Pajlug - Đoạn 25

1. Ntawm nuav yog Xalaumoo tej paaj lug kws Yuta tug vaajntxwv Hexekhiya cov tub teg tub taw sau ca.

2. Qhov kws Vaajtswv muaj koob meej yog qhov kws nwg npog ntau yaam ca, tassws qhov kws tej vaajntxwv tau koob meej yog qhov kws puab tshawb tau ntau yaam tshwm lug.

3. Lub ntuj nyob sab le caag hab lub nplajteb nyob tub le caag, kuj tshawb tsw tau tej vaajntxwv lub sab taag ib yaam le ntawd.

4. Ca le muab tej quav nyaj nchuav kuas tawm moog, mas txhad tau cov tseem nyaj rua tug Kws ua taig.

5. Ca le muab cov tuabneeg limham lawv tawm ntawm tug vaajntxwv xubndag moog, nwg lub zwm txwv txhad yuav nyob ncaaj nceeg moog le.

6. Tsw xob moog sawv tsaab ua luj rua ntawm vaajntxwv xubndag hab tsw xob moog sawv ntawm cov kws ua hlub lub chaw,

7. Qhov kws luas has tas, “Nce lug rua ntawm nuav,” zoo dua le raug muab lawv nqeg rua lub rooj qeg taab meeg cov thawj. Yaam kws koj pum

8. tsw xob maaj moog ua timkhawv rua huv tsev tu plaub tsaam muaj dua lwm tug ua rua koj poob ntsej muag mas thaus kawg koj yuav ua le caag?

9. Ca le nrug tug kws muaj plaub rua koj has kuas hum, tsw xob nthuav nwg lub qai rua lwm tug,

10. tsaam lwm tug tau nov tes koj raug txaaj muag hab luas yuav xyaav koj lub moo tsw zoo moog le.

11. Has tej lug zoo rua lub swjhawm kws cheem tsum has, mas zoo yaam nkaus le lub txwv duaj kub kws nyob huv lub taig nyaj.

12. Tug kws txawj ntse ntuag tug kws tig ntsej noog mas zoo yaam nkaus le nplhaib kub saw kub.

13. Daus xwb daus npu laaj txag rua lub caij sau qoob le caag, mas tug tub tshaaj xu kws ncaaj zoo le ntawd rua cov kws khaiv nwg moog, nwg ua rua cov kws khaiv nwg moog kaaj sab.

14. Tug kws khaav has tas nwg yuav pub yaam u yaam nuav tassws kuj tsw pub, mas zoo yaam nkaus le tej fuab cua kws tsw muaj naag.

15. Qhov kws ua sab ntev yuav haub tau num tswv, hab tug nplaig kws has lug mog lug muas yuav txu tau lub sab tawv.

16. Yog koj pum zwb ntaab ca le noj kuas txaus nkaus xwb, tsaam koj tsau dhau tes ntuav.

17. Koj txhais kwtaw kws moog cov zog huv luas tej tsev mas tsawg moog ib ntswv, tsaam tes luas dhuav hab ntxub koj.

18. Tug kws ua cuav timkhawv tum kwvtij zej zog kuj zoo yaam nkaus le tug qws lossws raab ntaaj lossws raab xub kws ntse.

19. Qhov kws tso sab rua ib tug kws tsw ncaaj thaus kws koj raug txom nyem, kuj zoo yaam nkaus le tug nav kws mob hab txhais kwtaw kws ceg tawv.

20. Tug kws hu nkauj rua tug kws lwj sab noog mas zoo yaam nkaus le tug kws hle nwg cev tsoog tsho rua nub kws no, hab zoo yaam nkaus le muab kua qaub laub rua lub kav txhaab.

21. Yog koj tug yeeb ncuab tshaib plaab tes muab mov rua nwg noj, yog nwg nqhes dej ca le muab rua nwg haus,

22. tsua qhov koj yuav rauv ib cub thee cig quas plawg rua sau nwg taubhau, mas Yawmsaub yuav muab nqe zug rua koj.

23. Cua ntsawj saab peg tuaj coj naag lug le caag, tug nplaig kws taug xaiv kuj coj lub ntsej muag chim lug ib yaam le ntawd.

24. Nyob sau ruv tsev zoo dua le nrug tug quaspuj tsawm taug nyob huv tsev.

25. Tej xuv zoo kws tuaj tebchaws deb tuaj kuj zoo yaam nkaus le khob dej txag rua tug kws nqhes.

26. Tug ncaaj nceeg kws swb tug tuabneeg limham zoo yaam nkaus le lub hauv dej av lossws lub qhov dej qas.

27. Qhov kws noj zwb ntaab ntau kuj tsw zoo, yog le ntawd yuav tsw xob has tej lug qhuas ntau dhau.

28. Tug kws tswj tsw tau nwg lub sab, kuj yaam nkaus le lub nroog kws pob taag tsw muaj ntsaa loog.