj. Koj lug txug qhov kawg kws txaus ntshai kawg, hab pluj plag moog ib txhws.’ ”

20. Yawmsaub has lug tuaj rua kuv tas,

21. “Tuabneeg tug tub, ca le tsom ntsoov rua Xaintoo hab cev Vaajtswv lug tawm tsaam lub moos ntawd,

22. hab has tas, ‘Vaajtswv Yawmsaub has le nuav tas, “ ‘Xaintoo 'e, saib maj, kuv tawm tsaam koj, kuv yuav ua kuv tug fwjchim ci ntsaa ab tshwm lug rua huv koj. Mas luas yuav paub tas kuv yog Yawmsaub rua thaus kuv teem txem rua lub moos ntawd, hab ua kuv txujkev dawb huv tshwm rua huv lub moos ntawd.

23. Vem yog kuv yuav tso mob kis lug rua huv nwg hab tso ntshaav lug rua huv nwg tej kev. Tuabneeg yuav raug tua tuag pawg quas yawg rua huv nwg, yuav raug tuag rua tej nav ntaaj kws tuaj txhua faab tuaj ntaus nwg. Mas puab yuav paub tas kuv yog Yawmsaub.

24. “ ‘Cov Yixayee mas yuav tsw muaj xuav paug ntsaaj lug chob hab tsw muaj xuav paug ntswm lug tsuab dua le lawm, rua huv plawv tej tebchaws kws nyob ib ncig puab kws txeev ua saib tsw taug puab. Mas puab yuav paub tas kuv yog Vaajtswv Yawmsaub.

25. “ ‘Vaajtswv Yawmsaub has le nuav tas, Thaus kuv sau zog cov Yixayee huv tej tebchaws kws puab tswv rw quas sua moog lawm, hab thaus kuv ua kuv txujkev dawb huv tshwm rua huv puab taab meeg ib tsoom tebchaws pum, mas puab yuav tau nyob huv puab lub tebchaws kws kuv tub muab pub rua kuv tug tub qhe Yakhauj lawm.

26. Mas puab yuav tau nyob huv lub tebchaws hov tso sab plhuav, puab yuav ua vaaj ua tsev hab cog vaaj txwv maab. Thaus kuv txav txem rua tej tuabneeg kws nyob ib ncig puab kws ua saib tsw taug puab taag lawm, mas puab yuav nyob tso sab plhuav. Mas puab yuav paub tas kuv yog Yawmsaub yog puab tug Vaajtswv.’ ”