Pajlug - Đoạn 30

1. Yakhe tug tub Aku kws nyob huv lub moos Maxas tej lug. Aku has rua Ithi‑ee, nwg has rua Ithi‑ee hab Ukhaa tas,

2. “Qhov tseeb kuv ruag dhau kws yuav ua tau tuabneeg, kuv tsw paub taab le tej tuabneeg.

3. Kuv tsw tau kawm paub tswvyim, hab tsw paub Vaajtswv tug kws dawb huv.

4. Leejtwg tau nce moog rua sau ntuj kaag hab nqeg rov lug? Leejtwg muab tau cua lug tuav rua huv xwb teg? Leejtwg muab ntaub qhwv tau dej ca? Leejtwg tu nrwm rua lub nplajteb nyob? Nwg lub npe hu le caag, hab nwg tug tub npe hu le caag? Mej yeej los paub.

5. “Muab Vaajtswv txhua lu lug tshuaj saib mas pum tas muaj tseeb tag, Vaajtswv yog daim hlau thaiv cov kws moog nraim cev rua huv nwg.

6. Tsw xob ntxwv ib lu lug rua huv nwg tej lug, ntshai tsaam nwg yuav ntuag koj hab luas yuav pum tas koj yog tug daag.

7. Vaajtswv, kuv thov ob yaam ntawm koj, thov pub rua kuv ua ntej kws kuv tsw tau tuag.

8. Thov muab tej lug tsw muaj tseeb hab tej lug daag ntab tswv deb ntawm kuv, thov tsw xob ca kuv pluag hab tsw xob ca kuv nplua nuj, thov pub rua kuv noj kuas txaus nkaus xwb,

9. tsaam kuv noj tsau tes tsw leeg yuav koj hab has tas, ‘Yawmsaub yog leejtwg?’ lossws tsaam kuv pluag hab ua tub saab hab ua puag tsuas kuv tug Vaajtswv lub npe.

10. “Tsw xob thuaj tug tub qhe rua tug lospaav noog, tsaam tug tub qhe foom koj tes koj yuav raug txem.

11. Muaj tej tug foom tsw zoo rua nwg txwv, hab tsw foom koob moov rua nwg nam.

12. Muaj tej tug nwg xaam pum tas nwg dawb huv, tassws kuj tsw tau ntxuav kev phem kev qas pov tseg.

13. Muaj tej tug mas nwg taubhau sab, hab lub qhov muag saib tsw taug lwm tug.

14. Muaj tej tug nwg kaug nav yog nav ntaaj, hab nwg nav yog nav rag, mas nwg yuav noj cov pluag kuas taag huv nplajteb hab cov tuabneeg txom nyem kuas pluj taag huv ib tsoom tuabneeg.

15. “Nplaj hab muaj ob tug mivnyuas yog maum, pheej qw has tas, ‘Pub, pub.’ Muaj peb yaam pheej tsw tsau, muaj plaub yaam tsw has ib zag tas, ‘Txaus lawm,’ yog le nuav,

16. tub tuag teb hab tug puj mooj, hab lub nplajteb pheej nqhes dej, hab suavtawg tsw has ib zag tas, ‘Txaus lawm.’

17. “Lub qhov muag kws thuaj luag leej txwv hab saib tsw taug leej nam hab tsw noog lug, yuav raug uab voj kws nyob huv haav tho hab raug daav noj twm noj.

18. Muaj peb yaam kws kuv phemfwj kawg, muaj plaub yaam kws kuv tsw nkaag sab, yog le nuav,

19. qhov kws tug daav yaa sau nruab ntug, hab qhov kws naab ndaug sau pob zeb, hab qhov kws lub nkoj moog rua huv plawv havtxwv, hab qhov kws hluas nkauj hluas nraug sws nyam.

20. “Tug quaspuj kws moog deev luas quasyawg ua lub neej zoo le nuav, nwg noj taag so qhov ncauj tes nwg has tas, ‘Kuv tsw tau ua txhum daabtsw le.’

21. Muaj peb yaam kws ua rua lub nplajteb tseeg quas nkawg, muaj plaub yaam kws lub nplajteb thev tsw taug, yog le nuav,

22. tug qhev tau ua vaajntxwv, hab tug ruag tau noj tsau npo,

23. hab tug quaspuj kws tsw muaj leejtwg nyam tau quasyawg, hab tug nkauj qhev tau nyob nwg tug puj lospaav chaw.

24. “Muaj plaub yaam huv nplajteb nuav kws miv kawg tassws muaj tswvyim tshaaj plawg, yog le nuav,

25. ntsaum yog ib co kws tsw muaj zug tassws thaus lub caij sau qoob ntsaum kuj npaaj tej kws noj khaws ca,

26. ntxwm tsua kuj yog ib co kws tsw muaj zug los nwg ua zeg rua huv tej kem zeb,

27. kooj ntaas tsw muaj vaajntxwv los nwg tseed moog tau ua ib kaab saab,

28. quav tuj quav taug koj nteg tau huv koj txhais teg los nwg tseed tau nyob huv vaajntxwv tsev.

29. “Muaj peb yaam kws txawj moog kev zoo nkauj, muaj plaub yaam kws txawj tshais ruam zoo saib, yog le nuav,

30. tsuv ntxhuav kws yog tug tsaj kws muaj zug tshaaj plawg hab tsw thim tswv ntawm lwm yaam le,

31. tug lauv qab cooj kws moog kev khov kho, hab tug txwv tshws, hab tug vaajntxwv kws moog kev ua cov pejxeem ntej quas ndais.

32. “Yog koj tsw paub taab es koj tsaab ua luj lossws yog koj ntaus tswvyim ua phem, ca le muab koj txhais teg pus koj lub qhov ncauj.

33. Yog tsu kua mig txha tau kua mig nyeem, yog tsu qhov ntswg txhad tau ntshaav, hab yog tshaum kuas chim txhad tau kev sws caav sws tshe.”