Pajlug - Đoạn 28

1. Cov tuabneeg limham ca le tswv, tub tsw muaj leejtwg lawv, tassws cov ncaaj nceeg muaj lub sab tuab ib yaam le tsuv ntxhuav.

2. Thaus muaj kev faav xeeb rua huv lub tebchaws mas muaj ntau leej sawv kaav, tassws muaj tug kws thoob tswb hab txawj ntse mas lub tebchaws yuav nyob ruaj nreeg ntev.

3. Tug tuabneeg pluag kws quab yuam cov pluag zoo yaam nkaus le pluav naag kws hlub kawg ua rua qoob loos pam taag.

4. Cov kws muab txuj kevcai tso tseg yeej qhuas cov tuabneeg limham, tassws cov kws tuav rawv txuj kevcai kuj tawm tsaam puab.

5. Cov tuabneeg phem tsw to taub txujkev ua ncaaj, tassws cov kws nrhav Yawmsaub mas to taub huvsw.

6. Tug tuabneeg pluag kws taug txujkev ncaaj nceeg kuj zoo dua tug tuabneeg nplua nuj kws ua nkhib nkhaus.

7. Tug kws tuav rawv txuj kevcai yog tug tub kws ntse, tassws tug kws nrug tug tuabneeg tsw tsheej haaj ua phoojywg ua rua leej txwv poob ntsej muag.

8. Tug kws sau paaj nyag ntau hab nrhav nyaj lug tsaav rua nwg txhaab nyaj, tsuas yog nwg khaws ca rua lwm tug tau hlub tej pluag xwb.

9. Yog leejtwg tsw quav ntsej txuj kevcai, mas nwg tej lug thov yog yaam kws Yawmsaub ntxub xwb.

10. Tug kws coj tug ncaaj nceeg yuam kev taug txujkev phem, nwg yuav poob rua huv nwg lub qhov taub. Tassws tug kws tsw tau ua txhum yuav tau tej qub txeeg qub teg kws zoo.

11. Tug kws nplua nuj nwg pum tas nwg txawj ntse, tassws tug pluag kws thoob tswb to nrog yeej paub tug nplua nuj zoo le caag.

12. Thaus tug ncaaj nceeg kov yeej, muaj kev zoo sab xyiv faab ntau heev, tassws thaus tug tuabneeg limham tau fwjchim tej tuabneeg kuj moog tswv nraim.

13. Tug kws npog nwg tej kev txhum ca yuav tsw vaam meej, tassws tug kws leeg lub txem hab tso tej kev txhum tseg yuav tau kev khuvleej.

14. Tug kws fwm hab paub ntshai Yawmsaub tsw tu le, yuav tau nyob kaaj sab lug, tassws tug kws ua lub sab tawv yuav poob rua huv vej sub vej sw.

15. Tug thawj coj limham kws kaav tej tuabneeg pluag kuj zoo yaam nkaus le tug tsuv ntxhuav nyooj quas lawg lossws yaam le tug dais kws dha lug tum.

16. Tug thawj coj kws tsw thoob tswb to nrog kuj quab yuam nyaum heev, tassws tug kws ntxub tej kws tau ntawm kev ua tsw ncaaj nwg lub naj lub xyoo yuav ntev moog.

17. Leejtwg tua lwm tug es muaj vej sub vej sw lawm mas ca nwg tswv moog taag swm neej tsw xob kheev leejtwg paab nwg.

18. Tug kws ua lub neej ncaaj yuav tau kev cawm dim, tassws tug kws ua nkhib nkhaus yuav poob qhov taub.

19. Tug kws laij laj yuav muaj mov noj ntau, tassws tug kws ua tej num tsw muaj qaabhau yuav pluag heev.

20. Tug kws ua ncaaj yuav tau moov zoo ntau, tassws tug kws maaj nplua nuj yuav tsw dim kev teem txem.

21. Qhov kws saib dej ua ntu saib tuabneeg plhu mas tsw zoo, tassws tau ib pluag mov xwb tes yeej yuav ua tsw ncaaj.

22. Tug kws qa dub maaj nroog nrhav nyaj txag, tassws nwg tsw paub tas kev txom nyem yuav lug raug nwg.

23. Tug kws qhuab ntuag luas mas luas yuav rov hlub nwg heev dua tug kws lub qhov ncauj qaab zwb nplaig qaab ntse.

24. Tug kws nyag nwg nam nwg txwv tej hov txhua chaw los tseed has tas, “Tsw txhum,” kuj yog nwg nrug tug kws ua kev puam tsuaj ua phoojywg.

25. Tug kws sab hlub tshaum kuas muaj kev sws caav sws tshe, tassws tug kws tso sab rua Yawmsaub yuav vaam meej.

26. Tug kws tso sab rua tej kws nwg xaav kuj yog ruag, tassws tug kws ua lawv le tswvyim yuav tau kev cawm dim.

27. Tug kws pub rua tej pluag nwg yuav tsw tu pluag, tassws tug kws qe muag nti tsw hlub tej pluag yuav raug foom tsw zoo heev kawg.

28. Thaus cov tuabneeg limham tau fwjchim tej tuabneeg kuj moog tswv nraim, tassws thaus puab puam tsuaj taag lawm, cov kws ncaaj nceeg yuav fuam vaam coob tuaj.