Pajlug - Đoạn 4

1. Kuv cov tub 'e, mej ca le noog mej txwv tej lug qhuab qha, hab ua tuab zoo noog, mej txhad le txawj ntse.

2. Tej lug kws kuv qhuab qha mej zoo heev, tsw xob muab kuv tej lug pov tseg.

3. Thaus kuv tseed yau kws nrug kuv txwv nyob, hab yog tuab tug tub mog kws nyob huv kuv nam lub qhov muag,

4. mas kuv txwv qha kuv hab has rua kuv tas, “Koj ca le tuav rawv kuv tej lug rua huv koj lub sab, ua lawv le kuv tej lug nkaw txhad muaj txujsa nyob.

5. Ca le nrhav kuas tau tswvyim hab kev txawj ntse, tsw xob nov qaab, tsw xob tig ntawm tej lug kws kuv lub qhov ncauj has.

6. Tsw xob muab tswvyim tso pov tseg, mas nwg yuav tsom kwm koj, ca le nyam nwg, mas nwg yuav tiv thaiv koj.

7. Lub hauv paug kws muaj tswvyim yog le nuav, yuav tsum nrhav kuas tau tswvyim, txawm yog koj khaws tau daabtsw kuj xwj, koj yuav tsum khaws kuas tau kev txawj ntse.

8. Yuav tsum fwm tswvyim heev, mas nwg yuav txhawb nqaa koj. Yog koj puag rawv tswvyim, nwg yuav pub koob meej rua koj.

9. Nwg yuav muab lub mom paaj muaj meej ua rua koj ntoo, hab yuav muab lub mom kub zoo nkauj rua koj.”

10. Kuv tub 'e, ca le noog hab khaws kuv tej lug ca, sub koj txujsa txhad le nyob ntev naj ntau xyoo.

11. Kuv tub qha tswvyim txujkev rua koj, kuv tub coj koj ua lub sab ncaaj.

12. Thaus koj taug kev yuav tsw muaj daabtsw thaiv koj kev, thaus koj dha koj yuav tsw dawm.

13. Ca le tuav rawv tej lug qhuab qha ua neej, tsw xob muab tso tseg, ca le muab tej lug qha ceev ca tsua qhov tej lug ntawd yog koj txujsa.

14. Koj tsw xob nkaag moog rua huv tej tuabneeg limham txujkev, tsw xob taug cov tuabneeg phem txujkev.

15. Yuav tsum zos kev tsw xob taug txuj ntawd, ca le zos moog kuas dhau.

16. Cov tuabneeg phem yog tsw tau ua txhum mas pw tsw tsaug zug, yog puab tsw tau ua rua leejtwg dawm qaug mas puab tsw tuaj daab ndub.

17. Puab tej mov noj yog qhov kws puab ua limham, puab tej cawv txwv maab haus yog qhov kws puab ua nruj ua tswv.

18. Tassws cov ncaaj nceeg txujkev mas zoo yaam nkaus le tug duab tshaav ntuj kws ci zuj zug thaus taagkig moog txug thaus tshaav ntuj kub lawm.

19. Cov tuabneeg limham txujkev mas tsaus ntuj nti, puab tsw paub tas puab dawm daabtsw.

20. Kuv tub 'e, ua tuab zoo noog kuv tej lug, tig koj lub qhov ntsej noog tej kws kuv has.

21. Koj tsw xob ca kuv tej lug tswv dhau ntawm koj lub qhov muag moog, koj yuav tsum khaws ca rua huv koj lub sab,

22. tsua qhov kuv tej lug yog txujsa rua tug kws nrhav tau, hab ua rua tug hov lub cev nyob zoo huvsw.

23. Koj yuav tsum ua tuab zoo tswj koj lub sab rua txhua faab tsua qhov txujsa txhawv tawm huv lub sab lug.

24. Ca le muab koj tug nplaig nkhaus pov tseg, hab muab tej lug daag tshem deb ntawm koj lub qhov ncauj.

25. Ca koj lub qhov muag saib ncaaj nraim rua tom hauv ntej, hab ca koj tsom ntsoov koj lub hauv ntej saib xwb.

26. Koj yuav tsum saib ntsoov txujkev kws koj txhais taw taug, koj txhua txujkev txhad le ruaj.

27. Tsw xob tig rua saab xws lossws tig rua saab phem, ca koj txhais kwtaw tig hlo ntawm txujkev ua phem.