Pajlug - Đoạn 2

1. Kuv tub 'e, yog koj khaws kuv tej lug ca hab muab kuv tej lug nkaw ceev rua huv koj lub sab,

2. hab yog koj tig ntsej quas ncuv noog tug tswvyim hab tig lub sab lug nrhav kev to taub,

3. yog koj hu nrhav kev txawj ntse hab tsaa ncauj thov kev nkaag sab,

4. yog koj nrhav tswvyim ib yaam le nrhav tej nyaj, hab nrhav ib yaam le nrhav tej nyaj txag kws muab zais ca lawm,

5. yog koj ua le nuav koj yuav to taub qhov kws fwm hab paub ntshai Yawmsaub hab txawj paub txug Vaajtswv.

6. Tsua qhov Yawmsaub yog tug kws pub tswvyim, tej kev txawj ntse hab tej kev nkaag sab yog tawm huv Yawmsaub qhov ncauj lug.

7. Nwg ceev tug tswvyim ca rua cov kws sab ncaaj, nwg yog daim hlau tiv thaiv cov kws ua neej dawb huv.

8. Nwg ceev txujkev ua ncaaj ua nceeg hab nwg tsom kwm nwg cov tuabneeg dawb huv.

9. Mas koj yuav paub txujkev ncaaj nceeg hab kev txav txem ncaaj hab ua ncaaj nruab nraab hab paub ua qhov zoo rua txhua faab.

10. Tswvyim yuav nkaag rua huv koj lub sab, hab kev txawj ntse yuav ua kuas koj tug ntsuj plig xyiv faab.

11. Kev txawj ntse yuav tsom kwm koj, hab kev to taub yuav tiv thaiv koj,

12. hab yuav paab koj dim txujkev ua phem, hab dim cov tuabneeg ntxeev xaiv.

13. Puab tso txujkev ncaaj nceeg tseg, taug txujkev tsaus ntuj.

14. Puab yeej zoo sab ua phem hab nyam tej kev phem ntxeev ntxag,

15. yog cov kws taug txujkev nkhaus, puab yog tuabneeg sab nkhaus xwb.

16. Koj yuav dim ntawm tug puj plhu tuab, yog tug puj cov zej cov zog kws has lug qaab rog qaab ntse,

17. nwg muab nwg tug quasyawg kws thaus hluas nkauj nwg yuav tso pov tseg, hab tsw ncu txug tej lug kws nwg cog tseg rua nwg tug Vaajtswv lawm.

18. Nwg lub tsev yuav coj moog txug txujkev tuag, nwg tej txujci yuav coj moog rua huv tub tuag teb.

19. Cov kws moog cuag nwg tsw muaj ib tug rov qaab lug le, tsw muaj ib tug kws yuav rov lug taug tau txujkev kws caj sa.

20. Yog le ntawd koj yuav tsum taug cov tuabneeg zoo txujkev, hab coj lawv le cov tuabneeg ncaaj nceeg tug cujpwm,

21. tsua qhov cov kws sab ncaaj yuav tau nyob huv lub tebchaws, hab cov kws ua sab dawb paug yuav tau nyob ruaj rua huv.

22. Tassws cov tuabneeg limham yuav raug muab txav tu huv lub tebchaws, hab cov tuabneeg ntxeev ntxag yuav raug muab dob hlo caag.