Pajlug - Đoạn 24

1. Tsw xob khib cov tuabneeg phem, tsw xob ntshaw nrug puab nyob ua ke,

2. tsua qhov puab lub sab ntaus tswvyim ua nruj ua tswv, hab puab daim tawv ncauj has tej lug kws yuav moog ua phem.

3. Swv tswvyim txhad ua tau lub tsev, hab muaj kev thoob tswb to nrog ua lub tsev nyob ruaj khov.

4. Hab muaj kev txawj ntse txhad ua rua tej chaav tsev muaj cuab txhaj cuab taam zoo zoo nkauj puv nkaus.

5. Tug kws muaj tswvyim muaj zug heev, tug kws txawj ntse kuj muaj zug tuaj.

6. Yog muaj cov txawj ntse qha mas koj txhad nqeg teg ua rog tau, hab muaj ntau leej ua chaw sablaaj koj txhad kov yeej.

7. Tswvyim nyob sab dhau tug ruag, ntawm lub rooj loog nwg tsw rua qhov ncauj has.

8. Tug kws ntaus tswvyim ua phem luas yuav hu tas tug thaab plaub.

9. Qhov kws ntaus tswvyim ua tej yaam ruag kuj txhum, hab tug kws thuaj luag yog tug kws tuabneeg ntxub kawg.

10. Yog koj poob sab nthaav rua nub kws koj raug ceblaaj, koj kuj tsw muaj zug.

11. Ca le cawm cov kws raug caab moog tua kuas dim, ca le paab tug kws raug caab nrhaaj nrhuj nrheev moog tua kuas dim.

12. Yog koj has tas, “Peb tsw paub zaaj nuav le,” mas Vaajtswv kws tshuaj saib lub sab yuav tsw pum lov? Tug kws zuv rawv koj tug ntsuj plig tsw paub hab lov? Nwg yuav tsw pauj rua tuabneeg lawv le puab tau ua lug lawm lov?

13. Kuv tub 'e, ca le noj zwb ntaab vem yog yaam kws zoo, hab zwb ntaab kws nrug ntawm lub tsev ntaab kuj qaab zwb heev.

14. Yuav tsum paub tas tswvyim zoo ib yaam le ntawd rua koj tug ntsuj plig, yog koj tau tswvyim, koj lub hauv ntej yuav zoo hab koj yuav tsw nplaam tej kws koj vaam.

15. Tsw xob zuv tog nrhw ib yaam le tej tuabneeg limham kws yuav lws tug ncaaj nceeg lub tsev, tsw xob ua nruj ua tswv rua nwg lub tsev,

16. tsua qhov tug ncaaj nceeg txawm qaug xyaa zag los tseed sawv lug hab, tassws tug tuabneeg limham raug vej sub vej sw muab ntxuav pov tseg.

17. Tsw xob zoo sab xyiv faab rua thaus koj tug yeeb ncuab qaug, hab tsw xob zoo sab rua thaus nwg dawm,

18. ntshai tsaam Yawmsaub pum tes yuav tsw txaus sab hab nwg yuav thim qhov kws nwg npau tawg rua koj tug yeeb ncuab.

19. Koj tsw xob nyuaj sab rua tej tuabneeg kws ua phem hab tsw xob khib cov kws ua limham,

20. tsua qhov tug tuabneeg phem tsw muaj lub hauv ntej zoo, hab tug tuabneeg limham lub teeb yuav raug muab tua.

21. Kuv tub 'e, ca le fwm hab paub ntshai Yawmsaub hab vaajntxwv, tsw xob nrug tej tuabneeg kws faav xeeb ua ib lub sab,

22. tsua qhov ob tug yuav ua vej sub vej sw tshwm lug sai sai, mas leejtwg yuav paub tej kev puam tsuaj kws ob tug ua?

23. Tej lug nuav yog cov kws muaj tswvyim has. Qhov kws saib dej ua ntu saib tuabneeg plhu mas tsw zoo le.

24. Tug kws has rua tug tuabneeg limham tas, “Koj tsw txhum,” mas yuav raug tej pejxeem tshev foom hab raug tej tebchaws ntxub.

25. Tassws cov kws qhuab ntuag tug tuabneeg limham yuav tau nyob kaaj sab hab yuav tau koob moov.

26. Tug kws teb lu lug tseeb mas zoo le nwj daim tawv ncauj.

27. Ca le npaaj koj tej daag num saab nrau hab ua txhua yaam kuas txhwj huv koj daim teb, dhau ntawd kuj ua koj lub tsev.

28. Tsw xob laam ua timkhawv tum koj kwvtij zej zog kws tsw tau ua txhum, hab koj daim tawv ncauj tsw xob daag.

29. Tsw xob has tas, “Kuv yuav ua rua nwg yaam le nwg tau ua rua kuv lawm, kuv yuav ua pauj tej kws nwg tub ua lawm.”

30. Kuv hlaa huv tug cis nkeeg daim teb hab tug tsw thoob tswb lub vaaj txwv maab,

31. ua cav xuav paug tuaj puv nkaus, nroj tsuag tuaj ntum quas nti, hab tej ntsaa laaj kaab pob zeb pob taag.

32. Kuv pum hab ua tuab zoo xaav, kuv saib ntsoov mas kuv txhad tau kev qhuab qha.

33. Tsaug ib nyuas tswg zug, ib nyuas qe muag, khawm teg su ib plag,

34. mas txujkev pluag yuav lug txug koj yaam nkaus le tub saab tuaj lws, hab kev txom nyem yuav lug yaam nkaus le tug coj ntaaj coj rag tuaj lws.