Tes Haujlwm - Đoạn 10

1. Muaj ib tug yawm npe hu ua Khaunelia nyob huv lub moos Xixaleya, nwg yog ib tug thawj rog kws kaav ib puas leej nyob huv paab tub rog kws hu ua Ithali Paab.

2. Nwg hab nwg tsev tuabneeg coj Vaajtswv kevcai nruj hab paub ntshai Vaajtswv, nwg pub rua tej tuabneeg txom nyem ntau heev hab thov Vaajtswv tsw tu ncua.

3. Thaus kwvlaam nub qaij peb teev tug thawj rog hov ua yug quas toog pum ib tug tubkhai ntuj lug has rua nwg tas, “Khaunelia 'e.”

4. Nwg saib dheev tug tubkhai ntuj hov hab ntshai heev hab has tas, “Yawm hlub, nuav yog daabtsw?” Tug tubkhai ntuj has rua nwg tas, “Koj tej lug thov hab tej kws koj muab pub rua luas tub nce moog txug Vaajtswv ua lub chaw kws Vaajtswv ncu txug koj lawm.

5. Nwgnuav koj ca le khaiv tuabneeg moog rua lub moos Yaupa hab coj Ximoo kws hu ua Petu tuaj.

6. Nwg nyob huv tug Ximoo Kws luam tawv lub tsev kws nyob ntawm ntug havtxwv.”

7. Thaus tug tubkhai ntuj kws has rua nwg moog lawm, Khaunelia txawm hu ob tug tub qhe hab ib tug tub rog kws fwm Vaajtswv nruj huv cov kws ua koom rua nwg lug.

8. Thaus nwg pav txhua yaam rua puab noog lawm nwg khaiv puab moog rua lub moos Yaupa.

9. Nub tom qaab thaus peb tug nuav taug kev moog yuav txug lub moos Yaupa mas kwvlaam taav su Petu txawm nce moog thov Vaajtswv sau txheej tsev laag tshaav.

10. Nwg txawm tshaib plaab xaav noj mov. Thaus puab tseed ua su nwg txawm ua yug quas toog

11. pum rooj ntug qheb hab pum ib yaam zoo le ib daim ntaub daav daav khi plaub lub kaum tso nqeg lug rua huv lub nplajteb.

12. Huv daim ntaub hov muaj txhua yaam tsaj plaub txhais teg taw, hab tsaj nkaag huv aav hab naag noog sau nruab ntug.

13. Txawm muaj ib lub suab has tuaj rua nwg has tas, “Petu, ca le sawv tseeg muab tua noj.”

14. Petu has tas, “Tsw tau, tug Tswv. Yaam kws qas hab tsw dawb huv kuv tsw txeev noj hlo le.”

15. Lub suab rov has zag ob rua nwg tas, “Yaam kws Vaajtswv muab ntxuav lawm koj tsw xob has tas qas.”

16. Muaj le hov txug peb zag tes daim ntaub txawm raug muab nqaa moog rua sau ntuj taamswm lawm.

17. Thaus Petu tseem tsw pum qaab xaav txug zaaj yug quas toog hov lub ntsab yog daabtsw, tes taamswm ntawd cov tuabneeg kws Khaunelia khaiv tuaj txawm tuaj nug nrhav tau Ximoo lub tsev. Puab tuaj txug sawv saab nrau rooj vaag,

18. hab hu nug tas tug Ximoo kws hu ua Petu puas nyob ntawm nuav.

19. Thaus Petu tseed saamswm xaav txug zaaj yug quas toog hov, Vaaj Ntsuj Plig txawm has rua nwg tas, “Saib maj, muaj peb tug yawm tuaj nrhav koj.

20. Ca le sawv tseeg nqeg moog rua txheej huv qaab hab nrug puab moog tsw xob ua xyem xyaav, vem yog kuv khaiv puab tuaj.”

21. Petu txhad nqeg moog ntswb puab hab has tas, “Kuv yog tug kws mej tuaj nrhav ntaag. Mej tuaj tug kev daabtsw?”

22. Puab has tas, “Khaunelia yog ib tug thawj rog kaav ib puas leej hab yog ib tug ncaaj nceeg paub ntshai Vaajtswv hab yog ib tug muaj koob meej huv ib tsoom Yutai huvsw. Muaj ib tug tubkhai ntuj kws dawb huv kuas Khaunelia hu koj moog rua huv nwg lub tsev es yuav noog koj tej lug qha.”

23. Petu txhad hu puab lug su rua huv tsev. Nub tom qaab nwg sawv kev nrug puab moog, hab cov kwvtij qee leej huv lub moos Yaupa kuj nrug nwg moog hab.

24. Dhau dua ib nub tom qaab puab le moog txug lub moos Xixaleya. Khaunelia saamswm tog ntsoov puab hab hu nwg tej kwvtij kwvluag tuaj txoos ua ke.

