Pajlug - Đoạn 11

1. Raab teev kws ntxo luas Yawmsaub ntxub kawg le, tassws lub thauj teev kws hum ua rua nwg zoo sab.

2. Thaus khaav theeb lawm yuav raug poob ntsej muag, tassws tswvyim yuav nrug nraim tug kws tsw muab hlub.

3. Tug kws ncaaj nceeg txujkev ua ncaaj yuav coj nwg lub hauv ntej, tassws tug tuabneeg ntxeev ntxag txujkev nkhib nkhaus yuav rov ua rua nwg puam tsuaj.

4. Tej nyaj txag tsw muaj qaabhau rua nub kws Yawmsaub npau tawg, tassws txujkev ncaaj nceeg cawm kuas dim kev tuag.

5. Tug kws tsw muaj chaw thuaj, nwg txujkev ncaaj nceeg yuav coj nwg kev ncaaj nraim, tassws tug tuabneeg limham yuav qaug ntawg rua huv nwg txujkev ua limham.

6. Tug ncaaj nceeg txujkev ua ncaaj yuav paab nwg dim, tassws tug tuabneeg ntxeev ntxag txujkev ntshaw yuav rov nteg tau nwg.

7. Thaus tug tuabneeg limham tuag, nwg txujkev vaam kuj pluj taag, tug kws tsw fwm Vaajtswv tej kws nwg xaav tau kuj pluj ntshws lawm.

8. Tug kws ncaaj nceeg tau kev dim qhov txom nyem, tassws tug tuabneeg limham yuav nyob nwg chaw raug txom nyem.

9. Tug kws tsw fwm Vaajtswv nwg lub qhov ncauj ua rua kwvtij zej zog puam tsuaj, tassws tug kws ncaaj nceeg kev txawj ntse paab tau nwg dim.

10. Thaus cov kws ncaaj nceeg noj qaab nyob zoo mas lub nroog kuj xyiv faab, thaus cov tuabneeg limham puam tsuaj taag kuj muaj suab qw zoo sab.

11. Tej koob moov kws cov tuabneeg ncaaj nceeg tau, ua rua lub nroog vaam meej tuaj, tassws cov tuabneeg limham lub qhov ncauj ua rua lub nroog puam tsuaj.

12. Tug kws saib tsw taug kwvtij zej zog yog tug kws tsw thoob tswb, tassws tug kws paub qaabhau mas nyob tuabywv.

13. Tug kws cov zog taug xaiv pheej qha tej kws muab npog ca tshwm lug, tassws tug kws tso sab tau mas yeej npog tau tej ntawd ca.

14. Qhovtwg tsw muaj tug txawj coj tej pejxeem yuav qaug taag, tassws qhov kws muaj ntau leej ua chaw sablaaj yeej yuav nyob thaaj yeeb.

15. Tug kws laav lwm tug yuav raug kev ntxhuv sab, tassws tug kws tsw kaam laav lwm tug yuav nyob kaaj sab lug.

16. Tug quaspuj kws paub cai yeej tau koob meej, tassws tug quasyawg sab heev yuav tau nyaj txag.

17. Tug kws hlub luas yuav rov ua rua nwg tau zoo, tassws tug kws nyaum yuav rov ua rua nwg mob.

18. Tug tuabneeg limham tau cov nqe zug kws daag nwg xwb, tassws tug kws tseb txujkev ncaaj nceeg yuav tau tej nqe zug kws tseeb.

19. Tug kws khov kho huv txujkev ncaaj nceeg yuav muaj txujsa nyob, tassws tug kws lawv quas ncav txujkev phem yuav tuag.

20. Cov tuabneeg kws lub sab nkhaus, Yawmsaub ntxub kawg le, tassws cov kws tsw muaj chaw thuaj le ua rua Yawmsaub zoo sab.

21. Ca le paub tseeb tas tug tuabneeg phem yuav tsw dim kev teem txem, tassws tug kws ncaaj nceeg yuav tau kev cawm dim.

22. Tug quaspuj zoo nkauj kws tsw paub cai zoo le lub nplhaib kub kws npua coj ntawm qhov ntswg.

23. Qhov kws cov tuabneeg ncaaj nceeg ntshaw coj moog tau qhov zoo xwb, tassws qhov kws cov tuabneeg limham vaam coj moog txug Vaajtswv kev npau tawg.

24. Tug kws zoo sab pub dawb nwg nplua nuj quas zug, tug kws tsw kaam pub yaam kws nwg pub tau, nwg kuj pluag quas zug.

25. Tug kws lub sab daav pub tau yeej yuav nplua nuj, tug kws muab dej rua luas haus, luas kuj yuav pub dej rua nwg.

26. Tuabneeg tshev foom tug kws tuav nqe qoob loos tsw muag, tassws tug kws ca le muag, yuav tau moov zoo rua sau nwg lub taubhau.

27. Tug kws swv zug nrhav qhov zoo yeej yuav ua rua luas txaus sab rua nwg, tassws kev phem yuav raug tug kws nrhav qhov phem.

28. Tug kws tso sab rua nwg tej nyaj txag yuav qaug pluj taag, tassws tug kws ncaaj nceeg yuav hlub zoo yaam nkaus le tej nplooj ntoo ntsuab.

29. Tug kws tswm kev kub ntxhuv rua nwg tsev tuabneeg, mas thaus kawg nwg yuav tau cua ua qub txeeg qub teg xwb, hab tug ruag yuav ua tug ntse qhev.

30. Tug kws ncaaj nceeg tej num yog tsob ntoo kws pub txujsa, tassws qhov kws kwv tawv txuj kevcai yeej yog txuv txujsa.

31. Yog cov tuabneeg ncaaj nceeg tau tej kws tswm nyog tau huv nplajteb nuav, mas cov tuabneeg limham hab muaj txem yimfuab yuav raug teem txem.