Pajlug - Đoạn 14

1. Tswvyim ua nwg lub tsev, tassws txujkev ruag txhais teg muab nwg lub tsev rhuav pov tseg.

2. Tug kws taug txujkev ncaaj fwm hab paub ntshai Yawmsaub, tassws tug kws taug txujkev nkhaus yog saib tsw taug Yawmsaub.

3. Huv tuabneeg ruag lub qhov ncauj muaj raab nplawm rua nwg lub nraus qaum, tug tuabneeg ntse daim tawv ncauj yuav tiv thaiv tau nwg.

4. Qhovtwg tsw muaj txwv nyuj, qhov ntawd tsw muaj qoob, tassws tej qoob loos ntau tau ntawm nyuj tug zug.

5. Tug timkhawv ncaaj tsw has daag, tassws tug timkhawv cuav ua paa puavleej yog daag.

6. Tug kws muab hlub yeej nrhav tsw tau tswvyim le, tassws tug kws nkaag sab mas yoojyim kawm tau kev txawj ntse.

7. Ca le tswv ntawm tug tuabneeg ruag lub xubndag moog vem tas koj yuav tsw tau tej lug txawj ntse hov ntawd.

8. Tug paub taab tug tswvyim qha nwg paub ua neej, tassws tug tuabneeg ruag txujkev ruag daag ntxag nwg.

9. Tuabneeg ruag luag qhov kws ua kevcai xyeem daws txem, tassws Vaajtswv txaus sab rua cov kws ncaaj nceeg.

10. Nyag lub sab paub nyag txujkev lwj sab, hab tsw muaj lwm tug lug nrug nwg zoo sab.

11. Tug tuabneeg limham lub tsev yuav raug puam tsuaj, tassws tug kws ncaaj nceeg lub tsev ntaub yuav vaam meej.

12. Muaj ib txujkev kws tuabneeg pum tas zoo, tassws txujkev hov qhov kawg yog kev tuag.

13. Lub ntsej muag luag los lub sab tseed txhawj quaj, qhov kws sab xyiv faab, thaus kawg yog kev quaj ntsuag.

14. Tug tuabneeg sab nkhaus yuav tau saws tej kws nwg ua phem puv npo, tuabneeg zoo yuav tau saws tej kws nwg ua zoo.

15. Tug tuabneeg tsw thoob tswb ntseeg txhua yaam, tassws tug kws paub qaabhau ua tuab zoo saib nwg taug txujkev twg.

16. Tug kws muaj tswvyim ceev faaj hab tig hlo ntawm txujkev phem, tassws tug tuabneeg ruag tsw txawj tswj, nwg laam tau laam ua.

17. Tug tuabneeg npau ceev mas ua tej kws ruag kawg le, tassws tug kws ntse ua sab ntev.

18. Cov kws tsw thoob tswb tau txujkev ruag, cov kws paub qaabhau tau txujkev txawj ntse ua lub mom kub.

19. Cov tuabneeg phem pe cov tuabneeg zoo, cov tuabneeg limham pe ntawm cov kws ncaaj nceeg lub qhov rooj.

20. Tug tuabneeg pluag mas kwvtij zej zog los kuj ntxub, tassws tug nplua nuj muaj phoojywg coob heev.

21. Tug kws saib tsw taug kwvtij zej zog kuj muaj txem, tassws tug kws hlub cov pluag kuj tau moov zoo.

22. Cov kws ntaus tswvyim phem tsw txhum lov? Cov kws ntaus tswvyim zoo kuj tau qhov zoo hab luas tso sab rua puab.

23. Muaj tshaaj thawj rua txhua yaam num kws ua, tassws lub ncauj has do xwb ua rua pluag.

24. Tej nyaj txag yog cov kws txawj ntse lub mom kub, tassws txujkev ruag yog cov kws ruag txuj saw ntawm cej daab.

25. Tug timkhawv kws ncaaj paab cawm txujsa, tassws tug has tsw ncaaj yog ntxag luas nce nthaab.

26. Qhov kws fwm hab paub ntshai Yawmsaub ua rua yug nyob tso sab plhuav, yug cov mivnyuas kuj tau lub chaw moog cawm sav.

27. Qhov kws fwm hab paub ntshai Yawmsaub yog lub qhov dej txhawv kws pub txujsa, sub txhad zos dhau txujkev tuag lub vuj hlua.

28. Tej pejxeem coob coob yog vaajntxwv le meej mom, yog tsw muaj pejxeem vaajntxwv kuj puam tsuaj taag.

29. Tug kws tsw chim sai kuj yog tug thoob tswb to nrog, tassws tug kws npau tawg sai kuj yog txhawb txujkev ruag.

30. Lub sab kws nyob tug kuj yog pub txujsa rua lub cev, tassws lub sab kws kub ntxhuv quas nyo ua rua pob txhaa po.

31. Tug kws quab yuam tug pluag kuj saib tsw taug Vaajtswv kws yog tug tswm, tassws tug kws hlub cov kws txom nyem kuj ua rua Vaajtswv tau koob meej.

32. Tug tuabneeg limham qaug vem tej kev phem kws nwg ua, tassws tug ncaaj nceeg kuj tau lub chaw cawm sav vem nwg ua ncaaj.

33. Tswvyim nyob huv tug kws thoob tswb to nrog lub sab, tassws tuabneeg ruag lub sab tsw pum tswvyim hlo le.

34. Kev ncaaj nceeg txhawb nqaa lub tebchaws, tassws kev txhum ua rua lub tebchaws poob ntsej muag.

35. Cov tub qhe kws ua num ntse ntswb ntsuav ua rua vaajntxwv txaus sab, tassws vaajntxwv npau tawg rua tug kws ua tej kev txaaj muag.