Yaxayas - Đoạn 54

1. “Tug puj mooj 'e, tug kws tsw tau yug dua mivnyuas, ca le hu nkauj, koj kws tsw tau ua dua mob teb 'e, ca le tsaa suab hu nkauj hab hu nrov nrov, tsua qhov tug puj kws tsw muaj quasyawg le mivnyuas yuav coob dua tug quaspuj kws muaj quasyawg.” Yawmsaub has le nuav ntaag.

2. “Ca le txuas koj lub tsev ntaub kuas daav, hab nthuav daim ntaub kws xov koj lub chaw nyob kuas daav. Tsw xob nkaum teg, ca le txuas koj txuj hlua kuas ntev hab txhus koj tej tswg kuas ruaj,

3. tsua qhov koj yuav nthuav daav moog rua saab xws saab phem. Koj tej caaj ceg yuav tau ib tsoom tebchaws lug ua puab tug, hab yuav moog nyob rua huv tej moos kws nyob do cuas.

4. Tsw xob ntshai vem koj yuav tsw raug txaaj muag, tsw xob poob sab vem koj yuav tsw poob ntsej muag. Koj yuav nov qaab tej kev txaaj muag thaus koj tseed hluas nkauj, hab koj yuav tsw ncu qhov kws luas thuaj koj ua puj ntsuag dua le lawm.

5. Tug kws tswm koj yog koj le quasyawg, nwg npe yog Yawmsaub kws muaj fwjchim luj kawg nkaus, hab tug Dawb Huv huv cov Yixayee yog tug txhwv koj, nwg hu ua Vaajtswv kws kaav taag nrho lub nplajteb huvsw.

6. Yawmsaub tau hu koj yaam le tug quaspuj kws raug muab tso tseg es lwj sab lawd, yaam le tug quaspuj hluas kws raug muab tso tseg.” Koj tug Vaajtswv has le nuav ntaag.

7. “Kuv tso koj tseg ib nyuas plag xwb, tassws kuv taab ncuab koj heev es kuv yuav qaws koj rov lug.

8. Kuv npau tawg ceev es fee plhu ntawm koj ib nyuas plag xwb, tassws vem yog muaj txujkev hlub ib txhws kuv yuav taab ncuab koj.” Yawmsaub tug kws txhwv koj has le nuav ntaag.

9. “Kuv saib tej nuav zoo ib yaam le thaus Nau‑a nyob. Kuv cog lug twv rua Nau‑a tas dej yuav tsw nyaab lub nplajteb dua le lawm, ib yaam le ntawd kuv tau cog lug twv tas kuv yuav tsw chim rua koj hab yuav tsw tshev koj.

10. Txawm yog tej roob yuav ncaim moog hab tej pov roob yuav raug muab rhuav tshem moog, los kuv txujkev hlub kws ruaj khov yuav tsw ncaim koj, hab kuv tej lug cog tseg sws raug zoo yuav tsw raug muab rhuav tshem.” Yawmsaub kws taab ncuab koj has le nuav ntaag.

11. “Au koj kws raug txom nyem nyuaj sab, raug cua daaj cua dub ntsawj hab tsw muaj leejtwg nplig, saib maj, kuv muab koj tej pob zeb lu tej qai zeb hlaws dub txho txaij hab muab tej qai zeb phaithu yimlaaj lug tag koj lub taw.

12. Kuv yuav muab tej qai zeb lab lug ua koj tej chaw tsom faaj, hab muab tej qai zeb hlaws ci ci muaj nqes lug ua koj tej rooj loog, hab muab tej qai zeb muaj nqes lug ua koj tej ntsaa loog.

13. Yawmsaub yuav qhuab qha koj tej tub huvsw, hab koj tej tub ki yuav vaam meej heev kawg.

14. Koj yuav raug muab tsaa rua huv txujkev ncaaj nceeg, koj yuav nyob deb ntawm kev raug luas quab yuam, vem koj yuav tsw ntshai, hab deb ntawm txujkev txhawj xeeb kev ntshai vem tej hov yuav tsw lug ze koj.

15. Yog leejtwg tshaum kuas muaj kev sws txeeb, kuj tsw yog kuv ua. Leejtwg tshaum kuas muaj kev sws txeeb tug hov yuav pam taag rua koj teg.

16. Saib maj, kuv tub tswm tug Kws hlau kws tshuab tej thee suavtawg, hab ua tej cuab yeej kws hum swv rua tej num ntawd. Kuv tub tswm tug kws rhuav tshem ua kuas puam tsuaj.

17. Tsw muaj ib yaam cuab yeej kws tswm lug tawm tsaam yeej koj, hab koj yuav rhuav tshem txhua tug nplaig kws sawv lug txav txem rua koj. Nuav yog Yawmsaub cov tub qhe le qub txeeg qub teg, hab yog qhov kws kuv tsaa puab cai.” Yawmsaub has le nuav ntaag.