Pajlug - Đoạn 31

1. Nuav yog Lemu‑ee kws yog vaajntxwv huv lub moos Maxas tej lug kws nwg nam qha rua nwg.

2. “Kuv tub 'e, kuv tug tub kws kuv yug, au kuv tug tub kws kuv cog lug tseg,

3. tsw xob nkim koj tug zug rua ntau tug quaspuj, tsw xob muab koj tug kheej rua cov kws txuv tau vaajntxwv puam tsuaj.

4. Au Lemu‑ee, tsw tswm nyog le, tsw tswm nyog kws vaajntxwv yuav haus cawv txwv maab, lossws cov thawj kaav ntshaw haus cawv ntxws,

5. tsaam puab haus tes puab tsua nov qaab tej lug kws nyob huv txuj kevcai, hab qhau txhua tug kws raug kev txom nyem txujcai.

6. Ca le muab cawv ntxws rua tug kws saamswm puam tsuaj, hab muab cawv txwv maab rua cov kws nyuaj sab kawg.

7. Ca puab haus puab txhad nov qaab puab txujkev pluag, hab tsw ncu puab txujkev ab kev khwv dua le lawm.

8. Koj ca le rua ncauj paab cov kws tsw txawj has lug has puab tej plaub, hab paab has txhua tug kws raug luas tso tseg lawm txujcai.

9. Ca le rua ncauj tu plaub ncaaj nceeg, hab tuav cov kws pluag hab txom nyem txujcai.”

10. Tug quaspuj kws zoo mas leejtwg nrhav tau? Nwg tswm txaj dua tej npauj nyaj npauj kub.

11. Tug quasyawg tso sab plhuav rua nwg, hab nwg yuav tsw tu ncua ib yaam daabtsw le.

12. Nwg ua zoo rua tug quasyawg, tsw ua phem ib swm neej le.

13. Nwg nrhav plaub yaaj hab xuv maaj, nwg swv nwg txhais teg rau sab ntso ua num.

14. Nwg zoo yaam nkaus le tub laag tub luam lub nkoj txwg, nwg coj nwg tej zaub mov deb deb le lug.

15. Nwg sawv ntxuv thaus tsaus ntuj nti hab npaaj zaub mov rua nwg tsev tuabneeg noj, hab tu daag num rua nwg tej nkauj qhev ua.

16. Nwg ua tuab zoo saib tej laj teb mas rhu nyaj yuav ca, nwg swv tej nyaj txag kws nwg khwv tau cog txwv maab.

17. Nwg sa hlaab sev khov kho kuas muaj zug npho, nwg teg txawj teg nquag.

18. Nwg pum ntsoov nwg kev laag luam muaj tshaaj thawj. Mo ntuj los nwg taws teeb ua num.

19. Nwg txhais teg saws ntuag tshuab ntuag qaiv ntxaiv.

20. Nwg sab daav paab tej pluag, nwg cev teg paab cov txom nyem.

21. Nwg tsw ntshai daus xwb daus npu lug txug nwg tsev tuabneeg tsua qhov nwg tsev tuabneeg txhua tug tub muaj tsoog tsho suv lawm.

22. Nwg ntus ntaub pua nwg chaw pw, nwg naav tej tsoog tsho ntaub maag kws zoo zoo hab ntaub yimlaaj.

23. Nwg tug quasyawg yog tug kws suavdawg paub zoo ntawm rooj loog rua thaus nrug ib tsoom kev txwj quas laug sablaaj.

24. Nwg muab tej ntaub maag xaws tsoog tsho muag hab xaa tej hlaab sa rua tub luam.

25. Nwg tug zug hab nwg tej kev zoo yog lub zaam kws nwg naav, nwg luag tej xwm txheej kws yuav tshwm lug tom hauv ntej.

26. Nwg rua ncauj has lug ntse ntsuav, nwg tug nplaig qha luas ntawm txujkev hlub.

27. Nwg ua tuab zoo tu nwg tsev tuabneeg, nwg tsw nyob nkaum teg nkoog.

28. Nwg tej mivnyuas kuj qhuas nwg ncu nwg txaj ntswg, nwg tug quasyawg kuj qhuas nwg has tas,

29. “Tej quaspuj ntau leej ua zoo kawg, tassws koj yog tug zoo tshaaj dua puab huvsw.”

30. Ncauj lug zoo yog daag ntxag xwb hab qhov zoo nkauj tsw muaj qaabhau, tassws tug quaspuj kws fwm hab paub ntshai Yawmsaub mas tswm nyog qhuas.

31. Ca le muab nqe zug rua tej num kws nwg txhais teg ua, hab ca suavdawg qhuas nwg ntawm rooj loog vem nwg teg num zoo.