Yaxayas - Đoạn 2

1. Nuav yog tej kws Yawmsaub qha rua Yaxaya kws yog Amoj tug tub pum txug Yuta hab lub nroog Yeluxalee.

2. Yaav tom hauv ntej yuav muaj le nuav, lub roob kws muaj Yawmsaub lub tuam tsev yuav raug muab tsaa ua lub roob kws sab dhau hab yuav raug txhawb nqaa sab dua tej pov roob, hab txhua lub tebchaws yuav sau nthwv tuaj rua sau lub roob ntawd.

3. Ntau haiv tuabneeg yuav tuaj has tas, “Ca le lug, ca peb nce moog sau Yawmsaub lub roob, moog rua huv Yakhauj tug Vaajtswv lub tuam tsev, mas nwg yuav qha nwg txujkev rua peb sub peb txhad taug tau nwg txujkev.” Tsua qhov txuj kevcai yuav tawm huv Xi‑oo tuaj hab Yawmsaub txujlug yuav tawm huv Yeluxalee tuaj.

4. Nwg yuav phua cai rua txhua lub tebchaws, hab nwg yuav tu plaub rua ntau haiv tuabneeg kuas sws hum. Puab yuav muab puab tej ntaaj rag ntaus ua khais laij teb, hab muab puab tej muv ntaus ua lag. Ib lub tebchaws yuav tsw rhu ntaaj ua tsuv ua rog rua ib lub tebchaws, puab yuav tsw kawm txujci ua tsuv ua rog dua le lawm.

5. Yakhauj caaj ceg 'e, ca le lug, ca peb taug Yawmsaub txujkev kaaj.

6. Yawmsaub, koj tau tso koj haiv tuabneeg tseg, yog Yakhauj caaj ceg, tsua qhov puab ua neeb saib yaig puv nkaus tebchaws lawv le cov tuabneeg kws nyob saab nub tuaj, hab puab saib swj saib nyoog ib yaam le cov tuabneeg Filixatee, hab nrug lwm haiv tuabneeg cog lug sws raug zoo.

7. Puab lub tebchaws muaj nyaj muaj kub puv nkaus, hab puab tej nyaj txag tsw txawj taag le. Puab lub tebchaws muaj neeg puv nkaus, hab puab tej tsheb neeg ua rog muaj ntau swv tsw taag.

8. Puab lub tebchaws muaj txoov daab puv nkaus, puab pe hawm tej kws puab txhais teg ua hab pe tej kws puab ntiv teg ua.

9. Mas tuabneeg txhad raug txu fwjchim hab poob qeg kawg. Tsw xob zaam puab lub txem.

10. Ca le nkaag rua huv tej qaab zeb qaab caa, hab moog tswv nraim rua tej qhov aav, tswv kuas dim Yawmsaub txujkev chim hab tswv kuas dhau Yawmsaub tug fwjchim meej mom kws ci ntsaa ab.

11. Cov kws yoj cev quas yeeg khaav theeb yuav poob qeg, hab cov kws muab hlub yuav raug muab rhuav. Yawmsaub tuab leeg xwb txhad raug qhuas ntxhas rua nub ntawd.

12. Yawmsaub kws muaj fwjchim luj kawg nkaus teem ib nub ca rua txhua yaam kws khaav theeb hab muab hlub, hab rua txhua yaam kws tsaab ua luj hab tsaa hau sab

13. hab rua txhua tsob ntoo cab huv Lenpanoo kws sab sab hab tsaa hau sab, hab rua txhua tsob ntoo qheb huv Npasaa,

14. hab rua txhua lub roob sab hab txhua lub pov roob kws tsaa hau sab,

15. hab rua txhua lub chaw tsom faaj kws nyob sab, hab rua txhua lub ntsaa loog kws txhwm zeb khov kho,

16. hab rua Thasi txhua lub nkoj txwg hab rua txhua lub nkoj kws zoo nkauj.

17. Qhov kws tuabneeg khaav theeb yuav raug muab rhuav hab qhov kws tuabneeg muab hlub yuav raug txu qeg. Yawmsaub tuab leeg xwb txhad raug qhuas ntxhas rua nub ntawd.

18. Tej txoov daab yuav pluj plag tsw muaj le lawm.

19. Hab tuabneeg yuav nkaag qhov zeb qhov tsua hab tej qhov aav, kuas dim Yawmsaub txujkev chim hab dhau ntawm Yawmsaub tug fwjchim meej mom kws ci ntsaa ab, rua thaus nwg sawv tseeg cu lub nplajteb ua zug quas kais.

20. Mas nub ntawd tej tuabneeg yuav muab tej txoov daab nyaj txoov daab kub kws puab ua rua puab pe laim pov tseg rua naag kus hab puav.

21. Puab yuav nkaag rua huv tej qhov tsua hab nkaag rua huv tej kem zeb, kuas dim Yawmsaub txujkev chim hab dhau ntawm Yawmsaub tug fwjchim meej mom kws ci ntsaa ab, rua thaus nwg sawv tseeg cu lub nplajteb ua zug quas kais.

22. Tsw xob quav ntsej tej tuabneeg. Puab lub qhov ntswg ua paa ib vuag dua xwb. Puab tswm txaj tug daabtsw?