Exekees - Đoạn 27

1. Yawmsaub has lug tuaj rua kuv tas,

2. “Tuabneeg tug tub, nwgnuav koj ca le tsaa suab hu zaaj nkauj ntsuag has txug lub nroog Thailab.

3. Ca le has rua Thailab kws nyob ntawm txujkev moog rua huv havtxwv, hab ua laag luam rua cov tuabneeg huv ntau lub tebchaws kws nyob ntawm ntug havtxwv has tas, ‘Vaajtswv Yawmsaub has le nuav tas, “ ‘Thailab 'e, koj tau has tas koj zoo nkauj kawg nkaus.

4. Koj nrwm teb nyob huv havtxwv. Cov kws tswm koj ua rua koj zoo nkauj kawg nkaus.

5. Puab xuas ntoo thuv huv Xeni ua koj tej txag xov huvsw, Puab muab ntoo cab huv Lenpanoo ua koj tug ncej huv plawv nkoj.

6. Puab muab ntoo qheb huv ua koj tej duav nkuam nkoj, Puab muab ntoo thuv huv Xaipla ua cov txag pua lub nkoj hab muab kaug ntxhw lu rua huv.

7. Koj daim ntaub cua ntsawj yog muab cov ntaub maag ua paaj zoo zoo huv Iyi tebchaws ua, hab ua koj tug chij. Muab ntaub xav ntaub yimlaaj ntawm ntug havtxwv Elisas vuv roog tshaav.

8. Cov tuabneeg Xaintoo hab cov tuabneeg huv lub moos Alava yog cov kws nkuam nkoj rua koj. Thailab 'e, koj cov tuabneeg kws txawj ua txhua yaam yog cov kws ua num huv lub nkoj.

9. Cov laug hab cov kws txawj ua txhua yaam num huv lub moos Kenpaa nyob huv koj, ua Kws ntoo khu tej kem txag ntoo huv koj lub nkoj. Txhua lub nkoj huv havtxwv hab cov kws ua num huv nkoj kuj tuaj nyob huv koj, nrug koj ua laag luam.

10. Cov tuabneeg Pawxia hab Lus hab Phuj kuj ua koj le tub rog huv koj paab tub rog, puab muab puab tej daim hlau hab mom hlau dai rua huv koj, puab ua rua koj tau koob meej.

11. Cov Alava hab cov Helem nyob sau koj tej ntsaa loog thoob plawg, cov Kama nyob sau koj tej chaw tsom faaj, puab dai daim hlau thaiv cev lawv koj tej ntsaa loog thoob plawg, puab ua rua qhov kws koj zoo nkauj zoo nkauj kawg nkaus.

12. “ ‘Lub moos Thasi nrug koj ua laag luam vem koj muaj txhua tsaav txhua yaam ntau kawg, puab coj nyaj, hlau, tooj dawb hab txhuas tuaj pauv koj tej hov txhua chaw.

13. “ ‘Lub moos Yavaa, Thunpaa hab Mese nrug koj ua laag luam. Puab coj tub qhe hab twj taig tooj lab tuaj pauv koj le hov txhua chaw.

14. “ ‘Lub moos Npe Thaukama coj neeg hab neeg ua rog hab luj txwv tuaj pauv rua koj.

15. “ ‘Cov tuabneeg Ntentaa nrug koj ua laag luam, ntau lub tebchaws ntawm ntug havtxwv kuj nrug koj ua laag luam quas nraim. Puab coj kaug ntxhw hab ntoo kub twg tuaj ua nqe them rua koj.

16. “ ‘Alaa kuj nrug koj ua laag luam vem yog koj muaj hov txhua chaw ntau nplua mag. Puab coj qai zeb hlaws ntsuab txho, ntaub yimlaaj, ntaub paaj, ntaub maag zoo zoo, paaj zeb havtxwv hab qai zeb hlaws kws txho tawg tuaj pauv koj le hov txhua chaw.

17. “ ‘Yuta hab Yixayee tebchaws kuj nrug koj ua laag luam. Puab coj mog huv lub moos Minij hab thawj phaum txwv cua, hab zwb ntaab hab roj hab roj ntoo ua tshuaj tuaj pauv koj tej hov txhua chaw.

