Pajlug - Đoạn 8

1. Ca le noog tswvyim lub suab hu. Kev txawj ntse tsw tsaa lub suab hu lov?

2. Tswvyim sawv sau qhov chaw sab ntawm ntug kev, hab ntawm tej kev tshuam.

3. Tswvyim nyob ntawm ib saab rooj loog kws nkaag moog rua huv lub nroog hu nrov nrov has tas,

4. “Tuabneeg 'e, kuv hu mej, kuv tsaa suab hu ib tsoom tuabneeg.

5. Mej cov tuabneeg tsw thoob tswb 'e, ca le kawm kuas paub qaabhau, mej cov tuabneeg ruag 'e, ca le kawm kuas nkaag sab.

6. Ca le noog los maj, tsua qhov kuv yuav has txug tej kws zoo tshaaj plawg, hab tej kws raug cai yuav tawm huv kuv daim tawv ncauj lug,

7. tsua qhov kuv lub qhov ncauj yuav has qhov tseeb xwb, kuv daim tawv ncauj ntxub tej kev limham kawg le.

8. Txhua lu lug kws kuv lub qhov ncauj has puavleej yog lug ncaaj nceeg, tsw muaj ib lus daag hab ib lus nkhaus le.

9. Tug kws txawj to taub yuav pum tas kuv tej lug puavleej ncaaj, tug kws kawm kev txawj ntse yuav pum tas kuv tej lug raug cai lawm.

10. Ca le khaws kuv tej lug qhuab qha zoo dua le khaws nyaj, ca le khaws kev txawj ntse zoo dua le khaws cov tseem kub,

11. tsua qhov tswvyim zoo dua le npauj nyaj npauj kub, hab txhua yaam kws koj ntshaw tsw muaj ib yaam zoo cuag le tswvyim.

12. “Kuv yog tswvyim, kuv muaj taab faab, hab kuv nrhav tau kev txawj ntse hab paub txhwj paub txhua.

13. Qhov kws fwm hab paub ntshai Yawmsaub yog ntxub txujkev phem. Kuv ntxub kev khaav theeb kev muab hlub, kev phem kev qas hab lub ncauj ntxeev xaiv.

14. Kuv yog lub chaw sablaaj ntxwg nug hab muaj tswvyim, kuv thoob tswb to nrog hab muaj zug.

15. Vem muaj kuv, tej vaajntxwv txhad kaav tau tebchaws, hab tej num tswv txhad rhawv tau kevcai ncaaj nceeg.

16. Vem yog muaj kuv, cov thawj txhad kaav tau tebchaws, hab cov kws muaj meej mom txhad kaav tau thoob nplajteb.

17. Kuv hlub cov kws muab sab npuab kuv, hab cov kws swv zug nrhav kuv kuj ntswb kuv.

18. Kev muaj txag hab koob meej, hab peev nyaj qaab naas nas qaab zeg hab kev vaam meej nrug nraim kuv.

19. Tej txaj ntswg kws koj tau ntawm kuv zoo dua kub, zoo dua cov tseem kub, tej kws koj tau ntawm kuv zoo dua cov tseem nyaj.

20. Kuv taug txujkev ncaaj nceeg hab moog lawv le txujkev ua ncaaj.

21. Kuv pub nyaj txag rua cov kws muab sab npuab kuv, hab pub kuas puab lub txhaab nyaj puv nkaus.

22. “Thawj ntswg num kws Yawmsaub ua yog nwg tau tswm kuv, kuv yog thawj yaam kws thau u nwg tswm.

23. Nwg tswm kuv thau u lug lawm, thaus chiv keeb nwg tswm kuv ua ntej kws tsw tau muaj lub nplajteb.

24. Thaus tsw tau muaj dej havtxwv tub yug kuv lawm, yog thaus tsw tau muaj tej qhov dej kws txhawv ntau.

25. Ua ntej kws tsw tau tswm tej roob hab ua ntej kws tsw tau muaj tej pov roob, tub yug kuv lawm,

26. yog thaus Yawmsaub tsw tau tswm lub nplajteb hab tej laj teb, hab tsw tau tswm tej aav huv nplajteb.

27. Thaus nwg tswm lub ntuj kuas nyob ruaj, hab thaus nwg kuam ib tug nrwm rua dej havtxwv, kuv yeej nyob hov ntawd lawm,

28. yog thaus nwg tswm lub ntuj kuas ruaj khov, hab thaus nwg ua kuas dej txhawv huv nruab tiv txwv lug,

29. yog thaus nwg kem nrwm rua dej havtxwv, dej txhad tsw nyaab dhau qhov kws nwg tso cai, hab thaus nwg ntsuag pua daim laag zeb tag lub nplajteb.

30. Kuv nyob ntawm Yawmsaub ib saab, ib yaam nkaus le tug Kws ua tsev kuv ua rua nwg muaj kev zoo sab txhua nub, kuv xyiv faab rua ntawm nwg xubndag tsw tu le.

31. Kuv xyiv faab rua lub nplajteb kws yog nwg le hab xyiv faab rua ib tsoom tuabneeg.

32. “Kuv cov tub 'e mej ca le noog kuv has. Cov kws tuav rawv kuv txujkev yuav tau nyob kaaj sab lug.

33. Ca le noog lug qhuab qha, ca le txawj ntse, hab tsw xob tso tej lug qha pov tseg.

34. Tug kws noog kuv has yuav tau nyob kaaj sab lug, yog tug kws naj nub zuv tog ntawm kuv lub rooj loog, hab tog ntawm kuv ib saab qhov rooj.

35. Tug kws nrhav tau kuv kuj nrhav tau txujsa, hab tau kev hlub ntawm Yawmsaub.

36. Tassws tug kws nplaam kuv lawm, nwg ua rua nwg mob xwb, txhua tug kws ntxub kuv kuj yog nyam kev pluj kev tuag.”