Tes Haujlwm - Đoạn 4

1. Thaus ob tug tseed qha cov tuabneeg hov cov pov thawj hab tug kws ua thawj saib lub tuam tsev hab cov Xantukai txawm tuaj rua ntawm ob tug.

2. Puab tsw txaus sab tsua qhov kws ob tug qha hab tshaaj tawm tas muaj kev sawv huv qhov tuag rov lug huv Yexu.

3. Puab txhad nteg ob tug coj moog kaw ib mos kaaj ntug rua huv tsev lojfaaj vem yog tsaus ntuj lawm.

4. Cov tuabneeg kws nov ob tug tej lug hov muaj ntau leej ntseeg. Cov txwvneej huvsw kws ntseeg kwvlaam tswb txheeb leej.

5. Thaus taagkig cov kws ua thawj hab cov kev txwj quas laug hab cov xwbfwb qha Vaajtswv kevcai txawm tuaj sablaaj ua ke rua huv Yeluxalee,

6. nrug Ana kws yog tug tuam pov thawj hlub hab Khayafa hab Yauhaa hab Alexaantaw hab txhua tug kws yog tug tuam pov thawj hlub le caaj ceg.

7. Thaus puab coj Petu hab Yauhaa lug sawv ntsug taab meeg, puab nug ob tug tas, “Meb swv leejtwg le fwjchim hab swv leejtwg lub npe ua tej num nuav?”

8. Thaus hov Petu muaj Vaaj Ntsuj Plig kws dawb huv puv npo, nwg txawm has rua puab tas, “Mej cov thawj kws kaav cov pejxeem hab mej cov kev txwj quas laug,

9. yog nub nua mej tshuaj saib ib ob leeg rua qhov zoo kws ib tau ua rua ib tug tuabneeg ceg tawv hab nug tas ua le caag khu tau nwg zoo lawm,

10. mas mej suavdawg hab cov Yixayee suavdawg ca le paub tas tub yog vem Yexu Kheto kws yog tuabneeg Naxale lub npe kws mej muab teem rua sau tug khaublig ntoo hab Vaajtswv tsaa sawv huv qhov tuag rov lug, mas tug yawm kws sawv ntawm mej xubndag nuav txhad zoo hlo.

11. Yexu yog “ ‘lub pob zeb kws cov Kws ua tsev muab xyeeb tseg lawm tub rov muab lug teeb ua lub thawj rua ntawm kaum tsev lawm.’

12. Huv lwm tug yeej tsw muaj kev dim hlo le, tsua qhov thoob plawg huv qaab ntuj nuav tsw muaj dua ib lub npe kws pub rua tuabneeg swv cawm peb dim.”

13. Thaus puab pum Petu hab Yauhaa muaj sab tuab hab paub tas ob tug tsw tau kawm ntawv tsuas zoo le luas tej xwb, puab xaav tsw thoob, hab ncu tau tas ob tug txeev nrug Yexu nyob.

14. Tassws vem puab pum tug yawm kws zoo hov sawv ntsug ntawm ob tug ib saab, puab txhad tsw muaj lug caam hlo le lawm.

15. Thaus puab has kuas ob tug tawm ntawm cov thawj lub rooj sablaaj lawm, puab txawm sablaaj tas,

16. “Peb yuav ua le caag rua ob tug nuav? Tsua qhov ob tug tau ua ib yaam txujci tseem ceeb rua txhua tug kws nyob huv Yeluxalee paub tseeb, mas peb tsw leeg paub kuj tsw tau le.

17. Peb ca le txwv ob tug kuas tsw xob has daabtsw huv lub npe nuav sub zaaj nuav txhad tsw nchaa heev quas zug moog rua huv cov pejxeem.”

18. Puab txhad hu ob tug lug hab txwv kuas ob tug tsw xob has lossws qha huv Yexu lub npe hlo le lawm.

19. Tassws Petu hab Yauhaa teb puab tas, “Mej swm xaav saib, nyob ntawm Vaajtswv xubndag tswm nyog noog mej has zoo dua le noog Vaajtswv has lov?