25. Thaus Petu tuaj txug Khaunelia tuaj tog nwg hab pe khwb ti nkaus ntawm nwg kwtaw.

26. Petu ntsab nkaus Khaunelia tsaa sawv, hab has tas, “Ca le sawv, kuv kuj tsuas yog tuabneeg hab xwb.”

27. Thaus saamswm has lug Petu nkaag moog huv tsev mas pum tuabneeg nyob ua ke coob coob,

28. tes nwg txawm has rua puab tas, “Mej yeej paub tas qhov kws ib tug Yutai moog tshaam hab koom nrug lwm haiv tuabneeg ua ke yog yaam kws txhum kevcai heev. Tassws Vaajtswv qha tshwm rua kuv tas yuav tsw xob has tas ib tug twg qas lossws tsw dawb huv.

29. Vem le nuav, thaus mej hu kuv tuaj kuv txhad le tuaj tsw khuam cheem daabtsw. Kuv thov nug mej tas mej hu kuv tuaj tug kev daabtsw?”

30. Khaunelia has tas, “Tau plaub nub lug lawm kuv saamswm thov Vaajtswv huv kuv tsev kwvlaam lub swjhawm nuav yog nub qaij peb teev, txawm muaj ib tug yawm sawv ntawm kuv xubndag naav tsoog tsho ci nplaag.

31. Tug hov has tas, ‘Khaunelia, Vaajtswv tub nov koj tej lug thov hab ncu txug tej kws koj pub rua cov txom nyem lawm.

32. Vem le nuav ca le khaiv tuabneeg moog rua lub moos Yaupa hu Ximoo kws hu ua Petu tuaj. Nwg nyob huv tug Ximoo Kws luam tawv lub tsev ntawm ntug havtxwv.’

33. Kuv txhad khaiv tuabneeg moog hu koj taamswm, mas qhov kws koj tuaj kuj zoo lawm. Lub swjhawm nuav peb suavdawg nyob txhwj zog taab meeg Vaajtswv, tog noog txhua yaam kws tug Tswv kuas koj has.”

34. Petu txawm qheb ncauj has tas, “Kuv pum tseeb lawm tas Vaajtswv tsw saib leejtwg ntsej muag,

35. hab huv txhua haiv tuabneeg tug kws paub ntshai Vaajtswv hab xyum ncaaj nceeg kuj yog txaus Vaajtswv lub sab.

36. Mej yeej paub txug tej lug kws Vaajtswv muab cob rua cov Yixayee, yog qhov kws nwg pav txuj xuv zoo kws has txug nyob sab tug yeeg huv Yexu Kheto kws yog suavdawg tug Tswv.

37. Mej yeej paub tej xwm txheej kws tshwm thoob plawg lub xeev Yutia yog chiv huv lub xeev Kalilai ua qaab tug Yauhaa kws coj ua kevcai raus dej tshaaj tawm hov,

38. yog qhov kws has tas Vaajtswv muab Vaaj Ntsuj Plig kws dawb huv hab muab tug fwjchim laub rua huv Yexu kws yog tuabneeg Naxale le caag, hab qhov kws has tas Yexu moog moog lug lug ua tej num zoo hab khu txhua tug kws raug daab tswm txom le caag, vem yog Vaajtswv nrug nraim Yexu.

39. Peb ua timkhawv txug tej num huvsw kws nwg ua rua huv lub xeev Yutia hab huv lub nroog Yeluxalee. Puab muab nwg dai rua sau tug ntoo tua pov tseg

40. mas nub peb Vaajtswv tsaa nwg caj sawv rov lug hab pub nwg tshwm rua peb,

41. tsw yog tshwm rua tej tuabneeg suavdawg tassws tshwm rua peb pum xwb yog cov timkhawv kws Vaajtswv xaiv ca lawd. Ua qaab kws nwg caj sawv huv qhov tuag rov lug peb kuj nrug nwg noj haus ua ke.

42. Nwg has kuas peb tshaaj tawm hab ua timkhawv rua suavdawg tas Vaajtswv tub tsaa Yexu ua tug kws txav txem rua cov tuabneeg caj hab cov tuabneeg tuag.

43. Cov xwbfwb cev Vaajtswv lug suavdawg kuj ua timkhawv txug Yexu tas txhua tug kws ntseeg nwg tau txais kev zaam txem huv Yexu lub npe.”

44. Thaus Petu tseed saamswm has tej lug hov, Vaaj Ntsuj Plig kws dawb huv txawm lug rua sau txhua tug kws nov tej lug ntawd.

45. Cov kws tub ua kevcai txav hab ntseeg kws nrug Petu tuaj kuj phemfwj heev vem tas Vaajtswv hliv Vaaj Ntsuj Plig kws dawb huv rua lwm haiv tuabneeg hab,

46. tsua qhov puab nov cov tuabneeg hov has lwm yaam lug hab qhuas ntxhas Vaajtswv. Petu txawm has tas,

47. “Leejtwg yuav txwv tau cov tuabneeg nuav kws tau txais Vaaj Ntsuj Plig kws dawb huv ib yaam le peb, tsw pub puab ua kevcai raus dej?”

48. Petu txhad has kuas muab puab ua kevcai raus dej huv Yexu Kheto lub npe. Puab thov kuas Petu nrug puab nyob ob peb nub.