Pajlug - Đoạn 21

1. Vaajntxwv lub sab yog tug nam dej kws nyob huv Yawmsaub txhais teg, Yawmsaub muab nwg lub sab tig lawv le Yawmsaub pum zoo.

2. Tuabneeg pum tas txhua yaam kws puab ua puavleej zoo, tassws Yawmsaub tshuaj huv lub sab.

3. Qhov kws ua ncaaj nceeg hab txav txem ncaaj, hum Yawmsaub lub sab heev dua le muab hov txhua chaw xyeem.

4. Lub qhov muag khaav theeb hab lub sab muab hlub, kws yog cov tuabneeg limham lub teeb mas puavleej txhum.

5. Tug tuabneeg nquag tej hom phaj yeej coj kuas nwg muaj nplua mag, tassws txhua tug kws maaj ua dog ua dig yeej tu pluag xwb.

6. Tej nam txhaab nyaj kws tug nplaig daag tau mas yog tej paa nchu kws nyob ib vuag dua xwb hab yog txujkev tuag rooj hlua.

7. Cov limham txujkev ua nruj ua tswv yuav kuav puab moog vem yog puab tsw yeem ua ncaaj rua luas.

8. Cov tuabneeg muaj txem txujkev yeej nkhaus, tassws tej kws cov tuabneeg dawb huv ua kuj raug cai.

9. Nyob sau ruv tsev zoo dua le nrug tug quaspuj tsawm taug nyob huv tsev.

10. Tug tuabneeg limham lub sab ntshaw ua phem, nwg tsw khuvleej nwg tej kwvtij zej zog.

11. Thaus tej tuabneeg muab hlub raug txem mas cov tuabneeg tsw thoob tswb kuj ntse tuaj, thaus tug kws muaj tswvyim raug luas qhuab qha, nwg kuj tau kev txawj ntse.

12. Vaajtswv kws ncaaj nceeg ua tuab zoo saib cov tuabneeg limham lub tsev, nwg muab cov tuabneeg limham laim pov tseg puam tsuaj taag.

13. Tug kws ntsaws qhov ntsej tsw noog tug pluag lub suab hu, nwg yuav hu tsw muaj leejtwg nov hab.

14. Ua tuabywv pub tshaav ntuj rua tug kws chim mas kev chim yuav pluj, muab nyaj xab ntsaws rua huv xubndag mas kev npau tawg yuav pluj.

15. Thaus tu plaub ncaaj kuj ua rua cov kws ncaaj nceeg zoo sab, tassws ua rua cov kws ua phem poob sab nthaav.

16. Tug kws zos txujkev thoob tswb to nrog, yuav moog nrug cov tuabneeg tuag nyob ua ke.

17. Tug kws nyam kev lomzem yuav pluag, tug kws nyam cawv txwv maab hab cov roj muaj nqes yuav tsw nplua nuj.

18. Cov tuabneeg limham yuav ua nqe txhwv cov tuabneeg ncaaj nceeg, tug tuabneeg tsw ncaaj yuav theej tug ncaaj chaw.

19. Nyob tebchaws moj saab qhua mas zoo dua le nrug tug quaspuj tsawm taug ywg taug nyob ua ke.

20. Tej cuab txhaj cuab taam muaj nqes nyob huv tug kws muaj tswvyim lub tsev, tassws tug ruag nwg noj nwg le taag huvsw.

21. Tug kws lawv ncav txujkev ncaaj nceeg hab txujkev hlub yuav tau txujsa hab koob meej hab yuav vaam meej.

22. Tug kws muaj tswvyim nce moog ntaus tau cov tuabneeg kws muaj zug lub nroog, hab rhuav lub chaw ruaj khov kws puab tso sab pob taag.

23. Tug kws tswj tau nwg lub qhov ncauj hab nwg tug nplaig kuj tsom kwm tau nwg dim tej kev ceblaaj.

24. Tug kws tsaab ua luj hab khaav theeb npe hu ua tug muab hlub, mas nwg xyum khaav theeb tsw yuav kev yuav cai.

25. Tug cis nkeeg txujkev ntshaw yuav rov tua nwg, vem yog nwg txhais teg tsw kaam ua num.

26. Tug kws ua sab hlub kuj ua sab hlub ib nub tsaus ntuj, tassws tug ncaaj nceeg mas pheej pub tsw nkaum teg le.

27. Tej kws cov tuabneeg limham muab xyeem mas Yawmsaub ntxub kawg le, thaus puab coj tuaj ntawm lub sab kws xaav ua phem mas Yawmsaub yimfuab ntxub.

28. Tug cuav timkhawv yuav puam tsuaj, tassws tej lug kws tug noog lug has yuav nyob moog.

29. Tug kws limham nwg ua nwg lub plhu tuab kawg le, tassws tug ncaaj nceeg nwg ua tuab zoo saib nwg txujkev.

30. Tsw muaj tug tswvyim twg hab kev txawj ntse hab tej lug taw qha twg kws kov yeej tau Yawmsaub.

31. Npaaj neeg txhwj rua nub kws ua rog lawm, tassws qhov kws kov yeej nyob ntawm Yawmsaub.