20. Tsua qhov peb tseg tsw tau qhov kws has txug tej kws peb pum hab tej kws peb nov.”

21. Thaus puab rov txwv tawv tawv dua tes txawm tso ob tug moog. Puab nrhav tsw tau txem rua ob tug vem puab ntshai cov pejxeem, tsua qhov txhua tug qhuas Vaajtswv vem yog tej xwm txheej kws tshwm lug hov.

22. Tug kws mob zoo ntawm txujci tseem ceeb hov noob nyoog plaub caug tawm xyoo lawm.

23. Thaus tso Petu hab Yauhaa lawm, ob tug txawm moog rua huv cov ntseeg hab pav txhua yaam kws cov pov thawj hlub hab cov kev txwj quas laug has rua ob tug.

24. Thaus puab nov lawm puab txawm koom ib lub sab tsaa suab thov Vaajtswv has tas, “Au tug Tswv, koj tswm lub ntuj hab lub nplajteb hab dej havtxwv hab txhua yaam kws muaj nyob huv.

25. Koj kuas Vaaj Ntsuj Plig kws dawb huv swv peb yawm koob Tavi kws yog koj tug qhev lub qhov ncauj has tas, “ ‘Vem le caag lwm haiv tuabneeg yuav npau tawg heev, hab tej tuabneeg ntaus tswvyim phem qhuav qhuav?

26. Tej vaajntxwv huv lub nplajteb kuj sawv twv, cov kws ua thawj tuaj txoos ua ke tawm tsaam tug Tswv hab nwg tug Kheto.’

27. Qhov tseeb huv lub nroog nuav Helauj hab Phauthi‑au Philaj hab lwm haiv tuabneeg hab cov Yixayee tuaj txoos ua ke tawm tsaam Yexu kws yog koj tug qhev kws dawb huv hab koj tsaa ca lawd,

28. sub puab txhad ua txhua yaam lawv le koj txhais teg hab koj lub sab tub teem tseg lawd.

29. Au tug Tswv, nwgnuav thov koj tsaa muag saib qhov kws puab hem, hab thov pub koj cov tub qhe muaj sab tuab has koj tej lug,

30. rua lub swjhawm kws koj cev koj txhais teg khu mob hab ua kuas tej txujci tseem ceeb hab txujci phemfwj tshwm lug huv Yexu kws yog koj tug tub qhe dawb huv lub npe.”

31. Thaus puab thov taag, lub chaw kws puab tuaj txoos ua ke hov txawm ua zug quas kais, mas puab puv npo Vaaj Ntsuj Plig kws dawb huv hab puab muaj sab tuab has Vaajtswv tej lug.

32. Cov kws lug ntseeg hov koom ua ib lub sab. Tsw muaj leejtwg yuav has tas nwg tej hov txhua chaw yog nwg le xwb, tassws puab muab txhua yaam ua suavdawg le.

33. Cov tubkhai has lug muaj fwjchim luj kawg ua timkhawv txug qhov kws tug Tswv Yexu caj sawv rov lug, hab Vaajtswv txujkev hlub nrug nraim puab txhua tug.

34. Mas puab cov tsw muaj ib tug tu ncua ib yaam daabtsw, tsua qhov txhua tug kws muaj laj teb hab vaaj tse kuj muab muag hab coj tej nyaj kws muag tau ntawd

35. tuaj tso rua ntawm cov tubkhai kwtaw, mas muab faib rua txhua tug lawv le kws cheem tsum.

36. Yauxej kws cov tubkhai hu tas Npananpa (kws txhais has tas, tug tub kws txhawb sab) yog ib tug Levi kws yog tuabneeg Xaipla,

37. nwg muaj ib daim teb, nwg muab muag hab coj cov nqe teb hov tuaj tso rua ntawm cov tubkhai kwtaw.