Pajlug - Đoạn 13

1. Tug tub kws ntse noog nwg leej txwv tej lug qha, tassws tug kws thuaj luag tsw noog tej lug qhuab ntuag.

2. Tug tuabneeg zoo tau noj tej kws nwg lub qhov ncauj has zoo, tassws tug tuabneeg ntxeev ntxag ntshaw ua limham ndais ntuj.

3. Tug kws tswj tau nwg lub qhov ncauj tuav tau nwg txujsa, tassws tug kws qheb daim tawv ncauj rua tsuag kuj raug kev puam tsuaj.

4. Tug cis nkeeg tug ntsuj plig nqhes nqhes los kuj tsw tau daabtsw le, tassws tug nquag tug ntsuj plig puv ntoob.

5. Tug ncaaj nceeg ntxub kev daag, tassws tug tuabneeg limham ua tej kws txaaj muag hab poob koob meej.

6. Txujkev ncaaj nceeg tsom kwm tug kws ua ncaaj, tassws lub txem ua rua tuabneeg limham puam tsuaj.

7. Ib txha ua txuj nplua nuj tassws tsw muaj daabtsw le, ib txha ua txuj pluag tassws muaj nyaj txag ntau kawg le.

8. Nqe txhwv tuabneeg txujsa yog tej nyaj txag kws nwg muaj, tassws tsw muaj leejtwg hem tug tuabneeg pluag.

9. Tug kws ncaaj nceeg lub teeb ci zoo sab xyiv faab, tassws tug tuabneeg limham lub teeb yuav raug muab tua.

10. Qhov kws muab hlub tsuas yog ua kuas muaj kev sws caav sws tshev xwb, tassws tswvyim nrug cov kws noog tej lug taw qha.

11. Tej nyaj txag kws ua ib paas xwb tub tau, los yuav lau zuj zug taag, tassws tug kws maav khwv tau yuav tsaav kuas tau ntau.

12. Qhov kws tsw tau lawv le lub sab vaam kuj mob sab, tassws qhov kws tau lawv le lub sab xaav kuj yog tsob ntoo kws pub txujsa.

13. Tug kws saib tsw taug tej lug qhuab qha nwg coj kev puam tsuaj lug rua nwg, tassws tug kws fwm tej kevcai yuav tau yeeb koob.

14. Tej lug kws cov tuabneeg txawj ntse qha yog lub qhov dej txhawv kws pub txujsa, sub txhad zos dhau txujkev tuag lub vuj hlua.

15. Tug kws taab faab zoo mas luas fwm, tassws tug tuabneeg tsw ncaaj txujkev ua rua nwg puam tsuaj.

16. Tug tuabneeg kws paub qaabhau nwg ua txhua yaam lawv le kev txawj ntse, tassws tug tuabneeg ruag tsuas qha nwg txujkev ruag xwb.

17. Tug tub tshaaj xu kws tsw ncaaj ua rua tuabneeg poob rua huv kev kub ntxhuv, tassws tug tub tshaaj xu kws ncaaj coj tshuaj tuaj khu.

18. Kev pluag kev txaaj muag lug raug tug kws tsw quav ntsej tej lug qhuab qha, tassws tug kws noog tej lug qhuab ntuag tau koob meej.

19. Yog tau lawv le kws yug ntshaw mas qaab zwb kawg rua yug tug ntsuj plig, tassws tug tuabneeg ruag ntxub qhov kws tso kev phem tseg kawg le.

20. Tug kws nrug nraim tug txawj ntse nwg kuj yuav txawj ntse, tassws tug kws nrug cov tuabneeg ruag ua phoojywg yuav raug kev lamswm.

21. Lub khuab phem lawv cuag cov muaj txem, tassws kev vaam meej poob rua cov ncaaj nceeg.

22. Tug tuabneeg zoo tseg qub txeeg qub teg rua nwg tub ki xeeb ntxwv, tassws tug tuabneeg muaj txem tej nyaj txag yuav khaws tseg ca rua tug ncaaj nceeg.

23. Tug tuabneeg pluag tej teb kws muab tso tseg tseed yuav tau qoob loos ntau, tassws qhov kws tu plaub tsw ncaaj yuav muab txeeb hlo moog.

24. Tug kws tsw swv raab nplawm kuj yog ntxub nwg tug tub, tug kws hlub nwg tug tub yeej yuav ua tuab zoo nplawm qhuab qha.

25. Tug kws ncaaj nceeg yuav noj txaus sab txaus ntsws, tassws tuabneeg limham lub plaab tshaib tshaib.