Yaxayas - Đoạn 25

1. Au Yawmsaub, koj yog kuv tug Vaajtswv, kuv yuav txhawb nqaa koj, kuv yuav qhuas koj lub npe, vem yog koj tau ua tej num phemfwj kws koj tau npaaj tseg ca ntev lug lawm, yog tej kws ncaaj nceeg hab muaj tseeb.

2. Koj tub ua rua lub nroog pob taag ua tej nam pawg, hab ua rua lub moos kws muaj ntsaa loog ruaj khov pob taag. Lwm haiv tuabneeg tug vaajntxwv lub tsev tsw ua lub moos lawm, hab yuav tsw rov ua dua tshab.

3. Vem le nuav tej haiv tuabneeg kws muaj zug yuav qhuas koj, tej tebchaws kws ua nruj ua tswv tej moos yuav paub ntshai koj,

4. tsua qhov koj yog lub chaw ruaj khov rua cov tuabneeg pluag, hab yog lub chaw ruaj khov rua cov tuabneeg txom nyem thaus puab lwj sab. Koj yog lub chaw nraim cua daaj cua dub hab roog tshaav ntuj kub. Cov tuabneeg ua nruj ua tswv le paa zoo yaam nkaus le cua daaj cua dub ntsawj ntsaa loog,

5. hab zoo yaam nkaus le tshaav ntuj kub huv lub chaw qhuav. Koj tswj lwm haiv tuabneeg lub suab. Fuab roog tshaav ntuj kub le caag, cov tuabneeg ua nruj ua tswv lub suab hu nkauj yuav ntsag zog ib yaam le ntawd.

6. Sau lub roob nuav Yawmsaub kws muaj fwjchim luj kawg nkaus yuav npaaj noj npaaj haus rua ib tsoom tuabneeg yog tej zoo zaub zoo mov hab tej cawv txwv maab zoo zoo, yog tej zoo nqaj zoo qhauv hab tej kua txwv maab kws lim zoo zoo lawm.

7. Sau lub roob nuav Yawmsaub yuav rhuav tshem daim ntaub npug kws npug ib tsoom tuabneeg ntsej muag, yog daim ntaub kws thaiv sau ib tsoom tebchaws.

8. Nwg yuav muab txujkev tuag nqog hlo moog ib txhws, Vaajtswv Yawmsaub yuav so ib tsoom tuabneeg tej kua muag ntawm puab lub plhu hab nwg yuav muab qhov kws luas saib tsw taug nwg haiv tuabneeg rhuav tshem kuas pluj taag huv lub nplajteb nuav moog. Yawmsaub tub has ca le nuav lawm.

9. Nub hov puab yuav has tas, “Saib maj, nuav yog peb tug Vaajtswv. Peb tub tog rawv nwg sub nwg txhad cawm peb dim. Nuav yog Yawmsaub, peb tub tog rawv nwg. Ca peb zoo sab xyiv faab tsua qhov kws nwg cawm peb dim.”

10. Yawmsaub txhais teg yuav nyob sau lub roob nuav, hab Mau‑a yuav raug muab tsuj pis ntag huv nwg lub chaw, yaam le tsuj quav nyaab huv lub qhov quav chiv.

11. Txawm yog puab tsaa teg huv lub qhov quav chiv hov yaam nkaus le tsaa teg ua luam dej, los Yawmsaub yuav muab puab txujkev khaav theeb hab puab tej taw teg kws txawj txu moog.

12. Tej lub chaw sab faaj xwm ntawm ntsaa loog nwg yuav muab txu moog, yuav muab tsoo kuas pob taag rua huv peg teb xyaw moov aav.