18. “ ‘Ntamaxaka nrug koj ua laag luam yuav koj le hov txhua chaw ntau, vem yog koj muaj txhua yaam ntau nplua mag. Puab coj cawv txwv maab huv Henpoo hab plaub yaaj dawb,

19. hab cawv txwv maab huv Uxaa tuaj pauv koj le hov txhua chaw. Puab coj cov tseem hlau hab moov xyaab txob hab tauj qab qaab zwb tuaj pauv koj tej hov txhua chaw.

20. “ ‘Lub moos Ntentaa nrug koj ua laag luam. Puab coj ntaub pua eeb neeg tuaj.

21. “ ‘Alanpia hab cov thawj huv Khenta suavdawg nrug koj ua laag ua luam quas nraim. Puab coj mivnyuas yaaj hab txwv yaaj hab tshws tuaj muag rua koj.

22. “ ‘Cov tub luam huv lub moos Senpa hab lub moos La‑ama kuj nrug koj ua laag luam. Puab coj txhua yaam txum lom zoo zoo hab txhua yaam qai zeb hlaws muaj nqes hab kub tuaj pauv koj le hov txhua chaw.

23. “ ‘Lub moos Halaa hab Khane hab Etee, hab tej tub luam huv lub moos Senpa hab Asu hab Khimaj kuj nrug koj ua laag luam.

24. Puab coj tej tsoog tsho zoo zoo, tej tsoog tsho xav, ntaub paaj hab tej ntaub txaij pua chaw kws muab xaws ntug ruaj ruaj lawm tuaj nrug koj ua laag luam.

25. “ ‘Tej nkoj txwg huv lub moos Thasi thauj koj tej laag luam. Koj txhad thauj puv quas nkaus nyaav kawg huv plawv havtxwv.

26. Koj cov kws nkuam nkoj coj koj moog txug huv havtxwv kws tub tub, mas cua saab nub tuaj ua rua koj tog rua huv plawv havtxwv.

27. Koj tej nyaj txag, koj tej hov txhua chaw hab koj tej laag luam, koj tej tub nkuam nkoj hab tej kws ua num huv nkoj, koj tej Kws ntoo, koj tej tub laag tub luam hab koj tej tub rog huvsw kws nrug koj nyob, hab ib tsoom tuabneeg suavdawg kws nyob huv koj, tog hlo rua huv qaab havtxwv rua nub kws koj puam tsuaj hab.

28. Lub tebchaws kuj tseeg ua zug quas kais rua thaus kws nov koj tej tuabneeg ua num huv nkoj lub suab quaj qw.

29. Txhua tug kws tuav duav nkuam nkoj nqeg ntawm puab lub nkoj lug, tej tuabneeg kws ua num huv puab tej nkoj suavdawg lug sawv rua ntawm ntug havtxwv.

30. Puab quaj nyav koj nrov nrov, hab quaj heev kawg le. Puab w moov aav rua sau puab taubhau hab daa luj luam huv tej plauv tshauv.

31. Puab chais plaubhau vem yog koj, hab muab khaub seev tsaaj lug naav, puab quaj koj lwj sab kawg, hab quaj ntsuag koj nyuaj sab kawg.

32. Puab quaj nyav hu zaaj nkauj ua ntsuag rua koj, hab quaj ntsuag rua koj has tas, “Txeev muaj leejtwg raug puam tsuaj ib yaam le lub nroog Thailab rua huv plawv havtxwv lov?”

33. Thaus koj tej laag luam hlaa havtxwv tuaj kuj ua rua ntau haiv tuabneeg coob coob txaus sab. Koj tej hov txhua chaw kws ntau nplua quas mag hab koj tej laag luam ua rua tej vaajntxwv huv nplajteb nplua nuj.

34. Nwgnuav dej havtxwv ua rua koj puam tsuaj taag rua huv plawv havtxwv tub tub. Koj tej laag luam hab koj tej tub nkoj kuj tog nrug koj ua ke rua huv.

35. Koj ua rua tej tuabneeg kws nyob lawv ntug havtxwv poob sab nthaav, puab tej vaajntxwv ntshai heev kawg plhu thum xem taag.

36. Tej tub luam huv ib tsoom tuabneeg xyu koj. Koj txug qhov kawg kws txaus ntshai kawg le hab pluj plag moog ib txhws.’ ”